ខេត្តកំពង់ធំ ៖ ករណីទី១ – ប្រទះឃើញសាកសពបុរសម្នាក់ស្លាប់នៅក្នុងចម្ការក្រញូងបានបង្កការភ្ញាក់ផ្អើលកាលពីរសៀលថ្ងៃទី១៥ ខែមិថុនា ឆ្នា២០១៨ នៅចំណុចចម្ការក្រញូង (រដ្ឋបាលព្រៃឈើខេត្តកំពង់ធំដាំ) ស្ថិតនៅតំបន់អូរបឹងរូងកណ្តាល…
ខេត្តកំពង់ធំ ៖ ករណីទី១ – ប្រទះឃើញសាកសពបុរសម្នាក់ស្លាប់នៅក្នុងចម្ការក្រញូងបានបង្កការភ្ញាក់ផ្អើលកាលពីរសៀលថ្ងៃទី១៥ ខែមិថុនា ឆ្នា២០១៨ នៅចំណុចចម្ការក្រញូង (រដ្ឋបាលព្រៃឈើខេត្តកំពង់ធំដាំ) ស្ថិតនៅតំបន់អូរបឹងរូងកណ្តាល ក្នុងភូមិសាស្ត្រ ភូមិថ្មសំលៀង ឃុំក្រយា ស្រុកសន្ទុក ខេត្តកំពង់ធំ ។
នគរបាលមូលដ្ឋានបានឲ្យដឹងថា សពជនរងគ្រោះមានឈ្មោះ សៀន ណៃ ភេទប្រុស អាយុ៣៦ឆ្នាំ មុខរបរកម្មករធ្វើផ្ទះ មានទីលំនៅភូមិបាក់ស្នាលើ ឃុំបាក់ស្នា ស្រុកបារាយណ៍ ខេត្តកំពង់ធំ ។
បើយោងតាមប្រភពព័ត៌មានពីក្រុមគ្រួសារជនរងគ្រោះបានឲ្យដឹងថា មុនពេលកើតហេតុជនរងគ្រោះបានមកធ្វើផ្ទះឲ្យឈ្មោះ ណុល ភេទប្រុស នៅតំបន់អូរបឹងរូងកណ្តាលនេះជាមួយឪពុកក្មេកឈ្មោះ ងេស ហុន និងឈ្មោះ ហៀ ហុន ជាមេជាងតាំងពីថ្ងៃទី៣១ ខែឧសភា ឆ្នាំ២០១៨ ពេលធ្វើការបានពីរថ្ងៃឪពុកក្មេកឃើញកូនចេះតែត្អូញថា មិនសូវស្រូលខ្លួនលុះដល់ថ្ងៃទី០២ ខែមិថុនា ២០១៨ ពេលយប់ជនរងគ្រោះជាកូនប្រសារមិនមកដេកជាមួយគាត់ទេ គឺបានទៅដេកជាមួយនឹងមេជាងឈ្មោះ ហៀ ហុន នៅផ្ទះផ្សេងគ្នាលុះព្រឹកឡើងវេលាម៉ោង៦ព្រឹក ថ្ងៃទី០៣ ខែមិថុនា មេជាងបានមកសួរគាត់ថា មានឃើញអាណៃ (រងគ្រោះ) ដែអត់ គាត់បានឆ្លើយថា មិនឃើញទេក៏បាននាំគ្នាដើររកតាមចម្ការ តែរកមិនឃើញរហូតដល់ថ្ងៃទី០៤ ខែមិថុនា ឈ្មោះ ហុន ឡុង ត្រូវជាប្រពន្ធជនរងគ្រោះបាននាំអ្នកភូមិគ្នា៦នាក់ ម៉ូតូ៣គ្រឿងមកដល់បាននាំគ្នាដើររុករកតាមចម្ការពេញមួយព្រឹកធំ នៅតែមិនឃើញក៏នាំគ្នាវិលត្រឡប់ទៅផ្ទះវិញ ។
