រាជធានីភ្នំពេញ ៖ ស្ត្រីអ្នកទោសម្នាក់ បានត្រូវនគរបាលខណ្ឌច្បារអំពៅចាប់ឃាត់ខ្លួន កាលពីវេលាម៉ោង១១ព្រឹកថ្ងៃទី១៨ មិថុនា បន្ទាប់ពីស្ត្រីរូបនេះបានរត់គេចខ្លួនពីសំណាញ់ច្បាប់ កំឡុងពេលដែលអនុរក្សពន្ធនាគារព្រៃសបញ្ជូនទៅសម្រាលកូន នៅមជ្ឈមណ្ឌលជាតិគាំពារមាតានិងទារក ក្នុងខណ្ឌដូនពេញ…
រាជធានីភ្នំពេញ ៖ ស្ត្រីអ្នកទោសម្នាក់ បានត្រូវនគរបាលខណ្ឌច្បារអំពៅចាប់ឃាត់ខ្លួន កាលពីវេលាម៉ោង១១ព្រឹកថ្ងៃទី១៨ មិថុនា បន្ទាប់ពីស្ត្រីរូបនេះបានរត់គេចខ្លួនពីសំណាញ់ច្បាប់ កំឡុងពេលដែលអនុរក្សពន្ធនាគារព្រៃសបញ្ជូនទៅសម្រាលកូន នៅមជ្ឈមណ្ឌលជាតិគាំពារមាតានិងទារក ក្នុងខណ្ឌដូនពេញ កាលពីចុងឆ្នាំ២០១៧កន្លងមក ។ ការឃាត់ខ្លួននេះ ធ្វើឡើងនៅភូមិដើមចាន់សង្កាត់ច្បារអំពៅទី២ ខណ្ឌច្បារអំពៅ ខណៈស្ត្រីរូបនេះកំពុងដើរតាមផ្លូវ ។ ស្ត្រីអ្នកទោសខាងលើឈ្មោះ ជា សុខធី អាយុ២៧ឆ្នាំ ស្នាក់នៅក្នុងភូមិ- សង្កាត់ខាងលើ ។
លោក ម៉ៅ សឿត អធិការស្តីទីនគរបាលខណ្ឌច្បារអំពៅឱ្យដឹងថា ការឃាត់ខ្លួនស្ត្រីរូបនេះ ធ្វើឡើងតាមដីកាបង្គាប់ឱ្យចាប់ខ្លួនលេខ០០១ អ.យ.ក ចុះថ្ងៃទី១០ ខែមេសា ឆ្នាំ២០១៨ ចេញដោយលោក គុជ គីមឡុង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ពីបទអំពើអូសទាញពេស្យាចារកុមារ ប្រព្រឹត្តនៅចំណុចអាផាតមេនឌីអឹម ផ្លូវលេខ៤៧០ សង្កាត់ទួលទំពូងទី២ ខណ្ឌចំការមន កាលពីដើមឆ្នាំ២០១៧ ។ ក្រោយពីត្រូវឃាត់ខ្លួន ជនសង្ស័យត្រូវបានឃំុខ្លួនបណ្តេាះអាសន្ន នៅអធិការដ្ឋាននគរបាលខណ្ឌច្បារអំពៅ ដើម្បីបញ្ជូនបន្តទៅសាលាដំបូងទៀត ។
គួររំលឹកថា ស្ត្រីឈ្មោះ ជា សុខធី បានលួចរត់គេចខ្លួនបាត់ស្រមោល កាលពីថ្ងៃទី១៨ វិច្ឆិកា ឆ្នាំ២០១៧ វេលាម៉ោង២រំលងអធ្រាត្រ បន្ទាប់ពីរូបនាងត្រូវបានអនុរក្សពន្ធនាគារព្រៃ.ស បញ្ជូនទៅសម្រាលកូននៅមជ្ឈមណ្ឌលជាតិគាំពារមាតា និងទារកស្ថិតក្នុងខណ្ឌដូនពេញ ។ ពេលនោះ ឆ្លៀតឱកាសដែលអនុរក្សពន្ធនាគារកំពុងលង់លក់ក្នុងដំណេក ស្រាប់តែនាងរត់គេចខ្លួនចេញតាមបង្អួចទៅបាត់តែម្តង ដោយបន្សល់ទុកទារិកាជាកូន ដែលទើបនឹងកើតឱ្យរស់នៅឯកោក្នុងមន្ទីរពេទ្យ ។ រហូតមកដល់បច្ចុប្បន្នក៏មិនដឹងថា ទារិការូបនេះ ត្រូវបានអ្នកណាយកទៅចិញ្ចឹមនោះឡើយ ៕
ចែករំលែកព័តមាននេះ