ខេត្តកំពង់ស្ពឺ ៖ បុរសមិនស្គាល់អត្តសញ្ញាណម្នាក់ត្រូវបានប្រទះឃើញដេកស្លាប់ទាំងអាក្រាតកាយនៅចិញ្ចើមផ្លូវបង្កឱ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហេតុការណ៍នេះកើតឡើងកាលពីម៉ោង៥និង៣០នាទីជិតភ្លឺថ្ងៃទី១៩ មិថុនា ២០១៨ នៅតាមបណ្តោយផ្លូវជាតិលេខ៤ ចន្លោះគីឡូម៉ែត្រ៤០ និង៤១ ស្ថិតក្នុងភូមិរំលោង ឃុំវល្លិ៍ស ស្រុកសំរោងទង ។
បើតាមសមត្ថកិច្ចបានឱ្យដឹងថា ជនរងគ្រោះខាងលើមិនបានត្រូវបានស្គាល់អត្តសញ្ញាណនោះទេ ព្រោះទំនងជាអ្នកក្រៅតំបន់ ហើយនៅលើខ្លួនសពមានស្នាមចាក់សាក់ជាច្រើនកន្លែង ។
បើតាមអ្នកនៅជិតកន្លែងកើតហេតុបានប្រាប់ថា កាលពីមួយអាទិតមុន គេឃើញមនុស្សមួយក្រុមដឹកជនរងគ្រោះតាមរថយន្តមិនស្គាល់ម៉ាកមកទម្លាក់ចោលនៅទីនេះ ហើយក៏ចេញបាត់ទៅ ចាប់តាំងពីពេលនោះមកជនរងគ្រោះក៏ចេះតែដើរនៅតំបន់ខាងលើរើសរបស់របរគេចោលយកមកហូប ហើយដោះសម្លៀកបំពាក់ចោលទៀតផង តែជនរងគ្រោះមិនដែលបង្កការលំបាកដល់អ្នករស់នៅទីនោះឬធ្វើឱ្យគេខ្លាចឡើយ។ ដោយឃើញដូច្នេះអ្នកនៅក្បែរនោះក៏ចាប់ស្លៀកពាក់ឱ្យតែចុងក្រោយគាត់ដោះចោលដដែល ទើបម្នាក់ៗយល់ថា គាត់គឺជាមនុស្សវិកលចរិត ឬបែកថ្នាំ ទើបត្រូវយកមកប្លុងចោលបែបនេះ។ ហើយមុនកើតហេតុគេឮសំឡេងបុកយ៉ាងខ្លាំងតែមិនស្មានថា រថយន្តបុកជនរងគ្រោះនោះទេ រហូតដល់ភ្លឺចេញទៅរកមើលស្រាប់តែឃើញជនរងគ្រោះមានស្នាមបុកបែកក្បាលស្លាប់បាត់ទៅហើយ។
អ្នកភូមិបន្តទៀតថា ពេលនោះសពមានសភាពអាក្រាតកាយ ទើបបុរសម្នាក់កាច់ស្លឹកឈើគ្របពីលើតែម្តងទៅគ្មានអ្នកណាដឹងថា រថយន្តប្រភេទអីដែលបុកជនរងគ្រោះទេ រហូតដល់ព្រឹកថ្ងៃដដែលទើបរាយការណ៍ឱ្យសមត្ថកិច្ចចចុះទៅពិនិត្យសព និងធ្វើកំណត់ហេតុ ហើយហៅរថយន្តរបស់មន្ទីរពេទ្យខេត្តដឹកយកទៅបូជានៅវត្តសំបួរ នាក្រុងច្បារមនតែម្តង។
សមត្ថកិច្ចក៏អំពាវនាវដល់អ្នកដែលបាត់សមាជិកដែលមានស្នាមសាក់ពេញខ្លួន និងសតិមិនប្រក្រតី សូមទាក់ទងមកសមត្ថកិច្ចនគរបាលខេត្ត ដើម្បីទទួលយកធាតុទៅធ្វើបុណ្យផងចុះ ព្រោះសពត្រូវសមត្ថកិច្ចសម្រេចថា បូជានៅព្រឹកនេះហើយ។
ចែករំលែកព័តមាននេះ