ខេត្តប៉ៃលិន ៖ គេសង្កេតឃើញហាង និងភោជនីយដ្ឋានមួយចំនួននៅក្នុងក្រុងប៉ៃលិន ជាពិសេសហាងបាយ ដែលស្ថិតនៅក្បែរវត្ត និងជើងភ្នំយ៉ាត ក្នុងភូមិវត្ត សង្កាត់ប៉ៃលិន ក្រុងប៉ៃលិន ចាប់តាំងពីថ្ងៃទី១៥-១៨ ខែមិថុនា ឆ្នាំ២០១៨នេះ មានភ្ញៀវចូលទិញអាហារពេញៗ ទាំងព្រឹកទាំងល្ងាចតែម្តង ។ ការដែលមានភ្ញៀវទេសចរច្រើនបែបនេះ ដោយសារតែនៅក្នុងវត្តរតនសោភ័ណ ហៅវត្តកោងកាង ព្រះសង្ឃបានរៀបចំកម្មវិធីធ្វើបុណ្យរួមគ្នាមួយ ។
ប្រភពព័ត៌មានពីដូនជីចំណាស់ម្នាក់ ឈ្មោះ ឡុង ស្រី អាយុ៦០ឆ្នាំ មកពីខេត្តកំពង់ស្ពឺ បានរៀបរាប់ឱ្យដឹងថា ពួកគាត់បានរៃអង្គាសលុយគ្នា ជួលរថយន្តជាច្រើនគ្រឿង ដើម្បីមកធ្វើបុណ្យរួមគ្នានៅក្នុងខេត្តប៉ៃលិន អស់រយ:ពេល៣ថ្ងៃកន្លងមកហើយ ដោយមកពីបណ្តាខេត្តនានាផ្សេងៗជាច្រើនទៀត ដូចជាខេត្តបាត់ដំបង ខេត្តពោធិ៍សាត់ ខេត្តកំពង់ឆ្នាំង ខេត្តបន្ទាយមានជ័យ ខេត្តកំពង់ធំ និងខេត្តសៀមរាបជាដើម ។
គាត់បន្តទៀតថា ការនាំគ្នាមកធ្វើបុណ្យរយ:ពេល៣ថ្ងៃនេះ នាំឱ្យពួកគាត់មានការសប្បាយរីករាយក្នុងចិត្តយ៉ាងខ្លាំង ដោយមានរថយន្តរាប់រយគ្រឿងឯណោះ ហើយនៅពេលយប់នាំគ្នាបោះតង់ដេកសម្រាកនៅតាមបរិវេណវត្តភ្នំយ៉ាត វត្តកោងកាង និងវត្តពោធិមារាម ហៅវត្តប៉ាហ៊ីជាងដើម ។ គាត់បញ្ជាក់ថា រហូតដល់ព្រឹកថ្ងៃទី១៨ ខែមិថុនា នេះ មានអ្នកខ្លះគេត្រឡប់ទៅផ្ទះវិញ ប៉ុន្តែអ្នកខ្លះទៀតនៅបន្តធ្វើបុណ្យមួយថ្ងៃ ពីរថ្ងៃទៀត ទើបត្រឡប់ទៅស្រុកកំណើតវិញ ។
នេះជាលើកទី១ហើយដែលពួកគាត់សប្បាយចិត្តក្នុងការធ្វើបុណ្យរួមគ្នា ។ ពួកគាត់មិនត្រឹមតែទិញចង្ហាន់ប្រគេនព្រះសង្ឃប៉ុណ្ណោះទេ ថែមទាំងនាំគ្នាឈរដង្ហែជាជួររៀបចំបច្ច័យប្រគេនដល់ព្រះសង្ឃរាប់រយអង្គ ។ ម្យ៉ា ងវិញទៀត ការមកស្នាក់នៅក្នុងខេត្តប៉ៃលិន ធ្វើបុណ្យនេះ គឺចំណាយថវិការៀងៗខ្លួន ទាំងថ្លៃធ្វើដំណើរ ទាំងថ្លៃហូបអាហារ។ គាត់ក៏បានសង្កេតឃើញថា ហាងលក់បាយគ្រប់ទីកន្លែងនៅក្នុងក្រុងប៉ៃលិន ជាពិសេសក្បែរវត្តកោងកាង ដែលជាកន្លែងធ្វើបុណ្យតែម្តង ។
ចំណែកម្ចាស់ហាងបាយមួយមានយីហោ «តាជា» ដែលនៅខាងមុខវត្តរតនាសោភ័ណបានឱ្យដឹងថា រយ:ពេល៣ថ្ងៃកន្លងទៅនេះ ម្ចាស់ភោជនីយដ្ឋានម្នាក់ៗ ដាំបាយស្ទើរតែមិនទាន់ ពោលគឺរវល់តាំងពីព្រឹករហូតដល់យប់ នៅតែមានភ្ញៀវចូលមកទិញទទួលទាន ។ ប្រភពបន្តទៀតថា ភ្ញៀវដ៏ច្រើនដែលពុំធ្លាប់មានពីមុនមកនេះ ភាគច្រើនគឺដូនជីចាស់ៗ ដែលមកពីតាមបណ្តាខេត្តនានា ខណ:ពួកគាត់មកធ្វើបុណ្យនៅក្នុងខេត្តប៉ៃលិន នាំគ្នាទិញបាយហូបទាំងព្រឹកនិងល្ងាច ។
មិនត្រឹមតែហាងលក់បាយនោះឡើយ សូម្បីតែផ្លែឈើដូចជា ធុរេន សាវម៉ាវ និងផ្លែតាង៉ែន ហៅមៀនប៉ៃលិនជាដើម ទោះបីជាពីមុនតាង៉ែន១គីឡូក្រាម តម្លៃត្រឹមតែ៣០០០ទៅ៤០០០រៀល ហើយពេលនេះឡើងថ្លៃ រហូតដល់១គីឡូក្រាម១៣០០០ទៅ១៥០០០រៀល ក៏ពួកគាត់នាំគ្នាសម្រុកទិញទទួលទាន និងទិញយកទៅផ្ញើកូនចៅនៅឯស្រុកផងដែរ ។ ដូច្នេះ ការដែលរួមគ្នាធ្វើបុណ្យនៅកន្លែងណាមួយ មិនត្រឹមតែបានបុណ្យដល់អ្នកដែលសាងប៉ុណ្ណោះទេ សូម្បីតែអ្នកដែលប្រកបរបររកស៊ីក៏ទទួលបានផលចំណូលសម្រាប់ផ្គត់ផ្គង់ជីវភាពក្រុមគ្រួសារថែមទៀតដែរ ។
គេក៏សង្កេតឃើញអ្នកលក់ត្បូងដែលច្នៃរួចរាល់គ្រប់ប្រភេទ ក៏មានភ្ញៀវចូលទិញយកទៅប្រើប្រាស់លំអរាងកាយ ដោយលក់ដាច់ជាហូរហែគួរឱ្យកត់សម្គាល់ផងដែរ ៕
ចែករំលែកព័តមាននេះ