ខេត្តបាត់ដំបង ៖ គណៈកម្មការត្រួតពិនិត្យផែនការហ្វឹកហ្វឺនត្រៀមព្យុះហយាត្រា អបអរសាទររំលឹកថ្ងៃកំណើតគម្រប់លើកទី៣០ របស់អង្គភាពយោធភូមិភាគទី៥ បានចាប់ផ្តើមប្រមូលផ្តុំហ្វឹកហាត់លើកទី២ ក្នុងថ្ងៃទី១៩ ខែមិថុនា ឆ្នាំ២០១៨ នៅទីបញ្ជាការយោធភូមិភាគទី៥។ ការហ្វឹកហ្វឺនរបស់កងកម្លាំងមានចំនួន២.០៧៦នាក់ បែងចែកជា៣៣ផែន ដោយមានផែនថ្មើរជើង ចំនួន១៣ផែន ផែនឈរ១៣ផែន និងផ្នែកគ្រឿងចក្រ ចំនួន៧ផែន ចំណុះឲ្យយោធភូមិភាគទី៥ ដែលមានកម្លាំងកំពុងហ្វឹកហ្វឺនទាំងអស់នេះ គឺមកពីតំបន់សឹករងបាត់ដំបង ពោធិសាត់ ប៉ៃលិន បន្ទាយមានជ័យ និងកងរាជអាវុធហត្ថ កងកម្លាំងនគរបាល កងពលតូចថ្មើរជើងលេខ៥១-៥២ និង៥៣ ព្រមទាំងកងការពារព្រំដែនទាំងអស់ ទាំងផ្នែករថពាសដែក កងកាំភ្លើងធំ កងការពារអាកាស កងវិស្វកម្ម អង្គភាពអភិវឌ្ឍន៍ វរស៊ើបការណ៍ អង្គភាពមន្ទីពេទ្យយោធា ដែលទាំងអស់នេះចំណុះឲ្យយោធភូមិភាគទី៥ បានមកចូលរួមបានហ្វឹកហ្វឺន លំហាត់របៀបក្នុងយុទ្ធដំណើរទ័ព ក្រោមអធិបតីភាពលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥។ដោយមានការជួយសម្រួលពីលោកឧត្តមសេនីយ៍ទោ អួន សារឿន មេបញ្ជាការរងកងទ័ពជើងគោក ទទួលបន្ទុកបច្ចេកទេសហ្វឹកហ្វឺនកងទ័ពជើងគោក និងលោកឧត្តមសេនីយ៍ទោ ឯក សំអូន មេបញ្ជាការរង នាយសេនាធិការយោធភូមិភាគទី៥ ដែលជាមេបញ្ជាការកងកម្លាំងព្យុះហយាត្រា។ លោកវរសេនីយ៍ឯក គឹម រដ្ឋមុន្នី នាយការិយាល័យហ្វឹកហ្វឺនយោធភូមិភាគទី៥ បានរាយការណ៍ថា ក្នុងការហ្វឹកហាត់លើក ទី១បានធ្វើកាលពីថ្ងៃទី១៣ ខែមិថុនា ឆ្នាំ២០១៨ គឺជាការត្រួតពិនិត្យមើលរកភាពត្រឹមត្រូវ តាមក្បួនយុទ្ធសាស្ត្ររបស់កងទ័ព ដែលមានគ្រូបង្វឹកជាយោធាចារ្យចំនួន៧៤នាក់ ជួយជម្រុញរៀបចំហើយយើងបានទទួលលទ្ធផលល្អដូចថ្ងៃនេះ។ លោកឧត្តមសេនីយ៍ទោ អួន សារឿន មេបញ្ជាការរង នាយកហ្វឹកហ្វឺនកងទ័ពជើងគោក បានគាំទ្ររាល់សកម្មភាពនៃការហ្វឹកហ្វឺន ហាត់របៀបនេះពិតជាអាចទទួលយកបាន ព្រោះត្រឹមត្រូវតាមក្បួនយុទ្ធសាស្ត្រយោធា