ខេត្តកណ្តាល ៖ អំពើហិង្សាមួយបានកើតឡើង ដែលបង្កដោយភាគីទាំងសងខាង បានមើលមុខឌឺដងដាក់គ្នាក៏ទាស់ពាក្យសម្តី បណ្តាលឲ្យមានកំហឹងវាយគ្នាទៅវិញទៅមក បែរជា អ្នករបួសស្រាលជាប់ខ្នោះ អ្នករបួសធ្ងន់ដេកពេទ្យ ដោយសារអ្នករបួសធ្ងន់វាយនឹងដៃ ហើយអ្នករបួសស្រាលយកកាំបិតទៅចាក់។ ហេតុការណ៍នេះបានកើតឡើងនៅថ្ងៃច័ន្ទ ៥កើត ខែអសាឍ ឆ្នាំច សំរឹទ្ធស័ក ព.ស៥៦៥២ ត្រូវនឹងថ្ងៃទី១៨ ខែមិថុនា ឆ្នាំ២០១៨ វេលាម៉ោង៥ និង៣០នាទីល្ងាច នៅចំណុចភូមិតាខ្មៅ២ សង្កាត់តាខ្មៅ ក្រុងតាខ្មៅ ខេត្តកណ្តាល។
នគរបាលអធិការក្រុងតាខ្មៅ បានឲ្យដឹងថា ជនរងគ្រោះឈ្មោះ វណ្ណ មករា ភេទប្រុស អាយុ២០ឆ្នាំ ទីលំនៅភូមិតាខ្មៅ២ សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរនៅផ្ទះ(រងរបួសត្រង់ខ្នង)។ រីឯជនល្មើសឈ្មោះ ប៊ុន ជាសុវណ្ណារ៉ា ភេទប្រុស អាយុ២១ឆ្នាំ ទីលំនៅភូមិតាខ្មៅ២ សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរបើកបររថយន្ត(ឃាត់ខ្លួន)។ នគរបាលបានបញ្ជាក់ថា កាលពីវេលាកើតហេតុខាងលើ ជនល្មើសបានជិះម៉ូតូចេញពីផឹកស៊ីជាមួយមិត្តភក្តិត្រឡប់មកផ្ទះវិញដល់ផ្លូវចូលផ្ទះ ក៏ជួបនឹងជនរងគ្រោះ ហើយក៏បានសំឡឹងមុខគ្នាទៅវិញទៅមក រួចក៏បានទាក់ពាក្យសម្ដីគ្នា។
បន្ទាប់មកជនរងគ្រោះក៏បានវាយ ជនល្មើសបួនប្រាំដៃ ទើបជនល្មើសខឹងក៏បានទៅយកកូនកាំបិតចុងស្រួចយកមកចាក់ជនល្មើសចំខ្នង ពីក្រោយបណ្តាលឲ្យមានរបួសស្នាមហូរឈាម ហើយក៏បានប្រតាយប្រតប់គ្នាបណ្តាលឲ្យកាំបិតមុតភ្លៅ ជនល្មើសខ្លួនឯងមានរបួសស្នាម។ បន្ទាប់មកជនល្មើសក៏បានបោះកូនកាំបិតចោលរកមិនឃើញ រួចក៏ត្រូវបងប្អូនដឹកយកទៅព្យាបាលនៅមន្ទីរពេទ្យរៀងៗខ្លួន តែជនរងគ្រោះមានរបួសស្នាមធ្ងន់ ត្រូវបានបញ្ជូនទៅមន្ទីរពេទ្យរុស្សីតែម្តង។ ចំណែកឯជនល្មើសរងរបួសស្រាល ក្រោយពីព្យាបាលរបួស ហើយក៏ត្រូវសមត្ថកិច្ចធ្វើការឃាត់ខ្លួនបញ្ជូនមកកាន់អធិការដ្ឋាននគរបាលក្រុងតាខ្មៅ ដើម្បីធ្វើការសាកសួរ និងកសាងសំណុំរឿងតាមនីតិវិធី៕
ចែករំលែកព័តមាននេះ