រាជធានីភ្នំពេញ ៖ បុរស២នាក់បងប្អូនបានរងរបួសធ្ងន់ម្នាក់ និងស្រាលម្នាក់ ខណៈជិះម៉ូតូឌុបគ្នា អត់មានភ្លើងបំភ្លឺផ្លូវជ្រុលទៅបុកពីក្រោយម៉ូតូមួយគ្រឿងទៀតម៉ាកសាន់យ៉ាន់កញ្ចាស់ អត់មានភ្លើងពីក្រោយ កាលពីវេលាម៉ោង១រំលងអធ្រាត្រឈានចូលថ្ងៃទី១៧ ខែមិថុនា ឆ្នាំ២០១៨…
រាជធានីភ្នំពេញ ៖ បុរស២នាក់បងប្អូនបានរងរបួសធ្ងន់ម្នាក់ និងស្រាលម្នាក់ ខណៈជិះម៉ូតូឌុបគ្នា អត់មានភ្លើងបំភ្លឺផ្លូវជ្រុលទៅបុកពីក្រោយម៉ូតូមួយគ្រឿងទៀតម៉ាកសាន់យ៉ាន់កញ្ចាស់ អត់មានភ្លើងពីក្រោយ កាលពីវេលាម៉ោង១រំលងអធ្រាត្រឈានចូលថ្ងៃទី១៧ ខែមិថុនា ឆ្នាំ២០១៨ ស្ថិតនៅតាមបណ្តោយផ្លូវជាតិលេខ៣ ភូមិព្រៃកី សង្កាត់ភ្លើងឆេះរទេះ ខណ្ឌពោធិសែនជ័យ ។
ជនរងគ្រោះដែលរងរបួសធ្ងន់ ឈ្មោះ ព្រាប ផល្លី ភេទប្រុស អាយុ២២ឆ្នាំ ត្រូវជាប្អូន មានទីលំនៅភូមិជំនាងចាស់ ឃុំពោធិអង្គ្រង ស្រុកបសេដ្ឋ ខេត្តកំពង់ស្ពឺ ចំណែកជនរងគ្រោះដែលរងរបួសស្រាល ឈ្មោះ ព្រាប ផល្លា ភេទប្រុស អាយុ២៥ ឆ្នាំ ត្រូវជាបង ។ ទាំង២នាក់បងប្អូនជិះម៉ូតូមួយគ្រឿងម៉ាក MSX ពណ៌ស ពាក់ស្លាកលេខ ភ្នំពេញ ១FW-៤៥៤០ ។
តាមសម្តីជនរងគ្រោះដែលរងរបួសស្រាលបានឲ្យដឹងថា មុនកើតហេតុ ពួកគាត់ទើបចេញពីផ្ទះបងនៅក្បែររង្វង់មូលចោមចៅ ក្នុងគោលបំណងទៅផ្ទះវិញ ធ្វើដំណើរតាមផ្លូវជាតិលេខ៣ ពីជើងទៅត្បូង ជិះម៉ូតូមួយគ្រឿងឌុបគ្នាអត់មានភ្លើងបំភ្លឺផ្លូវ លុះមកដល់ចំណុចកើតហេតុ មើលមិនឃើញក៏ជ្រុលទៅបុកពីក្រោយម៉ូតូសាន់យ៉ាន់កញ្ចាស់មួយគ្រឿងអត់មានភ្លើងក្រោយ ជិះគ្នា៣នាក់ បណ្តាលឲ្យម៉ូតូម៉ាក MSX ដួល ចំណែកជនរងគ្រោះជាប្អូនរងរបួសធ្ងន់ រីឯជនរងគ្រោះជាបងរងរបួសស្រាល ចំណែកម៉ូតូមួយគ្រឿងទៀតម៉ាកសាន់យ៉ាន់ មិនបានដួលនោះទេ រួចឈប់ម៉ូតូចុះមកសាកសួរ បន្ទាប់មកក៏បន្តដំណើរទៅបាត់ ។
ក្រោយកើតហេតុ ជនរងគ្រោះត្រូវបានរថយន្តសង្គ្រោះរបស់របស់អង្គភាព៧១១ដឹកបញ្ជូនទៅមន្ទីរពេទ្យ ចំណែកម៉ូតូរបស់ជនរងគ្រោះត្រូវបានសមត្ថកិច្ចប្រគល់ទៅឲ្យជនរងគ្រោះព្រមទាំងសាច់ញាតិ យកទៅជួសជុលដោយខ្លួនឯង ៕
ចែករំលែកព័តមាននេះ