ខេត្តបន្ទាយមានជ័យ ៖ បុរសម្នាក់រត់ចោលម៉ូតូដោយមិនដឹងពីមូលហេតុ ក្រោយពីអ្នកម៉ូតូឌុបម្នាក់និយាយថា ម៉ូតូដែលបុរសនោះជិះដូចម៉ូតូរបស់បងប្អួនគាត់ ដែលហេតុការណ៍នេះ បានបង្កការភ្ញាក់ផ្អើលនៅយប់ថ្ងៃទី១៧ មិថុនា ស្ថិតនៅម្តុំផ្លូវបំបែកជា៤ ជិតខារ៉ាអូខេអេបផ្លាស់ ក្នុងភូមិក្បាលស្ពាន០២ សង្កាត់ប៉ោយប៉ែត ក្រុងប៉ោយប៉ែត ។
ម៉ូតូដែលជនសង្ស័យរត់ចោលនេះ គឺសង់125 ពណ៌ខ្មៅ ស៊េរីឆ្នាំ2012 មានពាក់ស្លាកលេខបន្ទាយមាន
ជ័យ 1F-2191។ បើតាមប្រជាការពារភូមិម្នាក់បានប្រាប់ដែរថា កាលពីម៉ោងជិត១០យប់ថ្ងៃទី១៧ មិថុនា ជនសង្ស័យមិនស្គាល់អត្តសញ្ញាណម្នាក់ បានបើកម៉ូតូខាងលើ ពីទិសខាងកើត ។ លុះមកដល់ចំណុចផ្លូវបំបែកជាបួន (កន្លែងកើតហេតុ) ក៏ឈប់សួរអ្នកម៉ូតូឌុបដែលអង្គុយលើម៉ូតូចាំរកម៉ូយថា «បងថ្មើរនេះម៉ោងប៉ុន្មានហើយ?»។ ប្រភពបន្តថា អ្នកម៉ូតូឌុបក៏តបថា «ម៉ោងជាង៩ហើយ» បន្ទាប់មកអ្នកម៉ូតូឌុបក៏និយាយទៀតថា «យី ម៉ូតូនេះដូចជារបស់បងប្អូនខ្ញុំ»។ ស្រាប់តែជនសង្ស័យនេះ បានរត់ចោលម៉ូតូភ្លាមៗទៅទិសខាងកើតយ៉ាងលឿន។
ពិតជាគួរឱ្យសង្ស័យណាស់ ព្រោះគិតថា បើមិនពាក់ព័ន្ធនិងរឿងអ្វីមួយទេ មិនគួរជននេះរត់ចោលម៉ូតូដូច្នេះឡើយ ។ បច្ចុប្បន្ន ម៉ូតូខាងលើត្រូវបានអាជ្ញាធរ និងប្រជាការពារភូមិយកទៅប្រគល់ឱ្យនគរបាល នៅរសៀលថ្ងៃ១៩ មិថុនា នេះ ដើម្បីរក្សាទុកប្រកាសរកម្ចាស់ ។
នាយប៉ុស្តិ៍រដ្ឋបាលនគរបាលសង្កាត់ប៉ោយប៉ែត លោកអុឹម សុភារៈ បានប្រាប់តាមទូរស័ព្ទថា ករណីខាងលើពិតជាកើតមានមែន ហើយមកទល់ម៉ោងនេះ មិនទាន់រកឃើញម្ចាស់នៅឡើយ ។ លោកក៏បានធ្វើការអំពាវនាវថា «បើបងប្អូនណាបានបាត់ម៉ូតូ ដូចមានស្លាកលេខខាងលើ សូមយកឯកសារពាក់ព័ន្ធទៅប៉ុស្តិរដ្ឋបាលរបស់លោក» ។
ចែករំលែកព័តមាននេះ