រាជធានីភ្នំពេញ ៖ លោក យូ ហុកគ្រី អនុប្រធានគណបក្សហ្វុ៊នស៊ិនប៉ិច និងជាអនុប្រធានទី១រដ្ឋសភា បានថ្លែងប្រាប់អ្នកសារព័ត៌មាន កាលពីព្រឹកថ្ងៃទី១៨ មិថុនា ថា ពិធីបុណ្យសពអ្នកម្នាងអ៊ុក ផល្លា ត្រូវបានរៀបចំតាមប្រពៃណី ដោយមានការចូលរួមចំណាយក្នុងពិធីបុណ្យពីព្រះបរមរាជវាំង គណបក្សហ្វ៊ុនស៊ិនប៉ិចព្រមទាំងគណៈកម្មការបុណ្យជាតិ-អន្តរជាតិ ។ លោក យូ ហុកគ្រី បានបញ្ជាក់ថា នៅពេលកើតហេតុដ៏រន្ធត់នោះ លោកក៏បាននៅក្នុងក្បួនរថយន្តផងដែរ ។ លោកថា គណបក្សបានស្នើសុំឱ្យសមត្ថកិច្ចស៊ើបអង្កេតករណីនេះឡើងវិញ បើទោះបីជាអ្នកបើកបររថយន្តម្ខាងទៀតដែលបង្កនោះ ត្រូវបានឃាត់ខ្លួនក៏ដោយ ។
មានការកត់សម្គាល់ថា នៅពេលដែលសពអ្នកម្នាងត្រូវបានដឹកចេញពីមន្ទីរពេទ្យរ៉ូយ៉ាល់រតនៈ ឆ្ពោះមកតម្កល់ធ្វើបុណ្យនៅក្នុងវត្តបទុមវតី សម្តេចក្រុមព្រះដែលរងរបួសធ្ងន់កំពុងទទួលការសង្គ្រោះនៅក្នុងមន្ទីរពេទ្យនោះ ក៏ត្រូវបានបញ្ជូនបន្តទៅសង្គ្រោះ នៅក្រុងបាងកក ប្រទេសថៃ ។ តាមប្រភពព័ត៌មានឱ្យដឹងថា សម្តេចក្រុមព្រះបានរងរបួសធ្ងន់៣កន្លែង គឺបាក់ឆ្អឹងដងកាំបិត បាក់ឆ្អឹងជំនីរ និងបាក់ជើងខាងឆ្វេង ។
មកដល់ពេលនេះស្ថានភាពរបួសរបស់ព្រះអង្គមិនត្រូវបានដឹងឱ្យបានច្បាស់លាស់នោះទេ ។ ការទទួលមរណភាពរបស់អ្នកម្នាង ទំនងជាព្រះអង្គមិនត្រូវបានប្រាប់ឱ្យដឹងទេមើលទៅ ។ លោក យូ ហុកគ្រី អនុប្រធានគណបក្សហ្វុ៊នស៊ិនប៉ិចមានប្រសាសន៍ថា ក្នុងពេលគ្រោះថ្នាក់ចរាចរណ៍នោះ រថយន្តជាព្រះទីនាំងរបស់សម្តេចក្រុមព្រះ និងអ្នកម្នាងបានបើកច្រាសទិសជាមួយរថយន្តបង្ក បានមកបុករថយន្តព្រះអង្គពេញទំហឹង ។ ពេលនោះ អ្នកម្នាងធ្ងន់ធ្ងរជាងសម្តេចក្រុមព្រះ ។ លោកថា ពេលនោះលោកបានព្យាយាមជួយសង្គ្រោះសម្តេចក្រុមព្រះ និងអ្នកម្នាងមុន ។
