រាជធានីភ្នំពេញ ៖ កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ កាលពីថ្ងៃទី១៨ មិថុនា ២០១៨ បានធ្វើការស្រាវជ្រាវឃាត់ខ្លួនជនសង្ស័យចំនួន២ នាក់ នៅចំណុចមុខផ្ទះសំណាក់ LS ផ្លូវលេខ៥៣ សង្កាត់ផ្សារថ្មី៣ ខណ្ឌដូនពេញ ពាក់ព័ន្ធឆក់កាបូបដៃជនរងគ្រោះនៅតាមផ្លូវសាធារណៈ ។
ជនសង្ស័យដែលត្រូវឃាត់ខ្លួនខាងលើ ១-ឈ្មោះ ជួន វីរៈសត្យា ហៅសិដ្ឋ ភេទប្រុស អាយុ១៦ឆ្នាំ មុខរបរមិនពិតប្រាកដ ស្នាក់នៅផ្ទះលេខ២១២ ផ្លូវលេខ៥៣ សង្កាត់ផ្សារថ្មី៣ ខណ្ឌដូនពេញ និង២-ឈ្មោះ មាស ភីម ហៅប៉ក់ ភេទប្រុស អាយុ១៥ឆ្នាំ មុខរបរមិនពិតប្រាកដ ស្នាក់នៅផ្ទះលេខ៦៧ ផ្លូវលេខ៥៩ សង្កាត់ផ្សារថ្មីទី២ ខណ្ឌដូនពេញ រួមនឹងវត្ថុតាងមានម៉ូតូម៉ាកSUZUKINEX ពណ៌ទឹកប្រាក់ ស៊េរីឆ្នាំ២០១៨ ១គ្រឿងពាក់ស្លាកលេខ ភ្នំពេញ ១GQ-៨៤៦៣ ។
ទាក់ទិនការចាប់ខ្លួនជនសង្ស័យខាងលើលោកវរសេនីយ៍ឯក ប៊ុន សត្យា បានឲ្យដឹថា តាមចម្លើយជនសង្ស័យបានធ្វើសកម្មភាពឆក់ចំនួន២លើកមកហើយ ។ ករណីទី១ ឆក់កាបូបដៃ ពណ៌ខ្មៅ នៅចំណុចផ្លូវលេខ១០៥ កែងផ្លូវលេខ២៧៤ ភូមិ១ សង្កាត់បឹងព្រលឹត ខណ្ឌ៧មករា កាលពីម៉ោង៥និង២០នាទីល្ងាច ថ្ងៃទី២៧ ឧសភា ២០១៨ ដែលជនរងគ្រោះឈ្មោះ LIN WEI ភេទប្រុស អាយុ៤៤ឆ្នាំ ជាជនជាតិចិន ស្នាក់នៅបន្ទប់លេខ៧០៩ សណ្ឋាគារកាដាលីស ផ្ទះលេខ១០៥ ស្ថិតក្នុងភូមិ-ឃុំខាងលើ ។
ចំណែកករណីទី២ ឆក់ទូរស័ព្ទដៃម៉ាក IPhone6 ពណ៌ទឹកមាស នៅចំណុចផ្ទះលេខ២១៩ ផ្លូវលេខ២១៧ ក្រុម២៦ ភូមិ៥ សង្កាត់អូរឬស្សីទី៤ ខណ្ឌ៧មករា កាលពីម៉ោង៨យប់ថ្ងៃទី១៩ ឧសភា ២០១៨ ដែលជនរងគ្រោះ ជាខ្មែរ មិនបានដាក់បណ្តឹងទេ ។
ក្រោយពីយោងទៅលើចម្លើយសារភាពរបស់ជនសង្ស័យ សមត្ថកិច្ចបានកសាងសំណុំរឿង បញ្ជូនជនសង្ស័យទាំង២នាក់ទៅកាន់សាលាដំបូងរាជធានីភ្នំពេញចាត់ការតាមនីតិវិធី ៕
ចែករំលែកព័តមាននេះ