ខេត្តសៀមរាប ៖ នាព្រឹកថ្ងៃទី១៨ មិថុនា ២០១៨នេះ នៅស្នងការដ្ឋាននគរបាលខេត្តសៀមរាប បានរៀបចំកិច្វប្រជុំត្រួតពិនិត្យការងារ និងលើកទិសដៅអនុវត្តបន្តក្នុងកិច្ចប្រតិបត្តិការបង្ការទប់ស្កាត់ និងបង្ក្រាបបទល្មើសរក្សាសន្តិសុខសុវត្ថិភាពសង្គមនៅក្នុងខេត្ត ក្រោមអធិបតីភាព លោកឧត្តមសេនីយ៍ត្រី ទិត្យ ណារ៉ុង ស្នងការនគរបាលខេត្ត។ អញ្ជើញចូលរួមក្នុងអង្គពិធីនោះ លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនការងារព្រហ្មទណ្ឌ អស់លោកឧត្តមសេនីយ៍ លោកវរសេនីយ៍ នាយ នាយរងការិយាល័យជំនាញចំណុះផែនព្រហ្មទណ្ឌ លោកអធិការអធិការរង នគរបាលក្រុងស្រុកទាំង១២ និងតំណាងអង្គភាពពាក់ព័ន្ធជាច្រើនអ្នកទៀតផងដែរ។
គោលបំណងក្នុងកិច្ចប្រជុំនាពេលនោះគឺសំដៅ ធ្វើការត្រួតពិនិត្យទៅលើកិច្ចប្រតិបត្តិការណ៍ជំនាញរបស់កងកម្លាំងដែលបានអនុវត្តកន្លងមក និងលើកទិសដៅបន្តដើម្បីយកទៅអនុវត្តក្នុងការបង្ការទប់ស្កាត់ និងបង្ក្រាបបទល្មើសឲ្យកាន់តែមាន ប្រសិទ្ធិភាពក្នុងកិច្ចការពារថែរក្សានូវសន្តិសុខសុវត្ថិភាព និងសណ្តាប់ធ្នាប់សាធារណៈជូនប្រជាពលរដ្ឋ និងភ្ញៀវទេសចរណ៍ជាតិ និងនិងអន្តរជាតិឲ្យបានកាន់តែល្អប្រសើរថ្វេរឡើងថែមទៀត។ នៅក្នុងអង្គពិធី លោកឧត្តមសេនីយ៍ត្រី ទិត្យ ណារ៉ុង ស្នងការនគរបាលខេត្តបានសម្ដែងនូវការកោតសសើរផងដែរ ចំពោះកម្លាំងទាំងអស់ដែលកន្លងមកបានយកចិត្តទុកដាក់ និងសហការណ៍គ្នាបានយ៉ាងល្អប្រសើរក្នុងកិច្ច ប្រតិបត្តិការ រក្សាសន្តិសុខសុវត្ថិភាព និងសណ្តាប់ធ្នាប់នៅក្នុងខេត្តកន្លងមកនេះ។
លោកឧត្តមសេនីយ៍ស្នងការក៏បានក្រីនរំលឹកដល់កងកម្លាំងបន្ថែមថា៖ សូមឲ្យកម្លាំងយើងទាំងអស់ ត្រូវបន្តសហការណ៍គ្នាឲ្យបានល្អថែមទៀតក្នុងការអនុវត្តភារកិច្ចជំនាញរបស់ខ្លួន និងចាត់វិធានការល្បាតត្រួតពិនិត្យ និងគ្រប់គ្រងនៅរាល់បណ្តាគោលដៅសំខាន់ៗឲ្យបានជាប្រចាំ ដើម្បីបង្ការទប់ស្កាត់នូវរាល់បទល្មើសគ្រប់ប្រភេទ និងបង្ក្រាបឲ្យបានទាន់ពេលវេលា។ ក្នុងនោះត្រូវបន្តស៊ើបអង្កេត និងស្រាវជ្រាវ ព្រមទាំងត្រូវក្តាប់មុខសញ្ញានៅក្នុងភូមិសាស្ត្រដែលខ្លួនគ្រប់គ្រង និងបន្តអនុវត្តដីកាដែលនៅសេសសល់រួមគ្នាបង្ការទប់ស្កាត់ និងបង្ក្រាបបទល្មើសគ្រប់ប្រភេទកុំឲ្យ កើតមានឲ្យស្របទៅនឹងការអនុវត្តនូវគោលនយោបាយភូមិឃុំមានសុវត្ថិភាពដែលយើងទាំអស់គ្នាកំពុងតែអនុវត្តផងដែរ៕
ចែករំលែកព័តមាននេះ