ផ្អែកទៅលើហេតុការណ៍ដែលបានកើតឡើងគួរឱ្យសោកស្តាយនេះ លោកបានកត់សម្គាល់ថា ការមិនគោរពច្បាប់ចរាចរណ៍របស់អ្នកបើកបរនៅកម្ពុជា បង្កឱ្យមានអ្នកស្លាប់ និងរបួសយ៉ាងច្រើន ។ ទោះជាបែបណា លោកថា «យើងសូមឱ្យសមត្ថកិច្ចស៊ើបអង្កេតចំពោះបញ្ហានេះ» ។ លោក យូ ហុកគ្រី បានបន្តថា ពេលគ្រោះថ្នាក់កើតឡើងមន្ត្រីគណបក្សមិននៅជុំគ្នា ដោយសារបានចុះទៅជួបសកម្មជនតាមខេត្ត ហើយពេលវេលានេះ ក៏មិនសូវល្អសម្រាប់គណបក្សផង ។ មន្ត្រីគណបក្សទើបមកដល់រាជធានី កាលពីយប់ថ្ងៃទី១៧ មិថុនា ។ លោកថា ការយកសពអ្នកម្នាងមកតម្កល់នៅវត្តបទុមវតី ព្រោះតំណាក់សម្តេចក្រុមព្រះតូចចង្អៀតពេកមិនសមស្រប ។ ទីវត្តនេះទូលាយ និងមានភាពងាយស្រួលសម្រាប់ថ្នាក់ដឹកនាំមកកាន់ទីនេះ ។ លោកបានលើកឡើងថា «អ្នកម្នាងចិត្តល្អ រាក់ទាក់ មានចិត្តសប្បុរសច្រើន ចំពោះជនក្រីក្រនិងស្រឡាញ់សិល្បះ» ។
លោកថា គណបក្សបានប្រគល់ករណីនេះដល់តុលាការ ចំពោះជនបង្កតាមច្បាប់ ។ ពេលនេះ ជនបង្កត្រូវបានឃាត់ខ្លួនទាន់ពេលយកទៅឃុំឃាំងហើយដែរ ។ លោកថា គណបក្សមិនបានចូលរួមស៊ើបអង្កេតជាមួយសមត្ថកិច្ចទេ តែគ្រាន់តែបានដាក់ជាចម្ងល់ថា ហេតុអីបានជាក្បួនរថយន្តសម្តេចក្រុមព្រះ ត្រូវគេបុកដល់ទៅ៣ដង ។ លោកបានលើកឡើងថា រថយន្តសម្តេចក្រុមព្រះ ត្រូវបានជួបគ្រោះថ្នាក់ម្តងនៅស្រុកព្រៃឈរ ខេត្តកំពង់ចាម ក្នុងឆ្នាំ២០១៥ គឺឡានមកបុកពីមុខរថយន្តសម្តេចក្រុមព្រះតែម្តង ។ លើកទី២ នៅខេត្តកំពត ឡានដឹកដីបានបើកមកកាត់ក្បួនរបស់គណបក្សហ្វ៊ុនស៊ិនប៉ិចដែរ តែមិនមានគ្រោះថ្នាក់ ហើយលើកនេះ មិនគួរមានគ្រោះថ្នាក់ទេ ព្រោះក្បូនមានឡាន២០គ្រឿង និងមានឡាននាំមុខបើកភ្លើង ។
លោកថា មុនពេលកើតហេតុ រថយន្តបង្កចេញពីកំពតមកភ្នំពេញ ហើយក្បួនរថយន្តសម្តេចក្រុមព្រះចេញពីកំពត ទៅខេត្តព្រះសីហនុវិញ ។ ពេលនោះ ផ្លូវទូលាយទេ គ្មានរថយន្តច្រើនទេ ។ ពេលនោះឡានបង្កមកចូលបុករថយន្តសម្តេចក្រុមព្រះតែម្តង ។ លោកបញ្ជាក់ថា កាលពីឆ្នាំ២០១៥ នៅកំពង់ចាមរថយន្តដឹកដីមកបុកចំពីមុខរថយន្តសម្តេចក្រុមព្រះតែម្តង ។ នៅពេលនេះ ព្រះអង្គដាក់ខ្សែក្រវាត់ការពារ ទើបគ្រាន់តែរងរបួស ហើយអ្នកម្នាងលោកមិនដឹងថា បានដាក់ខ្សែក្រវាត់ឬបែបណាទេ ។
ចែករំលែកព័តមាននេះ