រាជធានីភ្នំពេញ ៖ តារាចម្រៀងកញ្ញាឱក សុគន្ធកញ្ញា ត្រូវប្អូនប្រុសថៅកែផលិតកម្មហង្សមាស ចូលស្តីដណ្តឹងតាមប្រពៃណី បន្ទាប់ពីលេចលឺអ្នកទាំងពីរសាងស្នេហ៍ប៉ុន្មានឆ្នាំមកហើយ ។ ពិធីនោះបានធ្វើឡើងស្របគ្នាជាមួយពិធីឡើងវីឡាថ្មីរបស់ឱក សុគន្ធកញ្ញា…
រាជធានីភ្នំពេញ ៖ តារាចម្រៀងកញ្ញាឱក សុគន្ធកញ្ញា ត្រូវប្អូនប្រុសថៅកែផលិតកម្មហង្សមាស ចូលស្តីដណ្តឹងតាមប្រពៃណី បន្ទាប់ពីលេចលឺអ្នកទាំងពីរសាងស្នេហ៍ប៉ុន្មានឆ្នាំមកហើយ ។ ពិធីនោះបានធ្វើឡើងស្របគ្នាជាមួយពិធីឡើងវីឡាថ្មីរបស់ឱក សុគន្ធកញ្ញា កាលពីព្រឹកថ្ងៃទី១៨ ខែមិថុនា ឆ្នាំ២០១៨ ជាមួយនឹងការចូលរួមពីភ្ញៀវកិត្តិយសជាច្រើន។
បើទោះបីជានៅក្នុងពិធីនោះមានការទម្លាយត្រឹមតែថា ជាពិធីឡើងគេហដ្ឋានថ្មីក៏ដោយ ប៉ុន្តែទំនងជាការបិទបាំងរូបភាពពិធីចូលស្តីដណ្តឹងឱក សុគន្ធកញ្ញា ប៉ុណ្ណោះ ។ តាមរយៈរូបភាពគេឃើញមានការរៀបចំផ្លែឈើ ជាគូៗ លក្ខណៈជាពិធីស្តីដណ្តឹង ។ នៅក្នុងពិធីនោះគេសង្កេតឃើញមានការចូលរួមពីក្រុមគ្រួសារទាំងសងខាង ជាពិសេសវត្តមានថៅកែផលិតកម្មហង្សមាស និងមន្ត្រីថ្នាក់ខ្ពស់មួយចំនួនទៀតយ៉ាងឱឡារិក ។ អ្នកដែលបានចូលរួមនៅក្នុងពិធីនោះបានបង្ហោះសារស្រដៀងគ្នា បើទោះបីជាមិនបានបញ្ជាក់ឲ្យច្បាស់ថា ជាពិធីស្តីដណ្តឹងឱក សុគន្ធកញ្ញា ក៏ដោយ ប៉ុន្តែពួកគេថ្លែងពាក្យថា រីករាយថ្ងៃពិសេស និងការឡើងគេហដ្ឋានថ្មីជូនចំពោះតារារូបនេះ ។
ដោយឡែកហ្វេសប៊ុកមួយដាក់ឈ្មោះថា «ព្រះពុទ្ធ ព្រះធម៌ ព្រះសង្ឃ »បានបង្ហោះសារជាមួយនឹងរូបភាពជាច្រើនថា «កម្មវិធីចូលស្ដីដណ្ដឹងក្មួយស្រីកញ្ញា ជួបជុំគ្នាថតរូបសប្បាយរីករាយ »។ ហ្វេសប៊ុកបញ្ជាក់យ៉ាងច្បាស់នេះពិតជាពិធីស្តីដណ្តឹងឱក សុគន្ធកញ្ញា ពិតប្រាកដមែននៅពេលមានការចោទសួរពីទស្សនិកជន ។
កោះសន្តិភាពមិនអាចស្វែងរកការបញ្ជាក់ណាមួយពីឱក សុគន្ធកញ្ញា បានទេ ខណៈពេលដែលម្តាយរបស់នាងក៏មិនឆ្លើយតប នៅពេលសាកសួរតាមសារអេឡិចត្រូនិក ។
កញ្ញាឱក សុគន្ធកញ្ញា និងលោកអ៊ឹង សុខលី ប្អូនប្រុសថៅកែផលិតកម្មហង្សមាស ដែលជាអគ្គនាយករងទូរទស្សន៍ហង្សមាស និងជាអ្នកគ្រប់គ្រងផលិតកម្មហង្សមាស បានប្រកាសជាគូស្នេហ៍គ្នានៅរយៈពេលចុងក្រោយនេះ ។ បើនោះជាពិធីស្តីដណ្តឹងមែន គឺជាលទ្ធផលបន្ទាប់ពីអ្នកទាំងពីរសាងស្នេហ៍ដោយបិទបាំងអស់រយៈពេលជាយូរឆ្នាំណាស់មកហើយ ។ មានមតិមហាជនលើកឡើងថា ពិធីស្តីដណ្តឹងឬឡើងគេហដ្ឋាន បើម្ចាស់ខ្លួនព្យាយាមលាក់បាំង ជារឿងរបស់ឱក សុគន្ធកញ្ញា ទៅចុះ ៕
ចែករំលែកព័តមាននេះ