ការប្រកួតបាល់ទាត់ World Cup រដូវកាល២០១៨នេះ គេសង្កេតឃើញកីឡាករជើងថ្មីច្រើនរូបកំពុងបង្ហាញខ្លួនជាមួយក្រុមជម្រើសជាតិពួកគេ ជាពិសេសកីឡាករក្មេងៗ តែសមត្ថភាពខ្ពស់មិនធម្មតា ។ ខាងក្រោមនេះក្រុមការងារកីឡានៃសារព័ត៌មានកោះសន្តិភាព សូមលើកយកកីឡាករអាយុក្រោម២២ឆ្នាំចំនួន៦រូបមកពីក្រុមជម្រើសជាតិផ្សេងគ្នាដែលនឹងធ្វើឱ្យសមរភូមិ World Cup រឹតតែកក្រើកមកបង្ហាញជូនប្រិយមិត្ត៖
១-កីឡាករ Gabriel Jesus អាយុ២១ឆ្នាំ (ប្រេស៊ីល)
កីឡាករ Gabriel Jesus គឺជាតារាឆ្នើមទើបរះមួយរូបដែលគេតែងលើកយកមកនិយាយបន្ទាប់ពីNeymar ។ ខ្សែប្រយុទ្ធក្លិបMan City ដែលកំពុងឡើងជើងខ្លាំងមួយរយៈពេលចុងក្រោយនេះ នឹងធ្វើជាផ្នែកមួយសំខាន់ក្នុងដំណើរជួយជ្រោមជ្រែងក្រុមជម្រើសជាតិប្រេស៊ីលនៅWorld Cup អមជាមួយកីឡាករឆ្នើមច្រើនរូបទៀត ។
កីឡាករ Gabriel Jesus បានចូលរួមលេងជាមួយក្រុមប្រេស៊ីលឈុតធំនៅឆ្នាំ២០១៦ រហូតមកទល់ពេលនេះបានបង្ហាញខ្លួនចំនួន១៦លើក ។ ដំណើរឆ្លងកាត់ឧបសគ្គជាច្រើនមុនមកដល់ទឹកដីរុស្ស៊ី ខ្សែប្រយុទ្ធវ័យក្មេងរូបនេះរកបាន៦គ្រាប់ក្នុងការបង្ហាញខ្លួន១០ប្រកួតនៅវគ្គជម្រុះ World Cup ២០១៨ ។
២-កីឡាករ Andre Silva អាយុ២២ឆ្នាំ (ព័រទុយហ្គាល់)
ខ្សែប្រយុទ្ធមកពីទ្វីបអឺរ៉ុបរូបនេះ បច្ចុប្បន្នលេងនៅក្លិបអុីតាលី AC Milan បន្ទាប់ពីផ្លាស់ចេញពីក្លិប Porto កាលពីឆ្នាំ២០១៧ ។ Andre Silva ត្រូវបានគេទទួលស្គាល់ថាជាកីឡាករវ័យក្មេងដែលពោរពេញទៅដោយសមត្ថភាព និងបច្ចេកទេសលេងមិនធម្មតា ។
តារាក្មេងរូបនេះ បានចាប់អាជីពជាកីឡាករបាល់ទាត់ដំបូងដោយចូលរួមជាមួយជម្រើសជាតិព័រទុយហ្គាល់U16 និងបន្តបន្ទាប់ដល់ U21 ទើបត្រូវបានជ្រើសរើសចូលលេងឱ្យឈុតធំក្នុងវ័យ២០ឆ្នាំក្រោយពេលព័រទុយហ្គាល់ឈ្នះពានយូរ៉ូឆ្នាំ២០១៦ ។ បន្ទាប់ពីបង្ហាញខ្លួនបាន២៣ប្រកួត Andre Silva ស៊ុតបាន១២គ្រាប់(រួមទាំង៩គ្រាប់នៅវគ្គជម្រុះ World Cup) ធ្វើឱ្យរូបគេក្លាយជាគ្រាប់ពូជសំខាន់ទាំងវ័យក្មេងដែលអាចទ្រទ្រង់ក្រុមជម្រើសជាតិនៅព្រឹត្តិការណ៍ World Cup ២០១៨នេះ ។
