ប្រទេសអាហ្វហ្គានីស្ថាន ៖ ប្រភពព័ត៌មានសន្តិសុខរាយការណ៍ថា មនុស្សយ៉ាងតិច១៥នាក់ស្លាប់ និង៤៥នាក់ទៀតរងរបួស កាលពីថ្ងៃទី១៧ មិថុនា ក្នុងការវាយប្រហារអត្តឃាតមួយសំដៅទីស្នាក់ការអភិបាលខេត្តណាន់ហ្គាហារ ភាគខាងកើតអាហ្វហ្គានីស្ថាន នៅទីក្រុងហ្សាឡាឡាបាដ។ ទីនោះមុននេះជាកន្លែងប្រជុំមួយរវាងពួកមន្ត្រីអាហ្វហ្គានីស្ថាន និងពួកតាលីបង់។
យោងតាមព័ត៌មានដំបូងៗថា ជនអត្តឃាតម្នាក់បានធ្វើឲ្យគ្រឿងផ្ទុះដាក់ជាប់ខ្លួនគេផ្ទុះត្រង់ច្រកចូលអគារនាវេលាម៉ោង១៥និង១៥នាទីម៉ោងក្នុងស្រុក ពេលមនុស្សម្នានាំគ្នាចេញក្រោយបញ្ចប់កិច្ចប្រជុំ។ ចំនួនអ្នកស្លាប់អាចមានខ្ពស់ជាងនេះទៀតដោយអ្នករបួសមួយចំនួនស្ថិតក្នុងសភាពធ្ងន់ធ្ងរ។
ការវាយប្រហារប្រហាក់ប្រហែលគ្នានោះកាលពីថ្ងៃទី១៦ មិថុនា ប្រកាសទទួលខុសត្រូវដោយក្រុមរដ្ឋអ៊ិស្លាម នៅទីក្រុងហ្សាឡាឡាបា ដដែល ហើយបណ្ដាលឲ្យមនុស្សស្លាប់២៥នាក់ និងរបួស៥៤នាក់ ក្នុងនោះមានពួកតាលីបង់ បណ្ដាជនស៊ីវិល និងសមាជិកកងកម្លាំងសន្តិសុខ។ នាថ្ងៃនោះដែរ ប្រធានាធិបតីអាហ្វហ្គានីស្ថានលោកASHRAF GHANI ប្រកាសពន្យាពេលបទឈប់បាញ់គ្នាជាមួយពួកតាលីបង់។
ពួកតាលីបង់នាថ្ងៃទី១៧ មិថុនា បានបដិសេធ ការអំពាវនាវរបស់ប្រធានាធិបតីអាហ្វហ្គានីស្ថាន បានពន្យាពេលបទឈប់បាញ់គ្នានេះ ដែលញ៉ាំងឲ្យប្រជាជនមានការខកចិត្តលើក្ដីសង្ឃឹមចំពោះសន្តិភាព ខណៈប្រទេសធ្លាក់ក្នុងសង្គ្រាមរាប់ទសវត្សមកហើយ។
រីឯអ្នកនាំពាក្យពួកតាលីបង់លោកZABIHULLAH MUJAHID នៅក្នុងសេចក្ដីប្រកាសមួយនិយាយថា បទឈប់បាញ់គ្នាត្រូវបញ្ចប់នាយប់ថ្ងៃទី១៧ មិថុនា ហើយប្រតិបត្តិការរបស់យើងនឹងបន្តឡើងវិញ៕
ចែករំលែកព័តមាននេះ