ខេត្តព្រៃវែង ៖ កុមារាអាយុ៧ឆ្នាំម្នាក់បានលង់ទឹកស្លាប់យ៉ាងអណោចអាធ័ម ខណៈកំពុងដើរចាប់កង្កែបម្នាក់ឯងនៅក្បែមាត់រណ្តៅដីខាងក្រោយផ្ទះ ហើយមិនប្រយត្ន័បានរអិលជើងធ្លាក់ចូលក្នុងរណ្តៅដីដែលមានទឹកជ្រៅ ។ ហេតុការណ៍ដ៏គួរឱ្យសង្វេគនេះ បានកើតឡើងកាលពីវេលាម៉ោង០៦ និង២០នាទីយប់
ថ្ងៃទី១៧ មិថុនា នៅចំណុចរណ្តៅដីខាងក្រោយផ្ទះកុមារារងគ្រោះ ក្នុងភូមិព្រៃលាន ឃុំរំលេច ស្រុកស៊ីធរកណ្តាល ខេត្តព្រៃវែង កុមារារងគ្រោះមានឈ្មោះ រិន រ៉េត អាយុ៧ឆ្នាំ។
ប្រភពឱ្យដឹងថា ក្មេងដែលស្លាប់ ឈ្មោះ រិន រ៉េត អាយុ៧ឆ្នាំ មានឪពុកឈ្មោះលៀម រិន និងម្តាយឈ្មោះ
យ៉េត មុំ បានធ្វើចំណាកស្រុកទៅធ្វើការនៅតំបន់ឆ្ងាយដោយទុកឱ្យកូន (ក្មេងរងគ្រោះ) រស់នៅជាមួយធំស្រីឈ្មោះជិន មួយ អាយុ៥៨ឆ្នាំ នៅក្នុងភូមិកើតហេតុច្រើនឆ្នាំមកហើយ ។
ប្រភពដដែលបញ្ជាក់ថា នៅមុនពេលកើតហេតុ កុមារារងគ្រោះនិងក្មេងៗអាយុស្របាលគ្នា២ ទៅ៣នាក់ផ្សេងទៀតនាំគ្នាដើរឆ្លុះកង្កែបនៅតាមវាលស្រែខាងក្រោយភូមិ ។ លុះដើរមកដល់ចំណុចកើតហេតុ គឺក្បែរណ្តៅដីខាងក្រោយផ្ទះ ក្មេងៗដទៃទៀតក៏បានបបួលគ្នាត្រឡប់ទៅផ្ទះវិញ តែកុមារារងគ្រោះប្រាប់ឱ្យគេទៅមុន ឯគេប្រាប់ថា នៅឆ្លុះកង្កែបបន្តិចសិន ទើបក្មេងៗដទៃនាំគ្នាចែកផ្លូវគ្នាទៅផ្ទះរៀងៗខ្លួនទៅចំណែកអ៊ំស្រីពេលបាត់មិនឃើញក្មួយត្រឡប់មកផ្ទះវិញ ក៏សួរក្មេងៗដែលដើរមកមុន ដឹងថានៅមាត់រណ្តៅខាងក្រោយផ្ទះក៏ដើរទៅរក តែមិនឃើញក្មួយសោះ ហើយក៏សង្ស័យថា ក្មួយធ្លាក់ចូលរណ្តៅហើយ ក៏បានហៅអ្នកស្រុកជួយចុះរាវរក ក៏ប្រទះឃើញសាកសព បង្កការផ្អើលឆោឡោតែម្តង។
ចែករំលែកព័តមាននេះ