រាជធានីភ្នំពេញ ៖ សមត្ថកិច្ចនគរបាលព្រហ្មទណ្ឌកម្រិតធ្ងន់ក្រសួងមហាផ្ទៃ កាលពីព្រឹកថ្ងៃទី១៧ មិថុនា ២០១៨ បានចាត់បញ្ជូនជនជាតិនីហ្សេរីយ៉ាម្នាក់ ទៅកាន់សាលាដំបូងរាជធានីភ្នំពេញពាក់ព័ន្ធលើបណ្តឹងស្ត្រីវៀតណាមម្នាក់ពីបទឆបោកប្រាក់ជាង៣០ម៉ឺនដុល្លារអាមេរិក ។ ជនសង្ស័យឈ្មោះ…
រាជធានីភ្នំពេញ ៖ សមត្ថកិច្ចនគរបាលព្រហ្មទណ្ឌកម្រិតធ្ងន់ក្រសួងមហាផ្ទៃ កាលពីព្រឹកថ្ងៃទី១៧ មិថុនា ២០១៨ បានចាត់បញ្ជូនជនជាតិនីហ្សេរីយ៉ាម្នាក់ ទៅកាន់សាលាដំបូងរាជធានីភ្នំពេញពាក់ព័ន្ធលើបណ្តឹងស្ត្រីវៀតណាមម្នាក់ពីបទឆបោកប្រាក់ជាង៣០ម៉ឺនដុល្លារអាមេរិក ។
ជនសង្ស័យឈ្មោះ REMIGUS DURU OKONKWO ហៅ USMAN ភេទប្រុស អាយុ៤៣ឆ្នាំ ជនជាតិនីហ្សេរីយ៉ា ។ ចំណែកជនរងគ្រោះជាជនជាតិវៀតណាមឈ្មោះ Darg Mai Nga ភេទស្រី អាយុ៣៨ឆ្នាំ ជនជាតិវៀតណាម មុខរបរជាអ្នកជំនួញ ។
មន្ត្រីនគរបាលព្រហ្មទណ្ឌបានឲ្យដឹងថា កាលពីល្ងាចថ្ងៃទី១៥ មិថុនា សមត្ថកិច្ចបានធ្វើការឃាត់ខ្លួនជនសង្ស័យខាងលើនេះនៅរាជធានីភ្នំពេញយោងតាមពាក្យបណ្តឹងរបស់ស្ត្រីជនជាតិវៀតណាមម្នាក់បានចោទប្រកាន់ពីឆបោកប្រាក់ចំនួន៣៥៦.០០០ដុល្លារអាមេរិក ។
យោងតាមពាក្យបណ្តឹងនោះបានបញ្ជាក់ថា កាលពីអំឡុងខែមករា ២០១៨ ដើមបណ្តឹងបានស្គាល់ជនសង្ស័យតាមរយៈប្រព័ន្ធបណ្តាញសង្គមហ្វេសប៊ុក ។ លុះថ្ងៃទី១០ មករា ជនសង្ស័យឈ្មោះ REMIGUS DURU OKONKWO ហៅ USMAN បានទៅទីក្រុងហាណូយប្រទេសវៀតណាម សុំជួបជាមួយជនរងគ្រោះដោយនិយាយលួងលោមបញ្ចុះបញ្ចូលឲ្យជនរងគ្រោះចូលហ៊ុន បើកសិប្បកម្មផលិតឥដ្ឋការ៉ូនៅប្រទេសកម្ពុជា ។
ជនសង្ស័យបានប្រើល្បិចនាំជនរងគ្រោះមកប្រទេសកម្ពុជា ដើម្បីមើលទីតាំងបង្កើតសិប្បកម្មផលិតឥដ្ឋការ៉ូដោយអះអាងថា មានមិត្តភក្តិនៅប្រទេសកម្ពុជានេះ ។ សមត្ថកិច្ចបន្តថាដោយមានការជឿទុក្ខចិត្តជនរងគ្រោះបានផ្តល់ប្រាក់ឲ្យជនសង្ស័យជាបន្តបន្ទាប់ចំនួន៥លើកសរុប៣៥៦.០០០ដុល្លារអាមេរិក តាមរយៈគណនេយ្យរបស់ពួកគេដែលបានផ្តល់ឲ្យគ្នាទៅវិញទៅមក ។
ក្រោយពេលបានវេ និងទទួលប្រាក់នោះហើយជនសង្ស័យបានបិទទូរស័ព្ទ និងគេចខ្លួនមិនអាចទាក់ទងបានមួយរយៈ ។ លុះថ្ងៃទី១៥ មិថុនា ជនសង្ស័យបានទូរស័ព្ទទៅជនរងគ្រោះថា សិប្បកម្មធ្វើជិតរួចរាល់ហើយឲ្យជនរងគ្រោះផ្តល់ប្រាក់ចំនួន១៥០.០០០ដុល្លារអាមេរិកបន្ថែមទៀត ។ ពេលនេះជនរងគ្រោះលែងទុក្ខចិត្តជនសង្ស័យហើយ តែក៏បានណាត់ជួបគ្នានៅប្រទេសកម្ពុជាទើបជនរងគ្រោះបានប្តឹងសមត្ថកិច្ចនគរបាលព្រហ្មទណ្ឌកម្រិតធ្ងន់ក្រសួងមហាផ្ទៃឲ្យចាប់ខ្លួន និងកសាងសំណុំរឿងបញ្ជូនទៅកាន់សាលាដំបូងរាធានីភ្នំចាត់ការនីតិវិធី ។ ដូច្នេះទើបបានសំណុំរឿបនេះតំណាងអយ្យការកំពុងដំណើរការទៅមុខយ៉ាងរលូន ៕
ចែករំលែកព័តមាននេះ