ខេត្តព្រះសីហនុ ៖ ជនសង្ស័យក្នុងករណីបង្កគ្រោះថ្នាក់ចរាចរណ៍បណ្តាលឲ្យមនុស្សស្លាប់ និង របួសកាលពីព្រឹកថ្ងៃទី១៧ មិថុនាម្សិលមិញនេះ ត្រូវបាននគរបាលចរាចរណ៍ខេត្តព្រះសីហនុសម្រេចបញ្ជូនខ្លួនទាំងស្ថានភាពរងរបួសធ្ងន់ទៅកាន់សាលាដំបូងហើយ នារសៀលថ្ងៃ១៨ ខែមិថុនា ឆ្នាំ…
ខេត្តព្រះសីហនុ ៖ ជនសង្ស័យក្នុងករណីបង្កគ្រោះថ្នាក់ចរាចរណ៍បណ្តាលឲ្យមនុស្សស្លាប់ និង របួសកាលពីព្រឹកថ្ងៃទី១៧ មិថុនាម្សិលមិញនេះ ត្រូវបាននគរបាលចរាចរណ៍ខេត្តព្រះសីហនុសម្រេចបញ្ជូនខ្លួនទាំងស្ថានភាពរងរបួសធ្ងន់ទៅកាន់សាលាដំបូងហើយ នារសៀលថ្ងៃ១៨ ខែមិថុនា ឆ្នាំ ២០១៨នេះ បន្ទាប់ពីបានបង្កគ្រោះថ្នាក់ចរាចរណ៍បុកក្បួនរថយន្តសម្តេចក្រុមព្រះនរោត្តមរណឫទ្ធិ ទៅកាន់សាលាដំបូងខេត្តចាត់ការតាមនីតិវិធីហើយ។
លោកឧត្តមសេនីយ៍ត្រី អ៊ី សុខា ស្នងការទទួលផែនសណ្តាប់ធ្នាប់ នៃស្នងការដ្ឋាននគរបាលខេត្តព្រះសីហនុ បានឲ្យដឹងថា ដោយទទួលបានបទបញ្ជាពីឯកឧត្តម ឧត្តមសេនីយ៍ទោជួន ណារិន្ទ ស្នងការនគរបាលខេត្តព្រះសីហនុ នារសៀលថ្ងៃទី១៨ មិថុនា កម្លាំងជំនាញបន្ទាប់ពីធ្វើការស្រាវជ្រាវ យ៉ាងយកចិត្តទុកដាក់លើករណី គ្រោះថ្នាក់ដ៏រន្ធត់នេះរួចមក សមត្ថកិច្ចបានសម្រេចបញ្ជូនខ្លួនជនបង្កគ្រោះថ្នាក់ចរាចរណ៍នេះឈ្មោះ វ៉ុល សារ៉េត អាយុ៣៤ឆ្នាំ មានទីលំនៅភូមិ២ សង្កាត់១ ក្រុងព្រះសីហនុ ទៅកាន់សាលាដំបូង ដើម្បីចាត់ការតាមនីតិវិធី។
លោកឧត្តមសេនីយ៍ត្រី អ៊ី សុខា ស្នងការរងនគរបាលខេត្តព្រះសីហនុ ទទួលផែនសណ្តាប់ធ្នាប់ និងចរាចរណ៍ឲ្យដឹងថា «នេះជានីតិវិធីផ្លូវច្បាប់ ក្រោយសមត្ថកិច្ចរកឃើញថា ជន សង្ស័យ អ្នកបើកបររថយន្តតាក់ស៊ីរូបនេះបានបង្កឲ្យមានគ្រោះថ្នាក់ចរាចរណ៍ទ្រង់ទ្រាយធំមួយ កាលពីព្រឹកថ្ងៃទី១៧ មិថុនា ២០១៨ បណ្តាលឲ្យមានជនរងគ្រោះស្លាប់ និងរងរបួស »។ លោកឧត្តមសេនីយ៍ត្រី បញ្ជាក់បន្ថែមថា ករណីនេះបើទោះជាជនសង្សយ័មានរបួសយ៉ាងណាក៏ដោយក៏នីតិវិធីត្រូវតែធ្វើដែរ តាមរយៈការព្យាបាលផង និងអនុវត្តន៍នីតិវិធីច្បាប់ផង។
លោកបញ្ជាក់ទៀតថា ការសម្រេចចុងក្រោយគឺក្រោយបញ្ជូនទៅដល់សាលាដំបូងខេត្ត ការសម្រេចក្តី គឺស្ថិតនៅលើចៅក្រមជាអ្នកសម្រេចតែប៉ុណ្ណោះ។ គួរបញ្ជាក់ថា គ្រោះថ្នាក់ចរាចរណ៍នោះ បណ្តាលឲ្យមានជនរងគ្រោះម្នាក់ស្លាប់ គឺអ្នកម្នាង អ៊ុក ផល្លា និងមានជនរងគ្រោះ៦នាក់ទៀត ដែលជិះក្នុងរថយន្តទាំងសងខាងរងរបួសធ្ងន់ និងស្រាល ក្នុងនោះរួមមានទាំងសម្តេចក្រុមព្រះ នរោត្តមរណឫទ្ធិផងដែរ ដែលទ្រង់ទទួលរងរបួសធ្ងន់ត្រូវបានបញ្ជូនសង្គ្រោះនៅមន្ទីរពេទ្យប្រទេសថៃ៕
ចែករំលែកព័តមាននេះ