ខេត្តសៀមរាប ៖ ករណីគ្រោះថ្នាក់ចរាចរណ៍មួយកើតឡើងនៅស្រុកក្រឡាញ់ រវាងរថយន្តចំនួន៣គ្រឿង បុកបន្តកន្ទុយគ្នាលាន់ដូចរន្ទះ បណ្តាលឱ្យស្លាប់ម្នាក់របួសធ្ងន់ស្រាលចំនួន៧នាក់ បង្កឱ្យមានការ កកស្ទះ ពេញផ្លូវជាតិលេខ៦ មួយសន្ទុះធំទម្រាំសមត្ថកិច្ចមកដល់។ ហេតុការណ៍បង្កការភ្ញាក់ផ្អើលនេះដែរ បានកើតឡើងនៅវេលាម៉ោង២ និង០៦នាទីរសៀល ថ្ងៃទី១៧ ខែមិថុនា ឆ្នាំ២០១៨នេះ ស្ថិតនៅខាងកើតស្ពានកក់ឆ្មា ប្រហែល១០០ម៉ែត្រ ក្នុងភូមិតាច្រែង ឃុំក្រឡាញ់ ស្រុកក្រឡាញ់ ខេត្តសៀមរាប។ លោកវរសេនីយ៍ឯក ជី បេងជន អធិការនគរបាលស្រុកក្រឡាញ់ បានឱ្យដឹងនៅវេលាម៉ោង៦ និង១៥នាទីល្ងាច ថ្ងៃទី១៧ ខែមិថុនានេះថា មានករណីគ្រោះថ្នាក់ចរាចរណ៍ មួយបានកើតឡើងដោយសាររថយន្តចំនួន៣គ្រឿងបានបុកបន្តកន្ទុយគ្នាពេញទំហឹង បណ្តាលឱ្យមាន មនុស្ស ប្រុសស្រី របួសធ្ងន់ស្រាល៧នាក់ និងស្លាប់ម្នាក់។
លោកបានបន្តថា រថយន្តដែលបុកបន្តកន្ទុយ គ្នានោះ ត្រូវបានអ្នកបើកបរ LEXUS RX-330 ពាក់ស្លាកលេខ ភ្នំពេញ 2AQ-0202 ពណ៌ទឹកមាស បើកបរដោយឈ្មោះ គី ចំរើន អាយុ៣២ឆ្នាំ (របួសបន្តិច)ទីលំនៅភូមិតាវៀន សង្កាត់សាលាកំរើក ក្រុងសៀមរាប ចេញមុខជួយបំភ្លឺប្រាប់សមត្ថកិច្ចថា មានរថយន្តម៉ាក HIGHT LANDER ពាក់ស្លាកលេខ ភ្នំពេញ 2AG-6692 ពណ៌ទឹកប្រាក់ បើកបរដោយជនមិនស្គាល់អត្តសញ្ញាណ ក្នុងទិសដៅពីលិចទៅកើត បានរេចង្កូចទៅខាងឆ្វេងដៃ បានបុកប៉ះជាមួយរថយន្តម៉ាក TOYOTA CAMERY(ឆ្លាម)ពាក់ស្លាកលេខ ភ្នំពេញ 2G-4484 ពណ៌ទឹកមាស(បើកបរដោយជនមិនស្គាល់អត្តសញ្ញាណ) ក្នុងទិសដៅពីកើតទៅលិច ហើយរថយន្ត HIGHT LANDER (គេចខ្លួនបាត់) បានវិលទៅបុកប៉ះជាមួយរថយន្តរបស់ខ្លួនម៉ាក LEXUS RX-330 ពាក់ស្លាកលេខ ភ្នំពេញ 2AQ-0202 ពណ៌ទឹកមាស កំពុងបើកបរពីក្រោយរថយន្ត TOYOTA CAMERY (ឆ្លាម) ក្នុងទិសដៅស្របគ្នា។
