ខេត្តកំពង់ចាម ៖ រថយន្តមួយគ្រឿងពាក់ស្លាកលេខកំពង់ចាម 3A-3145 ដឹកគ្រាប់ពោតពេញចំណុះជាង៣០តោនបានជួបនឹងហេតុការណ៍របូតដាច់កន្ទុយរ៉ឺម៉កខាងក្រោយ ត្រង់ផ្លូវបំបែកជាបួនផ្ទះតាហ៊ូវ សិ្ថតនៅភូមិទី៤ សង្កាត់វាលវង់ ក្រុងកំពង់ចាម ។ ហេតុការណ៍នោះកើតឡើងនៅវេលាម៉ោង៦និង៣០នាទីល្ងាចថ្ងៃទី១៨ មិថុនា ២០១៨ ចាត់ទុកជាសំណាងដោយមិនមានពលរដ្ឋណាម្នាក់រងរបួសនោះទេ គ្រាន់តែធ្វើឲ្យពោតបានកំពប់ជ្រុះរាយលើផ្លូវ លុះដល់ជិតភ្លឺទើបប្រមូលពោតអស់ ។
លោកវរសេនីយ៍ត្រី ស៊ាម យូសេង អធិការរងនគរបាលទទួលផែនសណ្តាប់ធ្នាប់នៃអធិការដ្ឋាននគរ
បាលក្រុងកំពង់ចាមប្រាប់ឲ្យដឹងថា រថយន្តនេះបើកបរដោយឈ្មោះ ហួត ជា ភេទប្រុស អាយុ៤៥ឆ្នាំ
នៅភូមិត្រពាំងក្រសាំង ឃុំត្រពាំងព្រះ ស្រុកព្រៃឈរ ដឹកគ្រាប់ពោតចេញពីប្រទេសវៀតណាមក្នុងគោ
លបំណងយកទៅកាន់ខេត្តប៉ៃលិន ជាប់ព្រំដែនប្រទេសថៃ ។
លោកអធិការរងនគរបាលទទួលផែនសណ្តាប់ធ្នាប់ប្រាប់បន្តថា ក្នុងពេលដែលកើតហេតុនោះពិតជាសំណាងដែលមេឃបានបង្អុរភ្លៀងធ្លាក់មក ហើយមិនសូវមានមនុស្សធ្វើដំណើរឆ្លងកាត់ ទៅវិញទៅមក ក្រោយពីមានហេតុការណ៍នេះកើតឡើងរូបលោកបានដឹកនាំកម្លាំងជំនាញចុះទៅដល់គោលដៅបានជួយសំរួលចរាចរណ៍មិនឲ្យមានភាពកកស្ទះ ។
លោកអធិការនគរបាលក្រុងកំពង់ចាម និងលោកឧត្តមសេនីយ៍ត្រី សោម រស់ ស្នងការរងនគរបាលទទួលផែនសណ្តាប់ធ្នាប់បានចុះមកដល់ និងបានណែនាំឲ្យសមត្ថកិច្ចប្រាប់ទៅម្ចាស់ប្រញាប់រកកម្មករមកកើបពោត និងរថយន្តសាងគ្រាប់ពោត លើកដាក់លើរថយន្តមួយផ្សេងទៀតផងដែរ ។
រហូតមកដល់វេលាម៉ោង៤ទាបភ្លឺ ឈានចូលព្រឹកថ្ងៃទី១៩ មិថុនា ទើបកម្មករលើកគ្រាប់ពោតអស់ ហើយរថយន្តដែលរបូតកន្ទុយសណ្តោងនេះត្រូវបាននាំមករក្សាទុកនៅអធិការដ្ឋាននគរបាលក្រុងកំពង់ចាម ព្រោះតែបង្កឲ្យរងការខូចខាតផ្លូវថ្នល់ជាតិលេខ៧ ៕
ចែករំលែកព័តមាននេះ