សហរដ្ឋអាមេរិក និងកូរ៉េខាងត្បូង ៖ ខណៈការចរចាមានការរីកចម្រើនជាមួយកូរ៉េខាងជើង បណ្ដាមន្ត្រីរបស់ប្រទេសទាំង២បានឲ្យដឹងនាថ្ងៃទី១៩ មិថុនានេះថា កូរ៉េខាងត្បូងនិងសហរដ្ឋអាមេរិកបានសម្រេចផ្អាកសមយុទ្ធយោធារួម ULCHI FREEDOM GUARDIAN ហៅកាត់ថា UFG ដែលគ្រោងធ្វើនាខែសីហាខាងមុខនេះ។
ក្រោយការជួបគ្នាកំពូលនៅសិង្ហបុរីជាមួយមេដឹកនាំកូរ៉េខាងជើង លោកគីម ជុងអ៊ុន ប្រធានាធិបតីអាមេរិក លោកដូណាល់ ត្រាំ បានលាតត្រដាងផែនការរបស់លោក បញ្ឈប់ល្បែងសង្គ្រាមបង្កហេតុនានា ព្រមទាំងចំណាយខ្ពស់ជាមួយកូរ៉េខាងត្បូងដែលក្រុងព្យុងយ៉ាងចាត់ទុកថា ជាការរៀបចំការលុកលុយប្រឆាំងខ្លួន។
ក្នុងសេចក្ដីប្រកាសមួយបញ្ជូនដល់ក្រុមអ្នកកាសែត ក្រសួងការពារប្រទេសកូរ៉េខាងត្បូងបានគូសបញ្ជាក់ថា ក្រោយកិច្ចសហការគ្នាយ៉ាងជិតស្និទ្ធ កូរ៉េខាងត្បូង និងសហរដ្ឋអាមេរិក បានសម្រេចផ្អាករាល់សកម្មភាពដែលបានគ្រោងសម្រាប់សមយុទ្ធយោធារួម UFG ជាសមយុទ្ធការពារគ្រោងធ្វើនាខែសីហា។ ហើយកូរ៉េខាងត្បូង និងសហរដ្ឋអាមេរិក គ្រោងបន្តការពិភាក្សាគ្នាពីវិធានការបន្ថែមនានា។ ក្រសួងនេះក៏និយាយផងដែរថា ពុំទាន់មានការសម្រេចចិត្តណាមួយត្រូវបានធ្វើទាក់ទិននឹងសមយុទ្ធឯទៀតៗរបស់សម្ព័ន្ធមិត្តនៅឡើយ។ ចំណែកក្រសួងការពារប្រទេសអាមេរិកក៏ប្រកាសពីការផ្អាកសមយុទ្ធយោធានេះដែរ។
ក្នុងសេចក្ដីប្រកាសមួយ អ្នកនាំពាក្យមន្ទីរប៉ង់តាហ្គោន លោកស្រី DANA WHITE ថ្លែងថា យោងទៅតាមការសន្យារបស់ប្រធានាធិបតីលោកដូណាល់ ត្រាំ ហើយជាមួយកិច្ចសហការរបស់កូរ៉េខាងត្បូង កងទ័ពអាមេរិក ផ្អាករាល់ផែនការសម្រាប់សមយុទ្ធយោធារួមខែសីហា។ ចំណែកសេតវិមានថ្លែងថា សមយុទ្ធយោធារួមត្រូវផ្អាក ប្រសិនបើកូរ៉េខាងជើងគោរពការសន្យារំសាយនុយក្លេអ៊ែរ។ រីឯរដ្ឋមន្ត្រីការបរទេសកូរ៉េខាងត្បូង លោកស្រី KANG KYUNG WHA ក្នុងសន្និសីទសារព័ត៌មានមួយអះអាងនាថ្ងៃទី១៨មិថុនាថា កូរ៉េខាងត្បូងចង់ឲ្យទទួលបានសេចក្ដីប្រកាសមួយស្ដីពីការបញ្ចប់សង្គ្រាមកូរ៉េ ក្នុងដំណាច់ឆ្នាំនេះ ទោះបីកាលបរិច្ឆេទ និងទម្រង់ពិតប្រាកដនៃសេចក្ដីប្រកាសនោះនៅមិនទាន់កំណត់ក្ដី។
ប្រធានាធិបតីកូរ៉េខាងត្បូងលោក MOON JAE IN និងមេដឹកនាំកំពូលកូរ៉េខាងជើងលោកគីម ជុងអ៊ុន បានព្រមព្រៀងគ្នាផ្លាស់ប្ដូរយុទ្ធសន្តិភាពបច្ចុប្បន្ន ឲ្យទៅជាសន្ធិសញ្ញាសន្តិភាពមួយនាដំណាច់ឆ្នាំ២០១៨នេះ ក្រោយការជួបគ្នាកំពូលអន្តរកូរ៉េជាប្រវត្តិសាស្ត្រលើកទី៣កាលពីថ្ងៃទី២៧មេសា។ លោកគីម ជុងអ៊ុន និងលោកត្រាំ បានព្រមព្រៀងគ្នា បង្កើតរបបសន្តិភាពស្ថិតស្ថេរមួយនៅឧបទ្វីបកូរ៉េ ហើយបង្កើតទំនាក់ទំនងទ្វេភាគីថ្មីៗ ពេលជួបគ្នាកំពូលដំបូងរបស់អ្នកទាំង២ នៅសិង្ហបុរីកាលពីថ្ងៃទី១២ មិថុនានោះ។ រីឯលោកស្រី KANG KYUNG WHA ថ្លែងថា កូរ៉េខាងត្បូងរួមសហការយ៉ាងជិតស្និទ្ធជាមួយអាមេរិក សំដៅឲ្យមានសេចក្ដីប្រកាសពីការបញ្ចប់សង្គ្រាម។ លោកស្រីបន្តថា ចិនអាចដើរតួនាទីសំខាន់បំផុតមួយ ក្នុងការបង្កើតរបបសន្តិភាពមួយនៅឧបទ្វីបកូរ៉េ៕
ចែករំលែកព័តមាននេះ