លោកបានបញ្ជាក់ទៀតថា ជនរងគ្រោះស្លាប់ម្នាក់ ធ្ងន់ស្រាល ស្រីប្រុសទាំង៨ នោះមាន៖ទី១.ឈ្មោះ ស្រី មុំ ភេទស្រី ទីលំនៅភូមិថ្នល់កែង ឃុំស្ពានត្នោត ស្រុកជីក្រែង ខេត្តសៀមរាប (របួសស្រាល) ទី២.ឈ្មោះ សូ ណាង ភេទប្រុស អាយុ២៧ឆ្នាំ ទីលំនៅភូមិ ថ្នល់ ឃុំគោកធ្លកលើ ស្រុកជីក្រែង ខេត្តសៀមរាប (របួសស្រាល) ទី៣.ឈ្មោះ លុយ សេវ ភេទប្រុស អាយុ ២៩ឆ្នាំ ទីលំនៅភូមិស្វាយពក ឃុំគោកធ្លកលើ ស្រុកជីក្រែង ខេត្តសៀមរាប (របួសស្រាល) ទី៤.ឈ្មោះ គាំ ហា ភេទស្រី អាយុ៤៨ឆ្នាំ ទីលំនៅភូមិធ្លក ឃុំត្រាំសសរ ស្រុកស្រីស្នំ ខេត្តសៀមរាប (របួសធ្ងន់) ទី៥.ឈ្មោះ គាំ ស៊ីឡាង ភេទស្រី អាយុ៣៥ឆ្នាំ ទីលំនៅភូមិធ្លក ឃុំត្រាំសសរ ស្រុកស្រីស្នំ ខេត្តសៀមរាប (របួសធ្ងន់) ទី៦.ឈ្មោះ សិម តឿន ភេទប្រុស អាយុ៤៣ឆ្នាំ ទីលំនៅភូមិស្វាយពក ឃុំគោកធ្លកលើ ស្រុក ជីក្រែង ខេត្តសៀមរាប (របួសធ្ងន់)ទី៧.ឈ្មោះ ជិន សៅ ភេទប្រុស អាយុ២១ឆ្នាំ ទីលំនៅភូមិ គោកក្រោល ឃុំស្រះជីក ស្រុកភ្នំស្រុក ខេត្តបន្ទាយមានជ័យ (របួសធ្ងន់)។
និងទី៨ឈ្មោះ សៀវ ភេទប្រុស ទីលំនៅភូមិ តាភ្ងា ឃុំគោកធ្លកលើ ស្រុកជីក្រែង ខេត្តសៀមរាប(ស្លាប់)។ ក្នុងករណីគ្រោះថ្នាក់ចរាចរណ៍ មានការខូចខាតដូចជា៖ រថយន្តចំនួន០៣គ្រឿង (រថយន្ត LEXUS RX-330 ខូចខាតស្រាល, រថយន្ត TOYOTA CAMERY (ឆ្លាម) និងរថយន្ត HIGHT LANDERខូចខាតធ្ងន់)។ ពេលកើតហេតុរួចកម្លាំង ជំនាញបានចុះទៅដល់កន្លែងកើតហេតុ និងបានបញ្ជូនជនរងគ្រោះទៅ មន្ទីរពេទ្យបង្អែកស្រុក។ ។ ចំពោះវត្តុតាងរថយន្តទាំង០៣គ្រឿង ខាងជំនាញបានយកមករក្សាទុកនៅអធិការដ្ឋាន ដើម្បីចាត់ការតាមនីតិវិធី។ បច្ចុប្បន្នសាកសពជនរងគ្រោះ ត្រូវបានសមត្ថកិច្ចជំនាញប្រគល់ឱ្យ ក្រុមគ្រួសារយកទៅធ្វើបុណ្យតាមប្រពៃណី នៅល្ងាចថ្ងៃទី១៧ ខែមិថុនា ឆ្នាំ២០១៨នេះ រួចរាល់ហើយ៕
ចែករំលែកព័តមាននេះ