ខេត្តប៉ៃលិន ៖ បើតាមការរៀបរាប់ពីកសិករដែលមានជំនាញ និងបទពិសោធន៍ក្នុងការដាំដុះដំណាំទុរេន បានឲ្យដឹងថា នៅឆ្នាំ២០១៨នេះ ទិន្នផលហាក់ធ្លាក់ចុះជាងឆ្នាំមុនៗ ដោយសារតែភ្លៀងធ្លាក់ជោកជាំរាល់ថ្ងៃពេកបណ្ដាលឲ្យជ្រុះផ្កាអស់មួយចំនួន ។
លោក ផាន់ រក្សា ដែលបានដាំទុរេនប្រមាណជាង៧០០ដើមនៅភូមិខ្លុង សង្កាត់អូរតាវ៉ៅ ក្រុងប៉ៃលិន បានឱ្យដឹងថា នៅឆ្នាំ២០១៨នេះ ទុរេនរបស់លោកហាក់ទទួលបានផលតិចជាងឆ្នាំមុនៗ ដោយសារឆ្នាំនេះភ្លៀងធ្លាក់រាល់ថ្ងៃ ពិសេសចំពេលដែលទុរេនចាប់ផ្ដើមចេញផ្កា បណ្ដាលឲ្យរោយផ្កាអស់មួយចំនួន ។
កសិកររូបនេះបានបន្ដថា លោកបានរៀនពីបច្ចេកទេសដាំទុរេននៅប្រទេសថៃ និងម៉ាឡេស៊ី អស់រយៈពេលជាច្រើនឆ្នាំ ហើយបានមកចាប់ផ្តើមដាំដុះនៅលើដីរបស់ខ្លួនក្នុងខេត្តប៉ៃលិនជាបន្ដបន្ទាប់ ដែលគិតមកដល់ពេលនេះ លោកបានដាំទុរេនចំនួនប្រមាណជាង៧០០ដើម ហើយក៏បានប្រមូលផលជារៀងរាល់ឆ្នាំចំនួនជាង២៥០ដើមដែរ ។ លោកបញ្ជាក់ថា ក្នុងចំនួនជាង២៥០ដើមនេះ ទទួលបានផលប្រមាណជាង២៥ទៅ៣០តោន ហើយទុរេននេះ គឺប្រើជីធម្មជាតិដែលធ្វើដោយខ្លួនឯង និងបង្កាត់ពូជដោយខ្លួនឯងទៀត ។
លោក ផាន់ រក្សា បន្ដថា ទុរេនដែលលោកដាំនេះ គឺបាននាំពូជចូលពីប្រទេសថៃ និងម៉ាឡេស៊ី ដោយយកមកបង្កាត់ពូជចូលគ្នា ដើម្បីឱ្យក្លាយទៅជាពូជទុរេនថ្មីមួយទៀត ដែលមានរសជាតិផ្អែមឈ្ងុយឆ្ងាញ់ ហើយស្អិតល្អ ។ មិនត្រឹមតែប៉ុណ្ណោះ បន្ទាប់ពីចេះរបៀបថែទាំ និងចេះការពារព្យាបាលដំណាំមួយនេះ លោកក៏បានម៉ៅដំណាំទុរេននៅខេត្តបាត់ដំបងរាប់រយដើមសម្រាប់បេះលក់ឲ្យអតិថិជនក្នុង និងក្រៅខេត្ត ។ ចំណែកសម្បកទុរេនដែលគេបោះចោល លោកអាចយកមកផលិតជាជីសម្រាប់ដាក់ដំណាំពេលនៅតូចៗ ដើម្បីឱ្យលូតលាស់បានល្អ ។
លោកថា ៖« ផ្លែទុរេនរបស់ខ្ញុំលក់រាយក្នុង១គីឡូក្រាមតម្លៃជាង២២.០០០ទៅ២៣.០០០រៀល តែបើលក់ដុំ តម្លៃទាបជាងនេះបន្តិច ដោយមានអតិថិជនមកពីខេត្តប៉ៃលិន និងតាមបណ្តាខេត្តនានាដូចជា បាត់ដំបង ពោធិ៍សាត់ រហូតដល់រាជធានីភ្នំពេញផងដែរ ដោយសារតែចម្ការដំណាំទុរេនរបស់ខ្ញុំស្ថិតនៅក្បែរផ្លូវទៅទឹកធ្លាក់ភ្នំខៀវ ដែលមានភ្ញៀវទេសចរចេញចូលទៅមក ទិញយកទៅហូបជួបជុំគ្រួសារ និងមានអ្នកទិញយកទៅចែកចាយបងប្អូន ព្រមទាំងលក់បន្តថែមទៀតផងដែរ » ។
បច្ចុប្បន្ន លោក ផាន់ រក្សា មិនត្រឹមតែជាអ្នកជំនាញដាំទុរេនប៉ុណ្ណោះទេ ថែមទាំងបានបើកថ្នាក់បង្រៀនពីរបៀបដាំ និងរបៀបថែទាំដំណាំនេះនៅផ្ទះរបស់ខ្លួនផងដែរ ចាប់តាំងពីចូលរៀនរហូតដល់ចេះ តម្លៃត្រឹមតែ៧០០ដុល្លារប៉ុណ្ណោះ ហើយក៏មានការបង្ហាត់តាមអនឡាញទៀតផង ៕
ចែករំលែកព័តមាននេះ