ខេត្តកំពង់ឆ្នាំង ៖ ពិតជាអាសូរខ្លាំងណាស់ នៅពេលកុមារីពីរនាក់បងប្អូន អាយុ៩ឆ្នាំម្នាក់ និង១០ឆ្នាំម្នាក់ បាននិយាយថា ខ្ញុំចង់ទៅរៀនតែគ្មានកង់ជិះ គ្មានខោអាវថ្មី និងសៀវភៅសម្រាប់ទៅរៀននឹងគេ សូមមេត្តាជួយពួកខ្ញុំផង។ នេះជាសម្ដីពិតរបស់កុមារី ទាំងពីរនាក់បងប្អូន ដែលកំពុងរស់នៅជាមួយជីដូន អាយុ៦៦ឆ្នាំ រួមនឹងកុមារតូចៗពីរនាក់ទៀត ដែលមានអាយុត្រឹម២ឆ្នាំ និងអាយុទើប៨ខែ តែប៉ុណ្ណោះ ពួកគេត្រូវជាជីដូនមួយនឹងនាង។ ក្មេងៗទាំង៤នាក់ ត្រូវបានឪពុកម្តាយលែងលះគ្នា ហើយបានចេញទៅធ្វើការនៅប្រទេសថៃអស់ទៅ ដោយបន្សល់ទុកនៅជាមួយជីដូន រស់នៅភូមិខ្លែងព័រ ឃុំព្រៃមួល ស្រុករលាប្អៀរ ខេត្តកំពង់ឆ្នាំង។ ជួបជាមួយអ្នកសារព័ត៌មាន កាលពីចុងសប្តាហ៍នេះ ស្ត្រីឈ្មោះ ហ៊ឹម ហៃ អាយុ៦៦ឆ្នាំ ស្នាក់នៅភូមិឃុំខាងលើ បានរៀបរាប់ថា ចៅៗទាំង៤នាក់របស់គាត់ គឺមានឪពុកម្តាយពីរគ្រួសារ ដែលសុទ្ធសឹងជាកូនបង្កើតរបស់គាត់ ក្នុងនោះ១គ្រួសារ មានឪពុកឈ្មោះ រឿន រា អាយុ៣៦ឆ្នាំ មានម្តាយឈ្មោះ រិ សា អាយុ៣២ឆ្នាំ (រិ សា ជាកូនបង្កើតរបស់គាត់) ពួកគេមានកូនស្រីពីរនាក់ ម្នាក់ឈ្មោះ រ៉ា ស្រីកា អាយុ១០ឆ្នាំ ម្នាក់ទៀតឈ្មោះ រ៉ា ស្រីធា អាយុ៩ឆ្នាំ។
ចំណែកមួយគ្រួសារទៀត មានឪពុកឈ្មោះ រិ សេង អាយុ៣៦ឆ្នាំ (រិ សេង ជាកូនគាត់បង្កើត ) មានម្តាយឈ្មោះ សាន គ្រួសារនេះមានកូន២នាក់ ម្នាក់កូនស្រីឈ្មោះ រ៉ា ថាអ៊ី អាយុ២ឆ្នាំ និងម្នាក់ទៀតកូនប្រុស ឈ្មោះ រ៉ា សេម អាយុ៨ខែ។ កាលពី២ឆ្នាំមុន គ្រួសារគាត់រស់នៅលើដីចំណីផ្លូវ នៅក្រុងកំពង់ឆ្នាំង តែក្រោយមក គេអភិវឌ្ឍន៍ផ្លូវអស់ទៅ គាត់បានមកសុំដីគេស្នាក់នៅភូមិខ្លែងព័រ នេះជាង២ឆ្នាំហើយ។ ថ្មីៗនេះម្ចាស់គេបានមកប្រាប់ឲ្យគាត់រកទីតាំងផ្សេងរស់នៅទៅ ព្រោះគេត្រូវការដាំដំណាំ តែគាត់បានអង្វរម្ចាស់គេសុំនៅមួយរយៈទៀតសិន ព្រោះមិនមានកន្លែងស្នាក់នៅ នៅឡើយ។ ម្យ៉ាងវិញទៀតកូនៗគាត់បានលែងលះគ្នាទៅធ្វើការនៅថៃអស់ហើយ។ ស្ត្រីរូបនោះបានបន្តថា សព្វថ្ងៃនេះ បានកូនប្រុសគាត់ ឈ្មោះ រិ សេង ដែលត្រូវជាឪពុកកូនតូច២នាក់ ជាអ្នកផ្ញើប្រាក់មកឲ្យ១ខែបាន១០ម៉ឺនរៀល គ្រាន់ទិញទឹកដោះគោឲ្យចៅ និងទិញអង្ករហូប ពេលខ្លះក៏ហូបបបរដែរ ព្រោះគ្មានប្រាក់។ ចំណែកូនៗផ្សេងទៀត មិនដែលផ្ញើមកម្តងណាឡើយ ចៅៗគាត់ធំៗពីរនាក់មិនបានទៅរៀនសូត្រនោះទេ ព្រោះតែក្រីក្រ។
ជាមួយគ្នានេះកុមារី រ៉ា ស្រីកា និង រ៉ា ស្រីធា ប្រាប់ថា ពួកនាងចង់រៀន តែគ្មានខោអាវ សៀវភៅ និងគ្មានកង់ជិះទៅរៀន ព្រោះតែសាលានៅឆ្ងាយ ហេតុនេះហើយពួកនាង និងលោកយាយសុំលើកដៃសំពះ អង្វរ សប្បុរសជន ជិតឆ្ងាយ សូមមេត្តា ជួយឧបត្ថម្ភសៀវភៅ ខោអាវ និងកង់ឲ្យពួកនាងបានជិះទៅរៀនផង។ ជាមួយគ្នានេះ លោក គង់ សុខ អនុប្រធានភូមិខ្លែងព័រ ឃុំព្រៃមូលបានឲ្យដឹងថា គ្រួសារនេះ បានមកសុំដីគេស្នាក់នៅពីរឆ្នាំហើយ តែគាត់មិនបានដឹងថា កូនៗគាត់លែងលះគ្នា ហើយទុក កូនៗចោលឲ្យម្តាយមើលយ៉ាងនេះដែរ។ គ្រួសារនេះ ពិតជាមានជីវភាព ក្រីក្រពិតប្រាកដមែន ក្នុងនាមគាត់ ជាអាជ្ញាធរភូមិខ្លែងព័រ សូមអំពាវនាវដល់សប្បុរជន ជិតឆ្ងាយសូមមេត្តា ជួយគ្រួសារខាងលើនេះផង ព្រោះកំពុងតែជួបការខ្វះខាតខ្លាំងណាស់។ នៅថ្ងៃនោះ ក្រុមអ្នកសារព័ត៌មាន និង ក្រុមមន្ត្រីសុរិយោដី ដែលបានទៅឃើញទិដ្ឋភាពបែបនេះ បានរៃប្រាក់គ្នាជួយឧបត្ថម្ភ ចំនួន១០ម៉ឺនរៀលផងដែរ ៕
ចែករំលែកព័តមាននេះ