រហូតដល់ថ្ងៃទី១៥ ខែមិថុនា ទើបលោកហេង ទ្រី ភេទប្រុស អាយុ៥២ឆ្នាំ ជាមន្ត្រីកិច្ចសន្យារដ្ឋបាលព្រៃឈើឈរជើងនៅតំបន់អូបឹងរូងលោកបានដើរពិនិត្យក្នុងចម្ការក្រញូង ក៏បានធំក្លិនស្អុយ គាត់សង្ស័យថា ក្រែងមានសត្វព្រៃជាប់អន្ទាក់ស្លាប់ ហើយចេះតែដើរស្រង់ក្លិនរកមើលក៏បានប្រទះឃើញសាកសពដេកស្លាប់ផ្កាប់មុខ មានសភាពរលួយសាច់អស់ ឃើញតែគ្រោងឆ្អឹងក៏បានទៅផ្តល់ព័ត៌មានឲ្យលោក ឈឹម សារឹត ជានគរបាលនៅទីនោះ បន្ទាប់ពីដឹងព័ត៌មាននេះភ្លាមកម្លាំងជំនាញបានសហការគ្នាចុះដល់កន្លែងកើតហេតុ ដើម្បីពិនិត្យសពឃើញថា សពជនរងគ្រោះស្លាប់ដោយសារខ្យល់គរ ដួលផ្កាប់មុខស្លាប់តែម្តង ក្រោយពីពិនិត្យចប់សព្វគ្រប់រួចបានប្រគល់ជូនក្រុមគ្រួសារយកធ្វើបុណ្យតាមប្រពៃណី ។
ករណីទី២- បុរសម្នាក់រាយខ្សែភ្លើងកាត់អុសខុសបច្ចេកទេសឆក់ស្លាប់ដែលបានកើតឡើងកាលពីរសៀលនៅថ្ងៃទី១៥ ខែមិថុនា ឆ្នាំ២០១៨ នៅភូមិប្រាសាទ ឃុំព្រះដំរី ស្រុកស្ទោង ខេត្តកំពង់ធំ សមត្ថកិច្ចប្រាប់ថា សពជនរងគ្រោះឈ្មោះ ខៀវ យីម ភេទប្រុស អាយុ៤៣ឆ្នាំ រស់នៅភូមិកើតហេតុខាងលើ ។
តាមការបំភ្លឺពីប្រពន្ធជនរងគ្រោះនាងឈ្មោះ អុល ហ៊ង អាយុ៣៧ឆ្នាំ បានបញ្ជាក់ថា នៅម៉ោងប្រហែល៣ រសៀលរូបគាត់ និងប្តីបានមកពីជួសស្រូវពង្រោះវិញប្តីរបស់គាត់បានប្រើឲ្យគាត់ដោតព្រីភ្លើងនៅលើផ្ទះ ដើម្បីឲ្យគាត់កាត់អុស និងម៉ូទ័រពេលដោតឌុយឲ្យប្តីគាត់រួច រូបគាត់ក៏យកអំបោសបោសផ្ទះសិន តែពុំឮសម្លេងប្តីកាត់អុសសោះដូចសព្វដង គាត់ក៏បានចុះពីលើផ្ទះមកមើល ស្រាប់តែឃើញប្តីគាត់ត្រូវខ្សែភ្លើងឆក់ដួលផ្ងាពោះ ដៃស្តាំក្តាប់ព្រីភ្លើង ដៃឆ្វេងក្តាប់ឌុយម៉ូទ័រ ឃើញដូច្នោះគាត់ក៏ស្រែកឆោរឡោរឡើងហៅអ្នកជិតខាងឲ្យជួយ និងរត់ទៅដកឌុយពីព្រីភ្លើងវិញ តែប្តីគាត់បានស្លាប់ទៅហើយ ចំណែកសមត្ថកិច្ចយើងបានចុះដល់កន្លែងកើតហេតុ ធ្វើការពិនិត្យសពឃើញថា ជនរងគ្រោះមានស្នាមឆេះខ្លោចបាតដៃឆ្វេង និងម្រាមដៃពិតជាស្លាប់ដោយខ្សែភ្លើងឆក់ពិតប្រាកដមែន ។
មូលហេតុការធ្វេសប្រហែសរបស់ជនរងគ្រោះចាប់ចំតំណរខ្សែភ្លើងអត់មានរុំបណ្តាលឲ្យឆក់ស្លាប់ ហើយក៏ប្រគល់ឲ្យសាច់ញាតិធ្វើបុណ្យតាមប្រពៃណី ៕
ចែករំលែកព័តមាននេះ