រាជធានីភ្នំពេញ ៖ គ្រោះថ្នាក់ចរាចរណ៍ដ៏រន្ធត់មួយកើតបានឡើងដោយសាររថយន្តកុងតឺន័រមួយគ្រឿងអ្នកបើកបរស្រវឹងជោកបើកបោះពួយល្បឿនលឿនហើយគេចពីម៉ូតូខាងមុខ រួចក៏រេចង្កូតទៅខាងឆ្វេងបុកចូលយានដ្ឋានជួសជុលរថយន្ត បណ្តាលឲ្យមានមនុស្សស្លាប់ម្នាក់ និងរងរបួសធ្ងន់ស្រាល៤នាក់ ហើយរថយន្តកុងតឺន័រនោះបន្តទៅបុកចូលផ្ទះលក់គ្រឿងសំណង់មួយទៀត បណ្តាលឲ្យរងការខូចខាតសម្ភារៈជាច្រើនកាលពីវេលាម៉ោង១០យប់ថ្ងៃទី១៦ ខែមិថុនា ឆ្នាំ២០១៨ ស្ថិតនៅតាមផ្លូវជាតិលេខ៣ ភូមិព្រីងត្បូង១ សង្កាត់ចោមចៅ២ ខណ្ឌពោធិសែនជ័យ ។
រថយន្តបង្កខាងលើជាប្រភេទកុងតឺន័រ ពណ៌ស ពាក់ស្លាកលេខ ព្រះសីហនុ ៣A-២៥៨៨ ជារថយន្តរបស់ក្រុមហ៊ុនដឹកជញ្ជូនមួយ ដែលមានទីតាំងស្ថិតនៅតាមផ្លូវជាតិលេខ៣ ភូមិក្រាំងដូនទៃ សង្កាត់ចោមចៅ២ ខណ្ឌពោធិសែនជ័យ បើកបរដោយឈ្មោះ ផល សុភាព ភេទប្រុស អាយុ៣៣ឆ្នាំ មុខរបរបើកបររថយន្ត មានទីលំនៅភូមិផល ឃុំវាលពង់ ស្រុកឧត្តុង្គ ខេត្តកំពង់ស្ពឺ បច្ចុប្បន្នស្នាក់នៅជាមួយប្រពន្ធឈ្មោះ ឡាយ អឿន អាយុ៣៧ឆ្នាំ រស់នៅឃុំទួលអំពិល ស្រុកបសេដ្ឋ ខេត្តកំពង់ស្ពឺ ត្រូវបានសមត្ថកិច្ចឃាត់ខ្លួន ។
ផ្ទះដែលរងគ្រោះខាងលើរួមមាន ទី១-យានដ្ឋានជួសជុលរថយន្តយីហោ ប៊ុន ថុល បណ្តាលឲ្យស្លាប់ក្មេងស្រីម្នាក់ឈ្មោះ ហុក គីមឆាយ អាយុ១៤ឆ្នាំ ចំណែកបុរសម្នាក់ និងស្ត្រីម្នាក់បានរងរបួសធ្ងន់ រីឯមនុស្ស៣នាក់ទៀតបានរងរបួសស្រាល ។ ទី២-ផ្ទះលក់គ្រឿងសំណង់យីហោ ទ្រី សុខុម រងការខូចខាតខ្ទេចល្វែងខាងមុខ រួមទាំងទ្រព្យសម្បត្តិ រថយន្តចំនួន៣គ្រឿង និងកិនខ្ទេចម៉ូតូមួយគ្រឿង ។
តាមពលរដ្ឋដែលឃើញហេតុការណ៍បានឲ្យដឹងថា មុនកើតហេតុ រថយន្តកុងតឺន័រខាងលើបើកបរពីទិសខាងជើងទៅទិសខាងត្បូង អ្នកបើកបរស្រវឹងជោកបើកបរក្នុងល្បឿនលឿន ហើយបើកបរបណ្តើរ ស្រែកហៅគេឯងតាមផ្លូវឲ្យឡើងជិះបណ្តើរ លុះដល់ចំណុចកើតហេតុ គេចពីម៉ូតូខាងមុខ រួចក៏រេចង្កូតឆ្លងផ្លូវទៅខាងឆ្វេងបុកចូលយានដ្ឋានជួសជុលរថយន្ត ហើយធ្លាយទៅបុកចូលផ្ទះលក់គ្រឿងសំណង់ ទើបទៅមុខលែងរួច បណ្តាលឲ្យស្លាប់ក្មេងស្រីម្នាក់ របួសធ្ងន់២នាក់ របួសស្រាល៣នាក់ និងខូចខាតសម្ភារៈជាច្រើនទៀត ក្នុងនោះខូចខាតរថយន្តចំនួន៣គ្រឿង ។
ក្រោយកើតហេតុ ជនរងគ្រោះទាំង២នាក់ដែលរងរបួសធ្ងន់ត្រូវបានដឹកបញ្ជូនទៅសង្គ្រោះនៅមន្ទីរពេទ្យ ចំណែកអ្នកបើកបររថយន្តកុងតឺន័រខាងលើត្រូវបានឃាត់ខ្លួន ចំណែករថយន្តកុងតឺន័រក្រោយពីសមត្ថកិច្ចជំនាញចុះទៅពិនិត្យរួច បានយកទៅរក្សាទុកនៅការិយាល័យចរាចរណ៍ជើងគោកក្រុងភ្នំពេញ ដើម្បីកសាងសំណុំរឿង ចាត់ការទៅតាមនីតិវិធី ៕
ចែករំលែកព័តមាននេះ