រាជធានីភ្នំពេញ ៖ នៅក្នុងជំនួបពិភាក្សាការងារជាមួយសម្តេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃព្រះរាជាណាក្រកម្ពុជា លោក Wei Feng He រដ្ឋមន្ត្រីក្រសួងការពារជាតិនៃសាធារណរដ្ឋប្រជាមានិតចិនបានមានប្រសាសន៍ថា លោកបានមកកាន់ រាជាណាចក្រកម្ពុជា កាលពី៦ឆ្នាំមុន ។ លោកបានមានប្រសាសន៍បន្តថា ដំណើរទស្សន កិច្ចមកកាន់ព្រះរាជាណាចក្រកម្ពុជានាពេលនេះ គឺដើម្បីជំរុញការអនុវត្តរាល់កិច្ចព្រមព្រៀង ទាំងឡាយណាដែលបានចុះហត្ថលេខា រវាងសម្តេចតេជោជាមួយលោកស៊ីហ្សីងពិងកន្លងមក ។
លោកអ៊ាងសុផល្លែតជំនួយការសម្តេចអគ្គមហាសេនាបតីតេជោហ៊ុនសែនបានប្រាប់ឲ្យដឹង នៅក្រោយជំនួបថា លោករដ្ឋមន្ត្រីក្រសួងការពារជាតិបានមានប្រសាសបែបនេះនារសៀលថ្ងៃទី១៨ ខែមិថុនា ឆ្នាំ២០១៨ នៅទីស្តីការនាយករដ្ឋមន្ត្រីវិមានសន្តិភាពក្នុងឱកាសដែល លោកត្រូវបានអនុញ្ញាត ចូលជួបសំដែងការគួរសម និងពិភាក្សាការងារជាមួយ សម្តេចតេជោនាយករដ្ឋមន្ត្រី ខណៈពេលដែលលោកមកបំពេញទស្សនកិច្ចនៅព្រះរាជា ណាចក្រកម្ពុជា ។
លោក Wei បានមានប្រសាសន៍បន្តថា លោកនឹងជំរុញទំនាក់ទំនងរវាងប្រទេសទាំងពីរឲ្យកាន់តែល្អប្រសើរឡើង កាន់តែស៊ីជំរៅឡើង ជាពិសេសរវាងកងទ័ពទាំងពីរ ។ ជាការឆ្លើយតបសម្តេចតេជោបានសំដែងនូវអំណរអរគុណយ៉ាងជ្រាលជ្រៅជូនចំពោះលោក Wei ចំពោះអ្វីដែលលោកបានលើកឡើង និងបានស្វាគមន៍ចំពោះដំណើរទស្សនកិច្ចរបស់ លោកWei ដែលបានមកដើម្បីជំរុញ ការអនុវត្តលើរាល់កិច្ចព្រមព្រៀងដែលបានចុះហត្ថ លេខាហើយ ។
សម្តេចបានមានប្រសាសន៍ថា យើងត្រូវតែបន្តភាពជាដៃគូជំរុញការអនុវត្តលើរាល់អ្វីៗដែលបានចុះហត្ថលេខាហើយ ព្រោះថាទំនាក់ទំនងរវាងប្រទេសយើងទាំងពីរ គឺជាទំនាក់ទំនងដែលនិយាយផងធ្វើផង មិនមែនគ្រាន់តែទំនាក់ទំនងគ្រាន់តែនិយាយនោះទេ។ ពីនោះទៅ ទៀតសម្តេចបានថ្លែងអំណរគុណចំពោះប្រជាជនចិនរដ្ឋាភិបាលចិនដែលកន្លងមកតែង តែជួយកម្ពុជាជំរុញការអភិវឌ្ឍកម្ពុជា និងជួយដល់វិស័យកងទ័ពកម្ពុជា ៕
ចែករំលែកព័តមាននេះ