ខេត្តព្រះសីហនុ ៖ សម្តេចក្រុមព្រះ និងអ្នកម្នាង អ៊ុក ផល្លា បានយាងតាមក្បួនរថយន្តអម ដោយគណៈប្រតិភូគណបក្សហ្វុ៊នស៊ិនប៉ិច ឆ្ពោះទៅខេត្តព្រះសីហនុ ក៏ជួបនឹងគ្រោះអកុសល…
ខេត្តព្រះសីហនុ ៖ សម្តេចក្រុមព្រះ និងអ្នកម្នាង អ៊ុក ផល្លា បានយាងតាមក្បួនរថយន្តអម ដោយគណៈប្រតិភូគណបក្សហ្វុ៊នស៊ិនប៉ិច ឆ្ពោះទៅខេត្តព្រះសីហនុ ក៏ជួបនឹងគ្រោះអកុសល ដោយត្រូវរថយន្តតាក់ស៊ីម៉ាកហាយឡែនឌ័រ បុកលាន់ដូចរន្ទះក្នុងទិសដៅបញ្ច្រាសគ្នា ។ ការបុកដ៏ខ្លាំងនោះ ភាគីខាងតាក់ស៊ីមានមនុស្សប្រុសស្រី៥នាក់ ត្រូវរងរបួសធ្ងន់ក្នុងនោះរាប់ទាំងអ្នកបើកបរផងដែរ ។ ឧបទ្ទវហេតុបានកើតមានឡើង នៅព្រឹកថ្ងៃទី១៧ មិថុនា វេលាម៉ោង០៨ និង៥០នាទីលើផ្លូវជាតិលេខ៤ ចន្លោះគីឡូម៉ែត្រលេខ២០០-២០១ ចំណុចផ្លូវចូលកន្លែងចាក់សំរាម ស្ថិតនៅក្នុងភូមិអូរតាសេក ឃុំអូរឧកញ៉ាហេង ស្រុកព្រៃនប់ ។
ពាក់ព័ន្ធនឹងករណីនេះ តាមមន្ត្រីនគរបាលខេត្តព្រះសីហនុបានឱ្យដឹងថា មុនពេលកើតហេតុ មានរថយន្តមួយគ្រឿងម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ 2L 9667 បើកបរដោយឈ្មោះ វ៉ុល សារ៉េត ភេទប្រុស អាយុ៣៤ឆ្នាំ មុខរបររត់តាក់ស៊ី មានទីលំនៅភូមិ២ សង្កាត់លេខ១ ក្រុងព្រះសីហនុ ដឹកភ្ញៀវចំនួន៤នាក់ (ស្រីម្នាក់) មានទិសដៅពីខេត្តព្រះសីហនុ ឆ្ពោះទៅរាជធានីភ្នំពេញ ។ លុះដល់ចំណុចខាងលើដែលបើកលឿនបានធ្លាក់ផ្លូវ ក៏រេចង្កូតមកខាងឆ្វេងដៃបុកនឹងរថយន្តមួយគ្រឿងម៉ាក BMW ពណ៌ទឹកប្រាក់ ពាក់ផ្លាកលេខ រដ្ឋសភា 5.2 090 ជិះគ្នាចំនួន៣នាក់ (ស្រីម្នាក់) ដែលជាព្រះទីនាំងរបស់សម្តេចក្រុមព្រះ និងអ្នកម្នាង ដែលយាងទៅខេត្តព្រះសីហនុ ក្នុងទិសដៅផ្ទុយគ្នា ។
នេះជាគ្រោះអកុសលមួយ ដែលគ្មាននរណាស្មានដល់ឡើយ ដោយសារក្បួនព្រះទីនាំងព្រះអង្គ មានរថយន្តស៊ីរ៉ែននាំមុខ ហើយព្រះទីនាំងព្រះអង្គជារថយន្តទី៤ បែរជារងការបុកចំពីចំហៀងយ៉ាងខ្លាំង ទើបក្លាយជាបែបនេះ ។
ប្រភពដដែលបានបន្តទៀតថា ការបុកនេះ បណ្តាលឱ្យភាគីខាងរថយន្តតាក់ស៊ីរងរបួសធ្ងន់ទាំង៥នាក់ រាប់ទាំងអ្នកបើកបរ ។ ចំណែកព្រះទីនាំងសម្តេចក្រុមព្រះរបួសធ្ងន់២នាក់ គឺព្រះអង្គ និងអ្នកម្នាង ។ រីឯអ្នកបើកបរ បែរជារងរបួសស្រាល ។ ភ្លាមៗ ព្រះអង្គនិងអ្នកម្នាងត្រូវបានដឹកទៅសង្គ្រោះជាបន្ទាន់នៅមន្ទីរពេទ្យបង្អែកខេត្តព្រះសីហនុ ដោយសម្តេចក្រុមព្រះនិងអ្នកម្នាងបានដឹកទៅសង្គ្រោះនៅគ្លីនិកសេតេខេត្តព្រះសីហនុ ហើយនិងបញ្ជូនបន្តតាមឧទ្ធម្ភាគចក្រទៅរាជធានីភ្នំពេញ ។
ជាដំណឹងអកុសល អ្នកម្នាង អ៊ុក ផល្លា បានទទួលមរណភាពនៅម៉ោងជាង១២រសៀល ដោយមិនអាចជួយសង្គ្រោះបានដែលប្រភពថាអ្នកម្នាងត្រូវរបួសត្រង់ថ្លើមធ្ងន់ធ្ងរពេក ។ អ្នកបើករថយន្តហាយឡែនឌ័រ ដែលជារថយន្តបង្កត្រូវបានសមត្ថកិច្ចជំនាញឃាត់ខ្លួន ក្រោយពីការលាងរបួសរួចរាល់ ។
ចែករំលែកព័តមាននេះ