ខេត្តកំពង់ធំ ៖ មានករណីគ្រោះថ្នាក់ចរាចរណ៍មួយបានកើតឡើង នៅចំណុចផ្លូវកោង៨០ដឺក្រេ ដែលមានទីតាំងនៅតាមបណ្តោយផ្លូវកៅស៊ូ ស្ថិតនៅក្នុងភូមិមហរ៍ ឃុំជ័យ ស្រុកកំពង់ស្វាយ ខេត្តកំពង់ធំ។ សមត្ថកិច្ចបានឲ្យដឹងថា…
ខេត្តកំពង់ធំ ៖ មានករណីគ្រោះថ្នាក់ចរាចរណ៍មួយបានកើតឡើង នៅចំណុចផ្លូវកោង៨០ដឺក្រេ ដែលមានទីតាំងនៅតាមបណ្តោយផ្លូវកៅស៊ូ ស្ថិតនៅក្នុងភូមិមហរ៍ ឃុំជ័យ ស្រុកកំពង់ស្វាយ ខេត្តកំពង់ធំ។ សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ បានធ្វើឲ្យក្មេងស្រី២នាក់ រងរបួសធ្ងន់ ដោយបានបើកម៉ូតូទៅបុកគ្នាជាមួយនឹងរថយន្តដឹកដី កាលពីវេលាម៉ោង១ និង៣០នាទី រសៀល ថ្ងៃទី១៨ ខែមិថុនា ឆ្នាំ២០១៨ ក្នុងទិសដៅបញ្ច្រាសទិសគ្នា។
ជនរងគ្រោះ២នាក់ ជិះម៉ូតូហុងដា សេ១២៥ ពណ៌ខ្មៅ ពាក់ស្លាកលេខ កំពង់ធំ 1K-2272 បើបរដោយឈ្មោះ ហុន ចាន់ធី ភេទស្រី អាយុ២០ឆ្នាំ រស់នៅភូមិស្នួល ឃុំស្រឡៅ ស្រុកបារាយណ៍ ខេត្តកំពង់ធំ និងម្នាក់ទៀតរួមដំណើរឈ្មោះ ឡាច គង្គា ភេទស្រី អាយុ១៨ឆ្នាំ នៅភូមិថ្នល់ ឃុំទ្រៀល ស្រុកបារាយណ៍ អ្នកទាំង២បានរងរបួសធ្ងន់។ បន្ទាប់ពីបានជិះម៉ូតូទៅបុកជាមួយនឹងរថយន្តដឹកដី ពណ៌ស ពាក់ស្លាកលេខ ភ្នំពេញ 3A-1703 បើកបរដោយឈ្មោះ ញឹក ធា ភេទប្រុស អាយុ២៦ឆ្នាំ នៅភូមិជាផល ឃុំមានជ័យ ស្រុកសណ្តាន់ ខេត្តកំពង់ធំ។
បន្ទាប់ពីកើតហេតុគ្រោះថ្នាក់ចរាចរណ៍អ្នកបើកបររថយន្តក៏បានចុះពីលើរត់គេចខ្លួនបាត់ បន្សល់ទុករថយន្តនៅកណ្តាលផ្លូវ ទុកឲ្យសមត្ថកិច្ចនៃធិការដ្ឋាននគនរបាលស្រុកកំពង់ស្វាយ យកទៅរក្សាទុករង់ចាំឲ្យតំណាងភាគីទាំងសងខាងចូលមកដោះស្រាយតាមនីតិវិធី។ សមត្ថកិច្ចនគរបាល នៃធិការដ្ឋាននគរបាលស្រុកកំពង់ស្វាយទទួលផែនចរាចរណ៍បានបញ្ជាក់ថា៖ ករណីគ្រោះថ្នាក់ចរាចរណ៍ រវាងម៉ូតូនឹងរថយន្តដឹកដីខាងលើនេះ គឺបណ្តាលមកពីអ្នកបើកបរម៉ូតូ បើកបរក្នុងល្បឿនលឿន និងមិនប្រកាន់ស្តាំដល់ចំណុចផ្លូវកោង៕
ចែករំលែកព័តមាននេះ