៣-កីឡាករ Rodrigo Bentancur អាយុ២០ឆ្នាំ (អ៊ុយរូហ្គាយ)
បន្ទាប់ពីបានចូលរួមលេងព្រឹត្តិការណ៍ World Cup U20 ឆ្នាំ២០១៧ ជាមួយក្រុមជម្រើសជាតិអ៊ុយរូហ្គាយ (U20) រួចមកខ្សែបម្រើវ័យក្មេងសមត្ថភាពខ្ពស់រូបនេះបានជួយក្រុមឱ្យឡើងដល់វគ្គពាក់កណ្តាលផ្តាច់ព្រ័ត្រទៀតផង ។ ដោយមើលឃើញពីភាពប៉ិនប្រសប់របស់កីឡាករ Rodrigo Bentancur ក្លិប Juventus ក៏ទៅស្តីដណ្តឹងពីក្លិប Boca Juniors យកមកលេងនៅទឹកដីអុីតាលីកាលពីឆ្នាំ២០១៧បន្ទាប់ពីចប់ព្រឹត្តិការណ៍ World Cup U20 ភ្លាម ។
គួររំលឹកផងដែរថា កីឡាករវ័យក្មេងឆ្នើមមកពីទ្វីបអាមេរិកខាងត្បូងរូបនេះ បានបង្ហាញខ្លួនជាមួយក្រុមជម្រើសជាតិឈុតធំលើកដំបូងកាលពីខែតុលា ឆ្នាំ២០១៧ ហើយរហូតមកទល់ពេលនេះ Rodrigo Bentancur ទើបតែលេងបានចំនួន៦ប្រកួតប៉ុណ្ណោះអំឡុងប្រកួតជម្រុះ World Cup កន្លងទៅ ប៉ុន្តែមិនទាន់រកគ្រាប់បាល់បាននៅឡើយទេ ។
៤-កីឡាករ Edson Alvarez អាយុ២០ឆ្នាំ (ម៉ិកស៊ិក)
ខ្សែការពារ Edson Alvarez ត្រូវបានកោះហៅឱ្យចូលរួមជាមួយក្រុមជម្រើសជាតិម៉ិក
ស៊ិកឈុតធំកាលពីដើមឆ្នាំ២០១៧ បន្ទាប់ពីបង្ហាញសមត្ថភាពដ៏ល្អអំឡុងពេលលេងនៅ U20។ យ៉ាងណាមិញ គ្រាប់ពូជពន្លកថ្មីមួយនេះ ទើបតែលេងបាន២ប្រកួតប៉ុណ្ណោះនៅវគ្គជម្រុះ World Cup កន្លងទៅ ក្នុងចំណោមវត្តមានទាំង១១ប្រកួតនៅឈុតធំ និងស៊ុតបាន១គ្រាប់ ។
Edson Alvarez គឺជាកីឡាករវ័យក្មេងជាងគេក្នុងបញ្ជីឈ្មោះកីឡាករម៉ិកស៊ិកទាំង២៣រូបមក
លេងនៅ World Cup ទឹកដីរុស្ស៊ីរដូវកាលនេះ ។លោកគ្រូបង្វឹក Osorio Juan Carlos រំពឹងថា Edson Alvarez នឹងក្លាយតួអង្គសំខាន់សម្រាប់ទ្រទ្រង់នាវាក្រុមជម្រើសជាតិឱ្យរឹតតែខ្លាំងនាពេលអនាគត ។
៥-កីឡាករ Kylian Mbappe អាយុ១៩ឆ្នាំ (បារាំង)
