សហរដ្ឋអាមេរិក៖ក្រុងវ៉ាសិុនតោនប្រកាសនាថ្ងៃទី១៤មិថុនាថា សមយុទ្ធយោធារួមរបស់ខ្លួនជាមួយកូរ៉េខាងត្បូង ចាប់ពីពេលនេះតទៅផ្អាកគ្មានកាលកំណត់ ទោះបីជាទណ្ឌកម្មប្រឆាំងកូរ៉េខាងជើង ដើម្បីបង្ខំប្រទេសនេះឲ្យបោះបង់ចោលជាស្ថាពរ កម្មវិធីអាវុធនុយក្លេអ៊ែររបស់ខ្លួននៅរក្សាទុកក្ដី។
២ថ្ងៃក្រោយការប្រកាសគួរឲ្យភ្ញាក់ផ្អើលរបស់ប្រធានាធិបតីអាមេរិក លោកដូណាល់ត្រាំបញ្ឈប់សមយុទ្ធបង្កហេតុ ក្រោយការជួបគ្នាកំពូលជាប្រវត្តិសាស្រ្ត ជាមួយមេដឹកនាំកូរ៉េខាងជើងលោកគីមជុងអ៊ុន អ្នកទទួលខុសត្រូវជាន់ខ្ពស់អាមេរិកមួយរូប គូសបញ្ចាក់ប្រាប់ AFP ថាសមយុទ្ធយោធាសំខាន់ៗត្រូវផ្អាកគ្មានពេលកំណត់នៅឧបទ្វីបកូរ៉េ។
រដ្ឋមន្រ្តីការបរទេសអាមេរិកលោក MIKE POMPEO បានជួបនៅក្រុងសេអ៊ូលជាមួយសម្ព័ន្ធមិត្តកូរ៉េខាងត្បូងនិងជប៉ុន មុនពេលលោកមកកាន់ក្រុងប៉េកាំង ជួបជាមួយប្រធានាធិបតីចិនលោកសីុជីនពីង ដែលស្វាគមន៍ដល់ជោគជ័យនៃការជួបគ្នាកំពូល ។ នៅក្រុងសេអ៊ូលប្រមុខការទូតអាមេរិក អះអាងជាថ្មីថាទិសដៅរបស់យើងនៅតែទាមទារឲ្យមានការរំសាយនុយក្លេអ៊ែរទាំងស្រុង អាចត្រួតពិនិត្យបាននិងពុំមានការប្រែក្រឡាស់របស់កូរ៉េខាងជើង។
លោក POMPEO អះអាងម៉្យាងទៀតថាការបញ្ឈប់សមយុទ្ធយោធារួមរវាងក្រុងវ៉ាសិុនតោននិងកូរ៉េខាងត្បូង មានលក្ខខណ្ឌគឺបន្តការចរចាដោយស្ថាបនានិងស្មោះសជាមួយកូរ៉េខាងជើង ដើម្បីអនុវត្តកិច្ចព្រមព្រៀងសិង្ហបុរី។
កូរ៉េខាងជើងទាមទារចាប់តាំងពីយូរមកហើយ ឲ្យបញ្ឈប់សមយុទ្ធយោធារួមទាំងនេះ ដែលខ្លួនចាត់ទុកថា ជាការរៀបចំសម្រាប់លុកលុយចូលដែនដីខ្លួន។ក្រុងព្យុងយ៉ាងតែងមានប្រតិកម្មតប ដោយធ្វើសមយុទ្ធយោធានានារបស់ខ្លួនដែរ ៕
ចែករំលែកព័តមាននេះ