ខេត្តបន្ទាយមានជ័យ ៖ នគរបាលការិយាល័យជំនាញផែនព្រហ្មទណ្ឌនៅថ្ងៃទី១៨ ខែមិថុនា ឆ្នាំ២០១៨ បានបង្ហាញមុខសញ្ញាជនសង្ស័យជាឃាតករម្នាក់ទៀតហើយក្នុងចំណោមបក្សពួក៦នាក់ក្នុងអំពើឃាតកម្មវាយសម្លាប់ជាងកាត់សក់ប្លន់យកម៉ូតូ កាលពីយប់ថ្ងៃទី២៥ ខែឧសភា ឆ្នាំ២០១៨កន្លងទៅនេះ ស្ថិតនៅខាងក្រោយវិទ្យាល័យខ្លាកូន ចម្ងាយ៧០០ម៉ែត្រ ចំណុចជើងភ្នំខ្លាកូន ភូមិខ្លាកូនថ្មី សង្កាត់កំពង់ស្វាយក្រុងសិរីសោភ័ណ ខេត្តបន្ទាយមានជ័យ ។
ជនសង្ស័យមានឈ្មោះ ផាត សុគន្ធ ភេទប្រុស អាយុ២៧ឆ្នាំ ស្នាក់នៅបណ្តោះអាសន្នស៊ីឈ្នួលធ្វើស្រែចម្ការឱ្យគេនៅខេត្តបន្ទាយមានជ័យដែលមានស្រុកកំណើតនៅភូមិឈូកមាស ឃុំកូនក្រៀល ក្រុងសំរោង ខេត្តឧត្តរមានជ័យ ។ ជនសង្ស័យត្រូវបាននគរបាលក្រុងសិរីសោភ័ណសហការជាមួយកម្លាំងនគរបាលការិយាល័យជំនាញព្រហ្មទណ្ឌនៃស្នងការដ្ឋាននគរបាលខេត្តបន្ទាយមានជ័យថ្ងៃទី១៥ ខែមិថុនា ឆ្នាំ២០១៨ នៅក្នុងបរិវេណសួនមានជ័យ ស្ថិតក្នុងខេត្តបន្ទាយមានជ័យ បន្ទាប់ពីគេរត់គេចខ្លួនមួយរយៈហើយបានវិលត្រឡប់មកវិញ ។
លោកឧត្តមសេនីយ៍ត្រី សិទ្ធិ ឡោះ ស្នងការរងទទួលផែនព្រហ្មទណ្ឌបានប្រាប់ឱ្យដឹងថា សមត្ថកិច្ចចាប់ខ្លួនជនសង្ស័យឈ្មោះ ផាត សុគន្ធ ប្រើប្រាស់នូវវិធានការសរុបមធ្យោបាយសរុប និងធ្វើការស្រាវជ្រាវស៊ើបអង្កេតអស់រយៈពេល១៦ថ្ងៃ ទើបឃាត់ខ្លួនបានសម្រេច ។
បន្ទាប់ពីកម្លាំងនគរបាលបានចាប់ខ្លួនជនសង្ស័យបក្ខពួកជាឃាតករ២នាក់រួចមកហើយកាលពីថ្ងៃទី២ ខែមិថុនា ឆ្នាំ២០១៨ នៅក្រុងសិរីសោភ័ណដែលមានទី១-ឈ្មោះ លុញ សុគា ហៅខ្មៅ ភេទប្រុស អាយុ២២ឆ្នាំ ទី២- ឈ្មោះ ស៊ុន ស៊ុះ ហៅក្តាមប្រៃ ភេទប្រុស អាយុ៣៧ឆ្នាំ ហើយជនត្រូវចោទ២នាក់ត្រូវបានតុលាការបញ្ជាដាក់ឃុំខ្លួនបណ្តោះអាសន្ននៅពន្ធនាគាររួចហើយផងដែរ ។
លោកស្នងការរងបានបញ្ជាក់ឱ្យដឹងទៀតថា សំណុំរឿងអំពើឃាតកម្មគិតទុកជាមុន គឺមុនដំបូងសមត្ថកិច្ចស្រាវជ្រាវថា មានជនសង្ស័យតែ៤នាក់ប៉ុណ្ណោះជាអ្នកប្រព្រឹត្ត ។ ប៉ុន្តែក្រោយចាប់ខ្លួនជនសង្ស័យឈ្មោះ ផាត សុគន្ធ បានឆ្លើយសារភាពថា បក្ខពួកគេ៦នាក់ នៅសល់៣នាក់ទៀតមិនទាន់ចាប់ខ្លួន ។ ការអនុវត្តកិច្ចការងារបានសម្រេចជាបន្តបន្ទាប់ក្នុងសំណុំរឿងអំពើឃាតកម្មគិតទុកជាមុន ដោយមានបទបញ្ជាយ៉ាងម៉ឺងម៉ាត់របស់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ និងមានការសម្របសម្រួលពីលោកមាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យទើបកម្លាំងនគរបាលអនុវត្តកិច្ចការងារនេះទទួលបានលទ្ធផលជាបន្តបន្ទាប់ ។
លោកឧត្តមសេនីយ៍ត្រី សិទ្ធិ ឡោះ បញ្ជាក់ឱ្យដឹងទៀថា ជនសង្ស័យឈ្មោះ ផាត សុគន្ធ ជាអ្នកយកដុំថ្មវាយសម្លាប់ជនរងគ្រោះជាមួយបក្ខពួករបស់ខ្លួន ហើយរូបគេបានយកម៉ូតូជនរងគ្រោះដែលមានពួកម៉ាកឈ្មោះធី យកទៅបញ្ចាំនៅចំណុចផ្លូវលេខ៣ ក្រុងសិរីសោភ័ណ ហើយពួកម៉ាកឈ្មោះ ធី ឱ្យប្រាក់មករូបគេចំនួន១០០ដុល្លារ រួចហើយបានរត់គេចខ្លួនទៅខេត្តឧត្តរមានជ័យ ។
សូមរំលឹកថា កាលថ្ងៃទី២៨ ខែឧសភា ឆ្នាំ២០១៨ នៅចំណុចខាងក្រោយវិទ្យាល័យខ្លាកូន ជើងភ្នំខ្លាកូន ភូមិខ្លាកូនថ្មី ក្រុងសិរីសោភ័ណ សពបុរសម្នាក់ឈ្មោះ ភឿន សុមឿន ភេទប្រុស អាយុ៣៨ឆ្នាំ រស់នៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ ត្រូវបានគេប្រទះឃើញស្លាប់ក្នុងសភាពហើមស្អុយដោយអំពើវាយសម្លាប់ប្លន់យកម៉ូតូ ។ រវាងជនរងគ្រោះ និងជនសង្ស័យស្គាល់គ្នា ហើយទៅជក់ថ្នាំញៀនផឹកស្រានិងរួមភេទប្រុសដូចគ្នានៅទីនោះ ។
អំពើឃាតកម្មនោះសមត្ថកិច្ចស្រាវជ្រាវជាបន្តបន្ទាប់បង្ក្រាបចាប់ខ្លួនជនសង្ស័យ៣នាក់មកហើយ ។ ចំណែកបក្ខពួកនៅសេសសល់៣នាក់ សមត្ថកិច្ចកំពុងបន្តតាមស្វែងរកចាប់ខ្លួនយកមកផ្តន្ទាទោសតាមផ្លូវច្បាប់បន្ថែមទៀត ៕
ចែករំលែកព័តមាននេះ