ក្រោយលេងនៅ U19 បានចំនួន១១ប្រកួតស៊ុតបាន៧គ្រាប់រួចមក តារាឆ្នើមញញឹមស្រស់ Kylian Mbappe ត្រូវបានកោះហៅឱ្យចូលរួមជាមួយក្រុមជម្រើសជាតិឈុតធំអំឡុងឆ្នាំ២០១៧។ រហូតមកទល់ពេលនេះ ខ្សែប្រយុទ្ធវ័យក្មេងខាងលើ លេងបានចំនួន១៥ប្រកួត និងស៊ុតបាន៤គ្រាប់ បូករួមទាំង១គ្រាប់នៅវគ្គជម្រុះ World Cup កន្លងទៅ ។
កីឡាករវ័យក្មេងរូបនេះ លេងនៅក្លិប Monaco បានពីរឆ្នាំ (២០១៥-២០១៧) ដោយស៊ុតបាន១៦គ្រាប់ក្នុងចំណោម៤១ប្រកួត។ បច្ចុប្បន្ន Kylian Mbappe កំពុងរួមរស់ជាមួយក្លិប Paris SG ក្រោមលក្ខខណ្ឌខ្ចីជើង ដែលរដូវកាលឆ្នាំ២០១៧-២០១៨ កន្លងមក រូបគេលេងបាន២៧ប្រកួត និងស៊ុតបាន១៣គ្រាប់ ។
បារាំងមិនត្រឹមតែមាន Kylian Mbappe ដែលមានវ័យក្មេងក្នុងក្រុមនោះទេ កីឡាករ Ousmane Dembele ដែលកំពុងជ្រកនៅក្លិប Barcelona មានអាយុ២១ឆ្នាំ ក៏ជាទំពាំង ល្អសម្រាប់ស្នងតំណែងរាមច្បងផងដែរ ។ ពួកគេទាំងពីរសុទ្ធតែជាទ័ពដ៏សំខាន់ក្នុងការជួយជ្រោមជ្រែងក្រុមជម្រើសជាតិនៅក្នុងសមរភូមិ World Cup ឆ្នាំនេះ ។
៦-កីឡាករ Marcus Rashford អាយុ២១ឆ្នាំ (អង់គ្លេស)
បើនិយាយពីសមត្ថភាព និងបច្ចេកទេសញាក់បាល់ ខ្សែប្រយុទ្ធសក់ក្រញាញ់រូបនេះ ក៏មិនធម្មតាប៉ុន្មានដែរ ។ Marcus Rashford បានចូលលេងឱ្យក្រុមជម្រើសជាតិអង់គ្លេស U21បានតែ១លើកប៉ុណ្ណោះ ប៉ុន្តែរកបាន៣គ្រាប់ម្នាក់ឯងក្នុងជ័យជម្នះ៦ទល់១ពេលប៉ះក្រុមន័រវែស U21 ឆ្នាំ២០១៦ ។ ក្រោយមក កីឡាករវ័យក្មេងរូបនេះ ក៏បានចូលរួមជាមួយឈុតធំ និងមានឈ្មោះលេងនៅព្រឹត្តិការណ៍យូរ៉ូ២០១៦ទៀតផង ។
រហូតមកទល់ពេលនេះ Marcus Rashford លេងបាន១៩ប្រកួត ស៊ុតបាន៣គ្រាប់ បូករួមទាំង១គ្រាប់នៅវគ្គជម្រុះ World Cup ២០១៨ ។ បច្ចុប្បន្ន ខ្សែប្រយុទ្ធឆ្នើមរូបនេះ កំពុងលេងនៅក្លិប Man Utd ដែលបង្ហាញខ្លួនតាំងពីឆ្នាំ២០១៥ ចំនួន៧៨ប្រកួត ស៊ុតបាន១៧គ្រាប់ ៕
ចែករំលែកព័តមាននេះ