រាជធានីភ្នំពេញ ៖ អង្គការចៃកាគ្រោងអនុវត្តន៍នូវគម្រោងរៀបចំកែលំអប្រព័ន្ធប្រឡាយលូជំហានទី៤ នៅចុងឆ្នាំ២០១៨នេះជាមួយនឹងការរៀបចំស្ថានីយបូមទឹកបំពាក់ដោយឧបករណ៍ម៉ាស៊ីនបូមធូលី និងម៉ាស៊ីនចាប់សំរាមដោយស្វ័យប្រវត្តិតាមរយៈហិរញ្ញប្បទាន របស់ប្រទេសជប៉ុន ។ គម្រោងការនេះត្រូវបានបង្ហាញនៅក្នុងកិច្ចប្រជុំលើកិច្ចការងាររៀបចំ និងគិតគូរអំពីការពិនិត្យលទ្ធភាពលើគម្រោងទី៤ នៃគម្រោងរួមការការពារទឹកជំនន់ និងកែលំអប្រព័ន្ធប្រឡាយលូរបស់អង្គការចៃកាដែលបានធ្វើឡើងកាលពីរសៀលថ្ងៃទី ១៥ ខែមិថុនា ឆ្នាំ២០១៨ នៅរដ្ឋបាលរាជធានីភ្នំពេញ ស្ថិតក្នុងអធិបតីភាពលោក ឃួង ស្រេង អភិបាល រាជធានីភ្នំពេញ និងតំណាងអង្គការចៃកា និងមន្ត្រីជំនាញពាក់ព័ន្ធជាច្រើនរូបទៀត ។
លោកម៉េត មាសភក្តីអ្នកនាំពាក្យរដ្ឋបាលរាជធានីភ្នំពេញបានឲ្យដឹងនៅក្រោយកិច្ចប្រជុំថា គោលបំណងសំខាន់នៃកិច្ចប្រជុំនេះ គឺពិភាក្សាលម្អិតលើផលប៉ះពាល់មួយចំនួនដែលធ្វើឲ្យរាំងស្ទះលើការងារអនុវត្តន៍គម្រោង ។ លោកបន្តថា គម្រោងជំហានទី៤នៃការការពារទឹកជំនន់ និងកែលំអប្រព័ន្ធប្រឡាយលូនេះបាន ផ្តោតទៅលើការងារសំខាន់ៗ មួយចំនួនដូចជា ការងាររំដោះទឹកដែលការងារនេះចែកចេញជាពីរផ្នែក គោលបំណងធំទទួលបាននៅផ្នែកខាងជើងវត្តភ្នំ ក្នុងតំបន់ផ្លូវអម និងផ្លូវ១៤៧ចាប់ពីវត្តភ្នំ រហូតដល់រង្វង់មូលកួចកាណុងដែលមានផ្ទៃប្រមាណជិត៧០ហិកតានឹងត្រូវរៀបចំ និងគិតគូរឲ្យមានជាស្ថានីយបូមទឹក មួយកន្លែងដែលស្ថានីយបូមទឹកនេះជាស្ថានីយទី៥ ស្របតាមមាត់ទន្លេ ហើយមានទីតាំងនៅទល់មុខសួនច្បារក្រុមប្រឹក្សាអភិវឌ្ឍន៍សេដ្ឋកិច្ច (CDC) ។
នៅក្នុងស្ថានីយបូមទឹកនេះនឹងរៀបចំឲ្យមានអាងស្តុកទឹកក្រោមដីដែលមានសមត្ថភាពអាចស្តុកទឹកប្រមាណ៦.០០០ម៉ែត្រគូប មុននឹងធ្វើការបូមទម្លាក់ទឹកភ្លៀងពីអាងស្តុកទឹកចូលទៅក្នុងទន្លេ ។ បន្ថែមពីការរៀបចំស្ថានីយបូមទឹកនេះនឹងមានការដំឡើងនូវម៉ាស៊ីនសម្រាប់បូមធូលី ឬសំរាមដោយស្វ័យប្រវត្តិ ហើយឧបករណ៍នេះនឹងយកទៅបំពាក់នៅគ្រប់ស្ថានីយទាំង៤ នៅជាប់មាត់ទន្លេ គឺស្ថានីយបូមទឹកផ្សារចាស់ ស្ថានីយព្រះគម្លង់ ស្ថានីយផ្សារកណ្តាល និងស្ថានីយចតុមុខដែលស្ថាបនារួចតាំងពីគម្រោងជំហានទី២មកម្ល៉េះ ។ លោកបន្តថា អត្ថប្រយោជន៍នៃការសម្រួលផ្ទៃទឹកនៅក្នុងតំបន់ទួលគោក ស្ថិតក្នុងសង្កាត់ បឹងកក់១សង្កាត់ បឹងកក់២ ។
ក្នុងគម្រោងនឹងមានការរៀបចំដាក់ប្រព័ន្ធបណ្តាញលូក្នុងហំចន្លោះចាប់ពី២ម៉ែត្រ ទី២,៥០ម៉ែត្រចម្ងាយប្រមាណជិត៧គីឡូម៉ែត្រ និងការដាក់លូប្រអប់ប្រវែង១,៥គីឡូម៉ែត្រ ។ គម្រោងទាំង២នេះ គឺអាចធ្វើការរំដោះឬដោះស្រាយបញ្ហាជំនន់ទឹកភ្លៀងបានមួយភាគបន្ថែមទៀត នៅក្នុងតំបន់ខាងលើនេះ ហើយនេះជាចំណែកមួយនៃជំហានទី៤នៃគម្រោងការពារទឹកជំនន់ និងកែលំអប្រព័ន្ធប្រឡាយលូដែលនឹងត្រូវអនុវត្តន៍ និងប្រើប្រាស់ក្នុងរយៈពេល៣ឆ្នាំហើយ នឹងអាចដំណើរការគម្រោងនៅខែកញ្ញា ឆ្នាំ២០១៨ ខាងមុខនេះ ៕
ចែករំលែកព័តមាននេះ