ខេត្តស្វាយរៀង ៖ បុរសជនជាតិម៉ាឡេស៊ីម្នាក់ ត្រូវបានគេប្រទះឃើញស្លាប់នៅក្នុងថ្លុកឈាម កាលពីវេលាម៉ោង២និង៣២នាទីរំលងអធ្រាត្រឈានចូលថ្ងៃទី១៨ ខែមិថុនា នៅបន្ទប់ទឹកផ្សាររាត្រី ជាប់ភោជនីយដ្ឋានស៊ីឡាយ ស្ថិតក្នុងភូមិបាវិតកណ្ដាល សង្កាត់បាវិត ក្រុងបាវិត ។
បើតាមនគរបាលក្រុងបាវិត បានឲ្យដឹងថា នេះជាករណីឃាតកម្មដែលជនសង្ស័យបានវាយសម្លាប់ជនរងគ្រោះឈ្មោះ ខាសេន ស៊ិនគាសេង អាយុ៦៣ឆ្នាំ កាន់លិខិតឆ្លងដែនលេខ K-36579669 មានស្រុកកំណើតនៅក្រុងសារ៉ាវ៉ក ប្រទេសម៉ាឡេស៊ី ។ បើតាមសមត្ថកិច្ច គឺជនរងគ្រោះបានឆ្លងចូលមកកម្ពុជាតាមច្រកទ្វារអន្តរជាតិបាវិត កាលពីថ្ងៃទី២ ខែមិថុនា ។
ចំពោះករណីនេះ ក្រោយពីទទួលបានព័ត៌មានថាមានមនុស្សស្លាប់នៅបន្ទប់ទឹកផ្សាររាត្រី ក្រុងបាវិតភ្លាម សមត្ថកិច្ចជំនាញ និងគ្រូពេទ្យបានទៅដល់និងពិនិត្យសពឃើញថា មានដាច់សាច់ក្បាលខាងក្រោយ និងភ្នែកខាងឆ្វេងជាំ។ក្រោយពីពិនិត្យរួច សមត្ថកិច្ចនិងគ្រូពេទ្យសន្និដ្ឋានថា ជាករណីឃាតកម្មពិតប្រាកដមែន។
សមត្ថកិច្ចនឹងធ្វើការស្រាវជ្រាវរកមូលហេតុនាំឲ្យកើតមានអំពើឃាតកម្មនេះ និងស្រាវជ្រាវតាមរកចាប់ជនល្មើសយកមកផ្តន្ទាទោសតាមច្បាប់ ។ សពត្រូវបានសមត្ថកិច្ចយកទៅតម្កល់ទុកនៅវត្តពោធិ៍ថ្មី ហៅវត្តបាវិត រង់ចាំក្រុមគ្រួសារមកទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