រាជធានីភ្នំពេញ ៖ កុដិមួយខ្នងសាងសង់ពីឈើលើ ថ្មក្រោម ទុស្សេខ្សែភ្លើងនៅកន្លែងបាយសីអាសនៈគ្រូរបស់ព្រះសង្ឃបង្កជាអណ្តាតភ្លើងឆាបឆេះយ៉ាងសន្ធោសន្ធៅនៅក្នុងវត្តលង្កា ផ្អើលព្រះសង្ឃទាំងកណ្តាល រាត្រីនេះបានកើតឡើងកាលពីវេលាម៉ោង១និង២០នាទីរំលងអធ្រាត្រឈានចូលថ្ងៃទី២០ ខែមិថុនា នៅក្នុងវត្តលង្កា កុដិលេខ៤…
រាជធានីភ្នំពេញ ៖ កុដិមួយខ្នងសាងសង់ពីឈើលើ ថ្មក្រោម ទុស្សេខ្សែភ្លើងនៅកន្លែងបាយសីអាសនៈគ្រូរបស់ព្រះសង្ឃបង្កជាអណ្តាតភ្លើងឆាបឆេះយ៉ាងសន្ធោសន្ធៅនៅក្នុងវត្តលង្កា ផ្អើលព្រះសង្ឃទាំងកណ្តាល
រាត្រីនេះបានកើតឡើងកាលពីវេលាម៉ោង១និង២០នាទីរំលងអធ្រាត្រឈានចូលថ្ងៃទី២០ ខែមិថុនា នៅក្នុងវត្តលង្កា កុដិលេខ៤ ភូមិ៥ សង្កាត់បឹងកេងកង១ ខណ្ឌចំការមន។
ប្រភពព័ត៌មានពីកន្លែងកើតហេតុបានប្រាប់អោយដឹងថា កុដិដែលឆេះនោះ គឺជាអតីតកុដិរបស់ព្រះតេជគុណ ឈុំ ណារិទ្ធ ព្រះជន្ម៣៤ព្រះវស្សា ហើយបច្ចុប្បន្នបានសឹកជាគ្រហស្ត ដែលពុទ្ធបរិស័ទ និងញាតិញោមហៅលោកថា លោកបង នេន រឺក៏លោកបង វណ្ណ ជាលោកគ្រូល្បីខាងទស្សន៍ទាយ និងស្រោចទឹកលើករាសី ល្បីឈ្មោះនៅក្នុងវត្តផងដែរ ។
ប្រភពដដែលបានបន្តទៀតថា នៅក្នុងកុដិនោះមានទ្រព្យសម្បត្តិមានតម្លៃ នឹងបច្ច័យច្រើន ហើយមុនពេលកើតហេតុ នៅជាន់ខាងលើគឺមានព្រះសង្ឃជាម្ចាស់កុដិម្នាក់ និងកូនសិស្សលោក៤នាក់ ហើយនៅជាន់ខាងក្រោមមានយាយជីស្នាក់នៅបីទៅបួននាក់ដែរ និងមានម៉ូតូបួនគ្រឿង និងរថយន្តមួយគ្រឿង ត្រូវបានអគ្គីភ័យឆាបឆេះម៉ូតូអស់ចំនួន៣គ្រឿង ចំណែករថយន្តមួយគ្រឿង និងម៉ូតូមួយគ្រឿងទៀត បានយកចេញទាន់ ។
អគ្គីភ័យខាងលើនេះមិនបានបង្កអោយនរណាម្នាក់រងរបួសឡើយ គ្រាន់តែឆេះរបស់របរនៅក្នុងកុដិនោះ មានកន្ទេលជ័រ វាំងននក្រណាត់ច្រើន ហើយកុដិខាងលើជាប្រភេទកុដិឈើផងនោះ ទើបបង្កអោយងាយឆាបឆេះរាលដាលលឿនពេញក្នុងកុដិ។ នៅក្នុងហេតុការណ៍នេះមានរថយន្តពន្លត់អគ្គីភ័យមកជួយអន្តរា
គមន៏ពន្លត់ស្ទើរតែគ្រប់អង្គភាព ដោយប្រើប្រាស់រថយន្តពន្លត់អគ្គីភ័យ ខាងការិយាល័យពន្លត់អគ្គីភ័យស្នងការរាជធានីភ្នំពេញអស់ចំនួន១០គ្រឿង ទើបរលត់ជាស្ថាពរ។
ក្រោយកើតហេតុ កុដិដែលឆាបឆេះខាងលើ ត្រូវបានអគ្គិភ័យលេបត្របាក់អស់ទាំងស្រុង និងឆេះខូចខាតទ្រព្យសម្បត្តិអស់ស្ទើរទាំងស្រុង តែមិនបានឆាបឆេះរាលដាលដល់កុដិដែលនៅជិតគ្នានោះទេ ។ ចំពោះមូលហេតុដែលបណ្តាលឲ្យឆេះ សមត្ថកិច្ចសន្និដ្ឋានជំហានដំបូងឲ្យដឹងថា បង្កមកពីទុស្សេខ្សែភ្លើងនៅកន្លែងបាយសីអាសនៈគ្រូរបស់ព្រះសង្ឃនៅក្នុងកុដិលេខ៤នេះ ៕
ចែករំលែកព័តមាននេះ