តាមប្រភពព័ត៌មាន Metro បានឲ្យដឹងថា ភាពឯកាអាចធ្វើឲ្យអត្រានៃការស្លាប់ដោយសារជំងឺបេះដូងកើនឡើងដល់ទៅពីរដង។ នេះជាការស្រាវជ្រាវដែលទើបតែចេញលទ្ធផលនាពេលថ្មីៗនេះ ដោយសិស្សថ្នាក់បណ្ឌិតនៅមជ្ឈមណ្ឌលបេះដូង នាសាកលវិទ្យាល័យ Copenhagen ក្នុងប្រទេសដាណឺម៉ាក។
ការសិក្សានេះបានរកឃើញថា ការរស់នៅម្នាក់ឯងកំពុងតែមានភាពកើនឡើងនៅក្នុងសង្គមសព្វថ្ងៃ។ ភាពឯកានេះបានធ្វើឲ្យមានអត្រាស្លាប់មុនអាយុដល់ទៅពីរដងនៅលើស្ត្រី ហើយក្បែរនឹងពីរដងនៅលើបុរស។ ទាំងបុរស និងស្ត្រីដែលមានអារម្មណ៍ថា ខ្លួនឯងឯកា ងាយប្រឈមមុខនឹងចេញរោគសញ្ញាថប់អារម្មណ៍ និងធ្លាក់ទឹកចិត្តជាងមនុស្សធម្មតាដល់ទៅបីដង។
សិស្សថ្នាក់បណ្ឌិត Anne Vinggaard Cristensen បានថ្លែងនៅ EuroHearthCare 2018 ថា៖ «ភាពឯកាកំពុងតែកើនឡើងនៅក្នុងសង្គមយើងបច្ចុប្បន្ន។ ការសិក្សាស្រាវជ្រាវមុននេះ បានបង្ហាញថា ភាពឯកា និងការដកខ្លួនចេញពីសង្គម មានការពាក់ព័ន្ធជាមួយនឹងជំងឺសរសៃឈាមបេះដូង និងស្ត្រូក។ វាជាកត្តាសំខាន់ធ្វើឲ្យប្រឈមនឹងការស្លាប់មុនអាយុ បញ្ហាផ្លូវចិត្ត និងការធ្លាក់ចុះនូវគុណភាពជីវិតទាំងទៅលើបុរស និងស្ត្រី»។ ការប្រាស្រ័យទាក់ទងគ្នា គឺពិតជាសំខាន់។ ដូចនេះយើងគ្រប់គ្នាគួរមានទំនាក់ទំនងល្អនៅក្នុងសង្គម ដើម្បីឲ្យជីវិតកាន់តែប្រសើរ៕
ចែករំលែកព័តមាននេះ