ខេត្តកណ្តាល៖ ក្នុងប្រតិបត្តិការដ៏ក្តៅគគុក ប្រើរយៈពេល១១ថ្ងៃ កម្លាំងកងរាជអាវុធហត្ថខេត្តកណ្តាល ដឹកនាំផ្ទាល់ដោយលោក វរសេនីយ៍ឯក ទូច អ៊ីណាន មេបញ្ជាការរងកងរាជអាវុធហត្ថខេត្តកណ្តាល ដោយមានការបញ្ជាផ្ទាល់ពីលោកឧត្តមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្តកណ្តាល បានសហការជាមួយកងរាជអាវុធហត្ថខេត្តសៀមរាប បានចុះប្រតិបត្តិការបង្ក្រាបលើករណីប្រើប្រាស់អាវុធខុសច្បាប់ ក្លែងឯកសារសាធារណៈ ឆបោក និងក្លែងឯកសណ្ឋានអាវុធហត្ថ ឃាត់ខ្លួនបានជនសង្ស័យម្នាក់ រួមនឹងវត្ថុតាងមួយចំនួនធំទៀត។ ហេតុការណ៍ចុះប្រតិបត្តិការបង្ក្រាបនេះបានធ្វើឡើងកាលពីថ្ងៃទី១៥ មិថុនា ឆ្នាំ២០១៨ នៅចំណុចបន្ទប់ជួល ស្ថិតក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប។
មន្ត្រីជាន់ខ្ពស់កងរាជអាវុធហត្ថខេត្តកណ្តាលបានអោយដឹងថា នៅថ្ងៃទី៤ ខែមិថុនា ឆ្នាំ២០១៨ មានជនរងគ្រោះចំនួនបីនាក់មកស្នាក់ការអាវុធហត្ថស្រុកស្អាង ខេត្តកណ្តាល ប្តឹងឈ្មោះនឿន ណាត ភេទប្រុស អាយុ២៩ឆ្នាំ ស្នាក់នៅផ្ទះជួលស្ថិតក្នុងភូមិលេខ៣ ឃុំស្វាយរលំ ស្រុកស្អាង ខេត្តកណ្តាល បានធ្វើសកម្មភាពខ្ចីម៉ូតូ និងទូរស័ព្ទរបស់ជនរងគ្រោះទាំង៣នាក់រួមមាន ១-ឈ្មោះ ម៉ឺន ភេទប្រុស អាយុ៣៨ឆ្នាំ មុខរបរកម្មកររោងចក្រ មានទីលំនៅក្នុងភូមិឃុំកើតហេតុ (បាត់បង់ម៉ូតូ១គ្រឿង) ២-ឈ្មោះ សុដានោ ភេទប្រុស អាយុ៣០ឆ្នាំ មានទីនៅសង្កាត់តាខ្មៅ ក្រុងតាខ្មៅ ខេត្តកណ្តាល (បាត់បង់ទូរសព្ទ័ ពណ៍ស១គ្រឿង) និង៣-ឈ្មោះ ភាព ភេទស្រី អាយុ៣៤ឆ្នាំ មុខរបរកម្មកររោងចក្រ ត្រូវជាសង្សារជនសង្ស័យ ស្នាក់នៅផ្ទះជួលជាមួយគ្នា
(បាត់បង់ទូរសព្ទ័២គ្រឿង) ។
តាមប្រភពព័ត៌មានបានឱ្យដឹងថា ក្រោយពីធ្វើសកម្មភាពរួច ដោយបាត់ជនសង្ស័យយូរពេក ហើយទាក់ទងទូរស័ព្ទមិនចូល ទើបជនរងគ្រោះទាំង៣នាក់ក៏មកប្តឹងសមត្ថកិច្ចអាវុធហត្ថ ហើយបានបំភ្លឺថា ជនសង្សយ័ឈ្មោះនឿន ណាត តែងតែនិយាយប្រាប់ពួកគាត់ថា រូបគេគឺជាមន្ត្រីអាវុធហត្ថ ដែលទើបផ្លាល់មកពីខេត្តប៉ៃលិន ។
ក្រោយទទួលបានពាក្យបណ្តឹង និងការបំភ្លឺដូចខាងលើរួច លោកឧត្តសេនីយ៍ សំ តុលា មេបញ្ជាការអាវុធហត្ថខេត្ត បានបញ្ជាផ្ទាល់ដល់កម្លាំងជំនាញខេត្ត និងស្រុកចុះធ្វើការស្រាវជ្រាវ និងស្វែងរកជនសង្សយ័ និងសម្ភារ:ដែលបាត់បង់តាមនីតិវិធី។ តាមរយៈការសហការស្រាវជ្រាវយ៉ាងយកចិត្តទុកដាក់ក្រោមការចុះដឹកនាំផ្ទាល់ដោយលោកវរៈសេនីយ៍ឯក ទូច អុីណាន និងការយកចិត្តទុកដាក់របស់ជំនាញខេត្តសៀមរាប-ខេត្តកណ្តាល បានកំណត់ទីតាំងលាក់ខ្លួនជនសង្សយ័បានដោយជោគជ័យអស់រយៈពេលជាង១០ថ្ងៃ ។ ទើបនៅថ្ងៃទី១៥ មិថុនា ឆ្នាំ២០១៨ កំលាំងកងរាជអាវុធហត្ថខេត្តកណ្តាល បានសហការជាមួយកំលាំងកងរាជអាវុធហត្ថលើផ្ទៃប្រទេស និងកំលាំងកងរាជអាវុធហត្ថខេត្តសៀមរាប បានឃាត់ខ្លួនជនសង្ស័យឈ្មោះ នឿន ណាត នៅចំណុចបន្ទប់ជួល ស្ថិតនៅភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប តាមដីកាបញ្ជាឲ្យចូលខ្លួនលេខ០១១ ដកបចខ/១៨ ចេញដោយព្រះរាជអាជ្ញានៃអយ្យការអមសាលាដំបូងខេត្តកណ្តាល និងដោយមានការសម្របសម្រួលដោយព្រះរាជអាជ្ញាអមសាលាដំបូងខេត្តសៀមរាប ។
ពាក់ព័ន្ធករណីក្លែងឯកសណ្ឋានអាវុធហត្ថ ប្រើប្រាស់អាវុធខុសច្បាប់ ឆបោក និងក្លែងឯកសារសាធារណៈ ហើយសមត្ថកិច្ចបានដកហូតវត្ថុតាងរួមមាន អាវុធខ្លី១ដើម ម៉ាក K59 លេខ ០៨៧៤ បង់ចំនួន១គ្រាប់ គ្រាប់កាំភ្លើងចំនួន៣គ្រាប់ សំបុត្របញ្ជាក់កំណើត១សន្លឹក អត្តសញ្ញាណប័ណ្ណជាតិខ្មែរថតចម្លង១សន្លឹក ពាក្យស្នើសុំស្នាក់នៅបណ្តោះអាសន្ន១សន្លឹក សេចក្តីចម្លងសំបុត្របញ្ជាក់កំណើត២សន្លឹក កាបូបស្ពាយពណ៌ខ្មៅចំនួន១ និងខោអាវឯកសណ្ឋានមួយចំនួន និងសម្ភារៈមួយចំនួនទៀត ។ បច្ចុប្បន្ន ជនសង្ស័យបានបញ្ជូនមកដល់កងរាជអាវុធហត្ថខេត្តកណ្តាល ដើម្បីបន្តនីតិវិធីតាមច្បាប់៕
ចែករំលែកព័តមាននេះ