ខេត្តកំពង់ស្ពឺ ៖ គ្រោះថ្នាក់ចរាចរណ៍មួយបានកើតឡើងរវាងឡានបែន និងកុងតឺន័រ បណ្តាលឲ្យតៃកុងឡានបែនរងរបួសធ្ងន់ត្រួវបានបញ្ជូនទៅសង្គ្រោះភ្លាមៗផងដែរ ចំណែកអ្នកបើកបរឡានកុងតឺន័រឃើញសភាពដូច្នោះបានរត់គេចខ្លួនបាត់បន្សល់ តែវត្ថុតាងនៅកន្លែងកើតហេតុ ។ គ្រោះថ្នាក់ចរាចរណ៍នេះកើតឡើងកាលពីវេលាម៉ោង១៨និង៥០នាទីថ្ងៃទី១៨ មិថុនា ២០១៨ នៅលើផ្លូវជាតិលេខ៤ ចន្លោះគីឡូមែត្រលេខ៧១-៧២ ត្រង់ចំណុចភូមិក្រាំងភ្នៅ ឃុំ អូរ ស្រុកភ្នំស្រួច ខេត្តកំពង់ស្ពឺ ។
តៃកុងឡានបែនត្រូវបានស្គាល់មានឈ្មោះ ថិល ចាន់ធី ភេទប្រុស អាយុ១៩ឆ្នាំ រស់នៅភូមិដីឆ្នាំង ឃុំហោមសំណុំ ស្រុកឱរ៉ាល់ ខេត្តកំពង់ស្ពឺ ចំណែកភាគីកុងតឺន័រមិនត្រូវបានស្គាល់អត្ត សញ្ញាណនោះទេ ។
តាមការបង្ហើបរបស់សមត្ថកិច្ចដែលចុះធ្វើកំណត់ហេតុ និងសាកសួរសាក្សីបានឲ្យដឹងថា មុនពេលកើតហេតុមានរថយន្តមួយគ្រឿងម៉ាកហ៊ីយ៉ាន់ដាយ ពណ៌សឆ្នូតក្រហម គ្មានស្លាកលេខ បើកបរមកពីទិសខាងកើតទៅទិសខាងលិច (បើកបរដោយឈ្មោះ ថិល ចាន់ធី ភេទប្រុស អាយុ១៩ឆ្នាំ) ពេលមកដល់ចំណុចខាងលើបានរេចង្គូតមកខាងឆ្វេងដៃ ហើយបានបុកជាមួយ និងរថយន្តមួយគ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 4A- 4270 ដែលកំពុងបើកបរបញ្ច្រាសទិសគ្នា បណ្ដាលឲ្យឈ្មោះ ថិល ចាន់ធី រងរបួសធ្ងន់ ចំណែកអ្នកបើកបរកុងតឺន័រមិនត្រូវបានស្គាល់អត្តសញ្ញាណ ក្រោយពេលកើតហេតុបានចុះរត់គេចខ្លួនបាត់ បន្សល់តែរថយន្តនៅកន្លែងកើតហេតុ ។ បន្ទាប់ពីធ្វើកំណត់ហេតុវាស់វែង និងបញ្ជូនអ្នករងរបួសទៅកាន់មន្ទីរពេទ្យសមត្ថកិច្ចបាននាំរថយន្តទាំងពីរ គ្រឿងយកមករក្សាទុកនៅអធិការដ្ឋាននគរបាលស្រុកភ្នំស្រួច ដើម្បីចាត់ការតាមនិតិវិធី ។
ដោយឡែកនៅស្រុកថ្ពងនាថ្ងៃទី១៨ ខែមិថុនា ឆ្នាំ២០១៨ វេលាម៉ោង១៩និង៣០នាទីមានករណីគ្រោះថ្នាក់ចរាចរណ៍នៅលើផ្លូវជាតិលេខ៤៤ ចន្លោះគីឡូម៉ែត្រ៧៨-៧៩ ស្ថិតក្នុងភូមិអូរអង្គុំ ឃុំអមលាំង ស្រុកថ្ពង ខេត្តកំពង់ស្ពឺ រវាងរថយន្ត និងគោយន្ដកន្ដ្រៃដឹកឈើដែលបើកបរ បញ្ច្រាសទិសបណ្តាលឲ្យគោយន្តក្រឡាប់តែសំណាងល្អមិនមានអ្នករងគ្រោះដល់អាយុជីវិតមនុស្សឡើយ ។
សមត្ថកិច្ចនគរបាលស្រុកឱរ៉ាល់បានឲ្យដឹងថា គ្រោះថ្នាក់នេះបង្កឡើងដោយរថយន្ត ពណ៌ទឹកមាស ពាក់ស្លាកលេខកំពង់ស្ពឺ 2A- 5021 បើកបរដោយឈ្មោះ សូ សុខន ភេទប្រុស អាយុ៣៦ ឆ្នាំ នៅភូមិគោគ ឃុំសង្កែសាទប ស្រុកឱរ៉ាល ខេត្តកំពង់ស្ពឺបានបើកពីកើតទៅលិចលុះមកដល់ចំណុចកើកហេតុខាងលើរថយន្តបានបែកកង់ ហើយបានរេចង្កូតទៅបុកគោយន្តដឹកឈើ ដែលកំពុងបើកពីលិចទៅកើត តែអ្នកបើកមិនស្គាល់ឈ្មោះ (រត់គេចខ្លួន) បណ្ដាលឲ្យរថយន្តខូចខាតមួយកំណាត់មុខទាំងស្រុង។ រីឯវត្ថុតាងទាំងអស់សមត្ថកិច្ចជំនាញបានយកមករក្សាទុកនៅអធិការដ្ឋាននគរបាលស្រុកថ្ពង ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