ខេត្ដកំពង់ឆ្នាំង ៖ វត្ដ “នទីគិរីវ័ន្ដ” គឺជាវត្ដថ្មីសន្លាងទើបត្រូវបានរៀបចំកសាងនៅឆ្នាំ២០០៦ ដែលស្ថិតនៅប្រមាណជិត៥០គីឡូម៉ែត្រពីទីរួមខេត្ដកំពង់ឆ្នាំង គឺស្ថិតនៅក្នុងភូមិកោះមមើ ឃុំជៀប ស្រុកទឹកផុស ។ អ្វីដែលគួរឱ្យចាប់អារម្មណ៍នោះ វត្ដនេះបានស្ថិតនៅក្នុងព្រៃដែលបានព័ទ្ធរបងធ្វើបរិវេណវត្ដ ដោយមានកូនស្ទឹងតូចមួយពុះកាត់ចំពាក់កណ្ដាលវត្ដតែម្ដង ។
ខេត្ដកំពង់ឆ្នាំង ៖ វត្ដ “នទីគិរីវ័ន្ដ” គឺជាវត្ដថ្មីសន្លាងទើបត្រូវបានរៀបចំកសាងនៅឆ្នាំ២០០៦ ដែលស្ថិតនៅប្រមាណជិត៥០គីឡូម៉ែត្រពីទីរួមខេត្ដកំពង់ឆ្នាំង គឺស្ថិតនៅក្នុងភូមិកោះមមើ ឃុំជៀប ស្រុកទឹកផុស ។ អ្វីដែលគួរឱ្យចាប់អារម្មណ៍នោះ វត្ដនេះបានស្ថិតនៅក្នុងព្រៃដែលបានព័ទ្ធរបងធ្វើបរិវេណវត្ដ ដោយមានកូនស្ទឹងតូចមួយពុះកាត់ចំពាក់កណ្ដាលវត្ដតែម្ដង ។
ក្នុងរដូវប្រាំងក៏នៅមានទឹកស្ទឹងហូរធ្លាក់កាត់ផ្ទាំងថ្មដាតូចធំក្នុងបរិវេណវត្ដដូចទឹកជ្រោះធ្លាក់ និងគួរឱ្យគយគន់ចង់ចុះងូតទឹកលេងកំសាន្ដគ្រប់ៗគ្នា ។ បើយើងចេញដំណើរពីទីរួមខេត្ដកំពង់ឆ្នាំងទៅតាមបណ្ដោយផ្លូវជាតិលេខ៥៣ ដែលទើបអភិវឌ្ឍន៍ដោយចាក់កៅស៊ូយ៉ាងរលោងស្រិលរហូតដល់ទីរួមស្រុកទឹកផុស(ស្ថានីយរថភ្លើងរមាស) ហើយយើងបន្ដដំណើរដោយឆ្លងកាត់ផ្លូវរថភ្លើងទៅមុខប្រមាណជា២គីឡូម៉ែត្រទៀត ទើបផុតថ្នល់កៅស៊ូហើយចូលដល់ផ្លូវក្រួសក្រហមទៅជិតដល់វត្ដខ្លុងពពាក មានផ្លូវបែកទៅខាងស្ដាំដៃ យើងបន្ដដំណើរតាមផ្លូវលំក្រាលក្រួសក្រហមបត់បែនតាមដងព្រៃដែលកន្លែងខ្លះមានផ្ទះប្រជាពលរដ្ឋផងនោះ គឺប្រើរយៈពេលត្រឹមតែ៥០នាទីប៉ុណ្ណោះ រាប់តាំងពីពេលយើងចេញពីទីរួមខេត្ដយើងនឹងទៅដល់វត្ដនទីគិរីវ័ន្ដជាក់ជាពុំខាន។ ទៅដល់ទីនោះគឺសំបូរទៅដោយម្លប់ឈើតូចធំអាចឱ្យយើងចតរថយន្ដបានស្រួល ប៉ុន្ដែបើយើងមិនចង់ឈប់នៅត្រើយខាងណោះទេ យើងអាចបើករថយន្ដកាត់ទីវត្ដ ហើយឆ្លងស្ពានធ្វើពីដែកក្រាលឈើកាត់លើកូនស្ទឹងនោះទៅឈប់រថយន្ដត្រើយម្ខាងក៏បានដែរ ពីព្រោះសុទ្ធតែស្ថិតក្នុងបរិវេណវត្ដទាំងអស់ ។ នៅខាងក្រោមស្ពានដែកដែលទើបសាងសង់មានផ្ទាំងថ្មតូចធំ និងមានទឹកហូរធ្លាក់យ៉ាងខ្លាំង ដែលទេសភាពបែបនេះនរណាក៏ចង់ទៅកំសាន្ដដែរ ។
ទីអារាមដែលទើបកើតថ្មីនេះក្នុងឱកាសបុណ្យចូលឆ្នាំខាលនេះមានមនុស្សប្រុសស្រី ក្មេងចាស់បានទៅកំសាន្ដយ៉ាងច្រើនកុះករ ដោយមធ្យោបាយរថយន្ដ ឬម៉ូតូរាប់រយគ្រឿង ។ គណៈកម្មការអាចារ្យវត្ដដែលមាន ផ្ដិលរៃអង្គាសបច្ច័យយកទៅកសាងវត្ដផងនោះបានឱ្យដឹងថា កាលពីដើមឡើយដីនេះគឺជាព្រៃសុទ្ធសាធ តែដោយសារមានទឹកធ្លាក់ពីលើថ្មបែបនេះ ក៏ចេះតែមានមនុស្សមកកំសាន្ដច្រើនឡើងៗ ។ ក្រោយមកអ្នកស្រុក ជិតៗនេះបានកសាងសាលាបុណ្យមួយ ហើយក៏បានក្លាយជាវត្ដដែលពុំទាន់មានព្រះវិហារត្រឹមត្រូវនៅឡើយ ប៉ុន្ដែទោះជាហេដ្ឋារចនាសម្ព័ន្ធក្នុងវត្ដមិនទាន់កសាងបានសព្វគ្រប់ក្ដី ក៏ សម្រាប់ផ្លូវចូលដល់ទីធ្លាវត្ដ គឺបានកសាងស្អាតល្អអាចឱ្យភ្ញៀវទេសចរមកកំសាន្ដបានយ៉ាងងាយស្រួល ។ គណៈកម្មការអាចារ្យវត្ដក៏មានពាក្យផ្ដាំផ្ញើសុំឱ្យភ្ញៀវទេសចរក្នុងខេត្ដ និងក្រៅខេត្ដអញ្ជើញមកលេងនៅវត្ដនេះឱ្យបានច្រើន ពីព្រោះមានទឹកធ្លាក់ពីលើថ្ម និងផ្លូវងាយស្រួលហើយជិតទៀតផង តែសុំផ្ដាំកុំបើកលឿនពេក ពីព្រោះផ្លូវមកកាន់វត្ដនេះមានបត់បែនច្រើនកន្លែង និងរអិលដោយសារក្រួសក្រហមផងដែរ៕
ចែករំលែកព័តមាននេះ