ប្រទេសចិន ៖ ប្រទេសចិនកាលពីថ្ងៃទី១៦ មិថុនានេះ បានលាតត្រដាងបញ្ជីមួយនៃបណ្ដាផលិតផលអាមេរិក ដែលនឹងជាកម្មវត្ថុនៃច្បាប់យកពន្ធគយបន្ថែម ហើយជាការតបតចំពោះការប្រកាសរបស់សហរដ្ឋអាមេរិក ដែលដាក់ពន្ធគយបន្ថែមលើការនាំចូលពីចិន។
ជាមួយការយល់ស្របរបស់គណៈរដ្ឋមន្ត្រី គណៈកម្មាធិការដាក់ពន្ធគយរបស់រដ្ឋាភិបាលចិន បានសម្រេចដាក់ពន្ធគយបន្ថែម២៥% លើផលិតផលអាមេរិក ៦៥៩ប្រភេទ ដែលមានទឹកប្រាក់សរុបប្រមាណ៥០ពាន់លានដុល្លារ។ ហើយបើយោងតាមសេចក្ដីប្រកាសមួយរបស់គណៈកម្មាធិការនោះថា ការយកពន្ធគយបន្ថែមលើផលិតផលអាមេរិក៥៤៥មុខ មានតម្លៃប្រមាណ៣៤ពាន់លានដុល្លារ ក្នុងនោះមានបណ្ដាផលិតផលកសិកម្ម រថយន្ត និងផលិតផលសមុទ្រ នឹងចូលជាធរមានចាប់ពីថ្ងៃទី៦ កក្កដា ២០១៨ទៅ។ ចំណែកកាលបរិច្ឆេទនៃការអនុវត្តច្បាប់យកពន្ធគយបន្ថែមលើផលិតផល១១៤មុខទៀត ក្នុងនោះរួមមានផលិតផលគីមី ឧបករណ៍ពេទ្យ និងផលិតផលថាមពលនឹងប្រកាសពេលក្រោយ។
កាលពីថ្ងៃទី១៥ មិថុនា សហរដ្ឋអាមេរិកប្រកាសពីការយកពន្ធគយបន្ថែម២៥% លើបណ្ដាផលិតផលនាំចូលពីចិន មានទឹកប្រាក់ប្រមាណជា៥០ពាន់លានដុល្លារ៕
ចែករំលែកព័តមាននេះ