ប្រទេសឥណ្ឌូណេស៊ី ៖ បើតាមប៉ូលិសរាយការណ៍នាថ្ងៃទី១៦ មិថុនាថា សាកសពនារីឥណ្ឌូណេស៊ីម្នាក់ត្រូវបានរកឃើញនៅក្នុងពោះរបស់ពស់ថ្លាន់យក្សមួយក្បាលដែលមានប្រវែងដល់ទៅ១០ម៉ែត្រ។ ពស់នោះត្រូវបានគេចាប់នៅជិតកន្លែងដែលនារីនេះបាត់ខ្លួន ខណៈនាងចេញទៅធ្វើការនៅសួនបន្លែ។
សាកសពរបស់លោកស្រី វ៉ាទីបា អាយុ៥៤ឆ្នាំ ត្រូវបានពួកអ្នកភូមិរកឃើញនៅ PERSIAPAN LAWELA លើកោះ MUN ភាគអាគ្នេយ៍កោះស៊ូឡាវេស៊ី។
បើតាមប្រមុខប៉ូលិសមូលដ្ឋាននិយាយថា ពេលនោះប្រជាជនសង្ស័យថា ពោះថ្លាន់លេបជនរងគ្រោះ ហើយក៏ចាប់ពស់ថ្លាន់នោះមកវះពោះវាមើល ស្រាប់តែឃើញសាកសពស្ត្រីរងគ្រោះនៅក្នុងនោះ។ ប្រមុខប៉ូលិសរូបនេះបន្តថា ពស់ថ្លាន់នោះបានលេបគាត់ពីក្បាលទៅមុន។ ហើយពួកអ្នកភូមិប្រទះឃើញពស់ថ្លាន់នេះមានសភាពពោះប៉ោងធំហើយនៅចម្ងាយប្រមាណជា៣០ម៉ែត្រពីស្បែកជើងរបស់លោកស្រីវ៉ាទីបា នៅសួនបន្លែនោះស្ថិតនៅជាប់ជម្រាលថ្មមួយ ដែលមានប្រហោងជាជម្រករបស់ពពួកសត្វពស់។
គួររំលឹកថា កាលពីខែមីនា ឆ្នាំ២០១៧ មានបុរសឥណ្ឌូណេស៊ីម្នាក់ក៏ត្រូវបានរកឃើញក្នុងពោះសត្វថ្លាន់មួយក្បាលមានប្រវែង៧ម៉ែត្រដែលលេបគេនៅជិតចំការដូងប្រេងមួយស្ថិតនៅភូមិ SALUBIRO លើកោះស៊ូឡាវេស៊ី៕
ចែករំលែកព័តមាននេះ