រាជធានីភ្នំពេញ ៖ ការរៀបចំការងារបច្ចេកទេសនានា ដើម្បីឈានទៅបើកការដ្ឋានសាងសង់អគារពាណិជ្ជកម្មភ្លោះរបស់ក្រុមហ៊ុនថៃ ប៊ុនរ៉ុង បាននិងកំពុងសម្រុកឲ្យបានមុនកាលកំណត់ ។ នេះបើតាមលោកសាស្ត្រាចារ្យ ទួស សាភឿន…
រាជធានីភ្នំពេញ ៖ ការរៀបចំការងារបច្ចេកទេសនានា ដើម្បីឈានទៅបើកការដ្ឋានសាងសង់អគារពាណិជ្ជកម្មភ្លោះរបស់ក្រុមហ៊ុនថៃ ប៊ុនរ៉ុង បាននិងកំពុងសម្រុកឲ្យបានមុនកាលកំណត់ ។ នេះបើតាមលោកសាស្ត្រាចារ្យ ទួស សាភឿន មន្ត្រីជាន់ខ្ពស់នៃក្រសួងដែនដី និងជាស្ថាបត្យករដែលចូលរួមគូរប្លង់អគារដ៏ខ្ពស់លំដាប់ពិភពលោកមួយនេះ ។
លោកបានមានប្រសាសន៍កាលពីថ្ងៃទី១៧ មិថុនា កន្លងមកថា ការសាងសង់ជញ្ជាំងបុកគ្រឹះទប់ដី គ្រោងចំណាយពេល១៦ខែ ប៉ុន្តែក្រុមហ៊ុននឹងពន្លឿនឲ្យបានចប់មុនកាលកំណត់ ស្របពេលការរៀបចំឧបករណ៍គ្រឿងចក្រពីប្រទេសចិន នឹងមកដល់នៅពេលឆាប់ៗខាងមុខនេះ ។
លោក ទួស សាភឿន បានបន្តថា ៖«យើងកំពុងរៀបចំការិយាល័យសម្រាប់ការងារបច្ចេកទេស ។ ជាមួយនេះ យើងក៏បានសិក្សាការដ្ឋាន និងទីតាំងត្រូវសាងសង់អគារនេះចប់រួចរាល់ផងដែរ » ។ យ៉ាងនេះក្ដី លោកមិនបានបញ្ជាក់ឲ្យដឹងពីពេលវេលានៃការបើកការដ្ឋានសាងសង់អគារនេះថា នឹងចាប់ផ្ដើមនៅពេលណានៅឡើយទេ ។
លោកសាស្ត្រាចារ្យបានឲ្យដឹងទៀតថា តាមគម្រោង អគារនេះនឹងសាងសង់កម្ពស់៥៦១ម៉ែត្រ និងមានអង់តែនកម្ពស់២៨ម៉ែត្របន្ថែមទៀត ដែលធ្វើឲ្យអគារនេះក្លាយជាអគារពាណិជ្ជកម្មភ្លោះកប់ពពកខ្ពស់ជាងគេក្នុងតំបន់អាស៊ាន និងពិភពលោក ព្រោះរហូតមកទល់ពេលនេះ បណ្តាប្រទេសនានាបានសាងសង់អគារខ្ពស់កប់ពពក មានលក្ខណៈជាអគារទោលប៉ុណ្ណោះ ។
លោកអះអាងថា តាមការសិក្សាជាថ្មី ការចំណាយសាងសង់អគារនេះ នឹងកើនទឹកប្រាក់ជាង៣ពាន់លានដុល្លារអាមេរិក និងថវិកាប្រមាណ៣ពាន់លានដុល្លារទៀត នឹងត្រៀមសម្រាប់ជួយធ្វើឲ្យអគារលំដាប់ពិភពលោកនេះដំណើរការដោយរស់រវើក បន្ទាប់ពីសាងសង់ចប់ និងដាក់ឲ្យដំណើរការ ។
ក្រុមហ៊ុនថៃ ប៊ុនរ៉ុង បានចាប់ដៃគ្នាជាមួយក្រុមហ៊ុន Sun Kian Ip Group របស់ប្រទេសចិន ដើម្បីសាងសង់អគារនេះ ដែលមានទីតាំងនៅអតីតសួនកម្សាន្ដឌ្រីមលែន ទល់មុខសណ្ឋាគារ និងកាស៊ីណូណាហ្គាវើល ។
នាយិកាប្រចាំប្រទេសនៃក្រុមហ៊ុនCBRE Cambodia អ្នកនាង អាន សុធីតា បានថ្លែងថា ការសាងសង់អគារដ៏ធំនេះជារឿងល្អមួយ ប៉ុន្តែបើគិតពីទំហំសេដ្ឋកិច្ច និងពាណិជ្ជកម្មកម្ពុជានាពេលបច្ចុប្បន្ននេះ ទំហំមជ្ឈមណ្ឌលពាណិជ្ជកម្មនេះ វាហាក់ធំពេក ប៉ុន្តែបើគិតពីការរីកចម្រើននៃសេដ្ឋកិច្ច និងទំហំពាណិជ្ជកម្មកម្ពុជាសម្រាប់រយៈពេល៥ទៅ១០ឆ្នាំខាងមុខ ទំហំអគារនេះមិនធំនោះទេ ។
អ្នកនាងបន្តថា ៖« វាជាមោទនភាពសម្រាប់កម្ពុជា បើសិនជាអគារនេះសាងសង់បានដោយជោគជ័យ » ។
លោកស្រី តាំង ហួរ អគ្គនាយិកាក្រុមហ៊ុនAMATAK Property Service ក៏បានឲ្យដឹងផងដែរថា គម្រោងនេះនឹងក្លាយជានិមិត្តរូបដ៏អស្ចារ្យ និងលើកកម្ពស់មុខមាត់កម្ពុជានៅលើឆាកអន្តរជាតិ នៅពេលសាងសង់ចប់ ។ លោកស្រីថា ៖« អគារនេះ យើងមិនបារម្ភថា វាធំពេកឬយ៉ាងណាឡើយ ព្រោះយើងត្រូវគិតឲ្យធំ ទើបមានលទ្ធផលធំ បើយើងគិតតូច មិនមានលទ្ធផលធំនោះទេ » ៕
ចែករំលែកព័តមាននេះ