ហើយរាល់ការកែសម្រួលបន្ថែមទៀតគឺសុំធ្វើទៅតាមរបស់លទ្ធភាពរបស់យោធភូមិភាគទី៥ចុះ។ ព្រោះកន្លងមកយោធភូមិភាគទី៥ គឺជាអង្គភាពគំរូល្អលើសគេ ក្នុងការអនុវត្តន៍កាតព្វកិច្ចយោធា បានយ៉ាងល្អប្រសើរលើទូទាំងយោធភូមិភាគដទៃៗទៀតក្នុងព្រះរាជាណាចក្រកម្ពុជា។ លោកឧត្តមសេនីយ៍ឯក ប៊ុន សេង បានបញ្ជាក់ថា ប្រវត្តិនៃកំណើតកងទ័ព បានកើតឡើងតាំងពីថ្ងៃទី១៩ ខែមិថុនា ឆ្នាំ១៩៥១ លុះដល់ឆ្នាំ២០០០ គឺជាកងទ័ពរបស់រដ្ឋកម្ពុជា ហើយថ្ងៃទី២៨ ខែមិថុនា ឆ្នាំ១៩៨៨ បានកើតឡើងអង្គភាពយោធភូមិភាគទី៥ ឈរជើងនៅតំបន់នេះ ហើយអង្គភាពយើងមានប្រវត្តិក្នុងការ ដឹកនាំ តស៊ូក្នុងភ្នក់ភ្លើងសង្គ្រាមរាប់សិបឆ្នាំមកហើយ អ្នកដែលមានគុណក្នុងកិច្ចការនេះ មានខ្លះពលី ពិការ និងសព្វថ្ងៃមានមួយចំនួនកំពុងត្រៀមចូលនិវត្តតាមវ័យជាបណ្តើរៗហើយ។ យើងក៏មិនដែលបានធ្វើពិធីអ្វីដើម្បីជាការរំលឹកប្រវត្តិដើម និងទីតាំងដែលយើងបានកកើតមកដល់ថ្ងៃនេះ នៅមិនទាន់បាត់បង់ទៅណាចោលយើងឡើយ។ ដូច្នោះសូមទាំងអស់គ្នារួមគ្នាធ្វើបន្តទៅទៀត ដើម្បីឲ្យអង្គភាពកងកម្លាំងប្រដាប់អាវុធយើងកាន់តែមានភាពរឹងមាំ ប្រកបដោយគុណភាពបន្ថែមទៀត ដើម្បីបន្តថែរក្សាសុខសន្តិភាព និងការអភិវឌ្ឍរបស់ប្រទេសយើងឲ្យមានជារៀងរហូត។លោកឧត្តមសេនីយ៍ឯកបានបន្តទៀតថា ការខិតខំនេះគឺជាការរំលឹកដឹងគុណអតីតយុទ្ធ ដែលពលី ពិការ និងនិវត្តជន កាលពីសម័យមានសង្គ្រាម បានរំលឹកជាប្រវត្តិសាស្ត្រសម្រាប់ទឹកដីតំបន់នេះជាតំបន់ក្តៅ ផ្នែកសង្គ្រាមពីអតីតកាលយូរលង់ណាស់មកហើយ ដោយសារអនុវត្តន៍តាមគោលនយោបាយឈ្នះ ឈ្នះ របស់សម្តេចតេជោ ហ៊ុន សែនជានាយករដ្ឋមន្ត្រី បានដឹកនាំបង្រួបបង្រួមជាតិពីគ្រប់ភាគីគណបក្ស នយោបាយ ត្រីភាគីតាមព្រំដែនកន្លងមកនោះគឺ យើងទទួលបានសុខសន្តិភាពពិតប្រាកដ តាំងពីឆ្នាំ១៩៩៨មកម្លេះ។ តែកំណើតអង្គភាពយោធភូមិភាគទី៥ គឺជាចំណែកមូលដ្ឋានដ៏សំខាន់ មួយនៅជួរមុខ នៃការស្វែងរក និងរក្សាបានសុខសន្តិភាពដោយទទួលយកបានតាមនយោបានឈ្នះ ឈ្នះទាំងអស់គ្នា បានមករួបរួមគ្នារក្សា និងកសាងប្រទេសយើងបន្តទៅទៀត៕
ចែករំលែកព័តមាននេះ