រាជធានីភ្នំពេញ ៖ តារាសម្តែងលោកវុទ្ឋី ស័ក ឆ្អែតចិត្តចំពោះការមិនឲ្យតម្លៃរបស់ផលិតករ និងតារាល្បីមួយចំនួនចំពោះតារាថ្មី ។
តារាសម្តែងលោកវុទ្ធី ស័ក បង្ហាញភាពឈឺចាប់នៅក្នុងពិភពសិល្បៈ ដោយនិយាយថា«មិននឹកស្មានថា មានការឈ្នានីសគ្នាប្រកាន់បក្សប្រកាន់ពួកសូម្បីតែគ្នាតួថ្មីគោរពរៀមច្បងនៅតែមើលមិនឃើញតម្លៃ ។ ខ្ញុំស្ទើរតែអស់សង្ឃឹមលើអាជីពសិល្បៈ ខ្ញុំបានដើរសម្តែង និងជួយថតឲ្យផលិតកម្មមួយចំនួន តែនៅទីបំផុតឃើញថាសង្គមមួយនេះបក្សពួករាប់អានតែគ្នាគេ ។ ខ្ញុំឆ្អែតចិត្តចំពោះផលិតកម្មធំមួយហៅខ្ញុំថតគឺនិយាយលួងលោមណាស់ តែការងារជាក់ស្តែងទុកយើងដូចពពួកគ្មានតម្លៃ ស្ទុះស្ទាឈ្មុលរកតែគ្នាគេដូចបងដូចប្អូន ។ បើនិយាយពីតម្លៃថតវិញខ្ញុំក៏ទទួលបានតិចតួច តែមិនខឹងឡើយឲ្យតែទទួលបានការយកចិត្តទុកដាក់ពីផលិតករឬថៅកែមេកើយ តែនេះគេទុកយើងជាមនុស្សគ្មានបេះដូង សួរថាតើតួល្បីអស់ហ្នឹងចេញមកភ្លាមល្បីភ្លាមមែន ។
ភាពអស់ចិត្តនេះលែងចង់ជឿផលិតកម្មណាទាំងអស់ពូកែណាស់បោកតួប្រើ តួថ្មីចាំសំកុករាប់ម៉ោងអត់ងងុយអីក៏ឃើញ គ្រាន់តែអ្នកល្បីវិញមកយឺតហើយលួងលោមទៀត។ បើនិយាយពីពេលទៅជប់លៀងខួបកំណើត ការអីវិញ គឺថាសម្បូរណាស់អ្នកលេងចរិតថាគេល្បី ឫកកប់មេឃ »។ លោកវុទ្ធី ស័ក នឹងតស៊ូដើម្បីអនាគតព្រោះស្រឡាញ់សិល្បៈសុខចិត្តទ្រាំ គោលដៅគឺចង់មានឈ្មោះជាងនេះដើម្បីឲ្យគេស្គាល់ ។
អ្នកនាងកែវ សុវណ្ណនី អ្នកដឹកនាំកម្មវិធីប្រគំតន្ត្រីផ្សាយផ្ទាល់នៅទូរទស្សន៍ប៉ុស្តិ៍លេខ៥លើកឡើងថា«តួថ្មីសម្រាប់នាងខ្ញុំកត់សម្គាល់ឃើញថាគោរពពេលវេលាណាស់ មិនពិបាកហៅច្រើនដង ។ ចំពោះតួល្បីមួយចំនួនវិញត្រូវទ្រសម្បើមណាស់ទម្រាំបានឡើងសម្តែងឲ្យយើង ម្តងៗ តិចចេះ តិចចុះ ឡើងចង់វិលមុខ ។ ទាំងនេះជារឿងមួយជ្រុងក្នុងសង្គមសិល្បៈ ហើយរំពឹងថានឹងមិនបន្តមានតារាណាផ្សេងទៀតទម្លាយឡើយ »៕
ចែករំលែកព័តមាននេះ