រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខ ឥសានបានហៅសកម្មភាពរបស់ក្រុមប្រឆាំងកំពុងតវ៉ានៅក្រៅប្រទេសជារុយ និងមូសដែលចោមរោមការបោះឆ្នោតនៅកម្ពុជាដែលកាន់តែជិតមកដល់ ។ លោកសុខ ឥសានបានឲ្យដឹងនៅថ្ងៃទី១៨ មិថុនាថា នៅពេលដែលការបោះឆ្នោតជ្រើសតាំងតំណាងរាស្ត្រនីតិកាលទី៦ដែលនឹងប្រព្រឹត្តទៅនាថ្ងៃទី២៩…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខ ឥសានបានហៅសកម្មភាពរបស់ក្រុមប្រឆាំងកំពុងតវ៉ានៅក្រៅប្រទេសជារុយ និងមូសដែលចោមរោមការបោះឆ្នោតនៅកម្ពុជាដែលកាន់តែជិតមកដល់ ។
លោកសុខ ឥសានបានឲ្យដឹងនៅថ្ងៃទី១៨ មិថុនាថា នៅពេលដែលការបោះឆ្នោតជ្រើសតាំងតំណាងរាស្ត្រនីតិកាលទី៦ដែលនឹងប្រព្រឹត្តទៅនាថ្ងៃទី២៩ ខែកក្កដា ឆ្នាំ២០១៨ មជ្ឈដ្ឋានប្រឆាំង និងអ្នកគាំទ្រអតីតបក្សប្រឆាំងបាន និងកំពុងហ៊ុមព័ទ្ធសភាពការណ៍នយោបាយសេដ្ឋកិច្ចសង្គម ដើម្បីធ្វើឲ្យមើលទៅហាក់ដូចជាច្របូកច្របល់ខ្លាំងណាស់ តែតាមពិតគ្មានទេ ។ ជាងនេះពួកប្រឆាំងមួយចំនួននៅបរទេសបាននាំគ្នាធ្វើបាតុកម្មប្រឆាំងនឹងប្រទេសជប៉ុន ដើម្បីឲ្យឈប់ផ្តល់ជំនួយមកឲ្យគ.ជ.ប ។
ជាមួយគ្នានោះដែរ លោកក៏បានលើកឡើងថា មានមតិមួយចំនួនក៏បានដែរ សុទ្ធតែអគតិមួយចំនួននាំគ្នាបំផុសប្រជាជនកម្ពុជាមិនទៅបោះឆ្នោតដោយប្រើពាក្យថា នៅផ្ទះឈ្នះឯងចង់រារាំងការបោះឆ្នោត ។ អុ្នកទាំងនេះនាំគ្នាវាយប្រហារមកលើគ.ជ.បថា ជាស្ថាប័នមិនឯករាជ្យការបោះឆ្នោតមិនស្មើភាព ដោយសារតែកាន់ជើងអតីតបក្សប្រឆាំង ។ លោកក៏បានបន្ថែមថា អ្នកខ្លះដែលលំអៀងនយោបាយបានបំផុសថា ការបោះឆ្នោត គឺក្លែងក្លាយដោយសារគ្មានអតីតបក្សប្រឆាំង ដោយមិនគិតថា អតីតបក្សប្រឆាំល្មើសច្បាប់ធ្ងន់ធ្ងរនោះទេ ។ ជាងនេះបានវាយតម្លៃដោយអគតិថា ស្ថាប័នធ្វើច្បាប់ផ្សេងៗដោយមិនបានល្អនៅខ្វះខាត ចន្លោះប្រហោងជាច្រើនរំលោភលើតួនាទីសិក្សាស្រាវជ្រាវម៉ត់ចត់នៃស្ថាប័នកំពូលរបស់រដ្ឋ ។
លោកគូសបញ្ជាក់ថា«ទោះបីពួករុយ ពួកមូសមកឆាឆៅសភាពការណ៍នយោបាយយ៉ាងណាក៏ដំណើរការឆ្ពោះទៅរកការបោះឆ្នោតនៅតែទៅមុខដោយរលូនដែរ ដោយមានប្រជាជនកម្ពុជាជាង៨៤ភាគរយដែលមានឈ្នោះក្នុងបញ្ជីនឹងទៅបោះឆ្នោតតាមការិយាល័យបោះឆ្នោតនឹងធ្វើឲ្យការបោះឆ្នោតទទួលជោគជ័យជាមិនខាន» ។
ការលើកឡើងរបស់អ្នកនាំពាក្យគណបក្សកាន់អំណាច ខណៈក្រុមអ្នកគាំទ្រអតីតគណបក្សប្រឆាំងនៅក្រៅប្រទេសធ្វើសកម្មភាពតវ៉ានៅមុខស្ថានទូចជប៉ុននៅក្រៅប្រទេស និងសកម្មភាពនៅបណ្តាប្រទេសផ្សេងទៀតក្នុងគោលបំណងរារាំងដំណើរការបោះឆ្នោតនៅកម្ពុជាដោយគ្មាន គណបក្សសង្គ្រោះជាតិចូលរួម ។
យ៉ាងណាក្តី បើតាម គ.ជ.ប ធ្លាប់បានអះអាងថា ទោះបីគ្មានគណបក្សប្រឆាំងចូលរួមក៏ដោយ ឬមានការរំខានយ៉ាងណាក៏ គ.ជ.ប នៅតែរៀបចំដំណើរការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ នៅតែដំណើរជាធម្មតាទាំងការបោះឆ្នោតទាំងការប្រកាសលទ្ធផលបោះឆ្នោត ៕
ចែករំលែកព័តមាននេះ