ប្រទេសយេម៉ែន៖ការប្រយុទ្ធគ្នាយ៉ាងសាហាវនានា បណ្ដាលឲ្យមនុស្សស្លាប់៣៥នាក់កាលពីថ្ងៃទី១៤មិថុនា ក្នុងចំណោមពួកឧទ្ទាមនិងកងទាហានរដ្ឋាភិបាល នៅច្រកចូលកំពង់ផែ HODEIDA ភាគខាងលិចយេម៉ែន នាថ្ងៃទី២នៃការវាយលុកសំដៅដណ្ដើមយកទីក្រុងនេះពីពួកឧទ្ទាម នាំឲ្យមានការភ័យខ្លាចពីការកាត់ផ្ដាច់ជំនួយមនុស្សធម៌។
ក្រុមប្រឹក្សាសន្តិសុខអង្គការសហប្រជាជាតិ ស្នើឲ្យកំពង់ផែនៃទីក្រុងនោះនៅតែបើក ចៀសវាងកុំឲ្យមានភាពធ្ងន់ធ្ងរដល់វិបត្តិមនុស្សធម៌ដែលចាត់ទុកថាអាក្រក់បំផុតស្រាប់នៃពិភពលោក។
យោងតាមប្រភពយោធានិងមន្ទីរពេទ្យថា ការប្រយុទ្ធគ្នាកើតមាន នៅកន្លែងមួយចម្ងាយ២គីឡូម៉ែត្រពីច្រកចូលព្រលានយន្តហោះក្រុងHODEIDA និងនៅច្រកចេញខាងត្បូងនៃទីក្រុងនេះ ដែលមានកំពង់ផែសំខាន់សម្រាប់បញ្ចូនជំនួយមនុស្សធម៌ក្នុងប្រទេស។
ឧទ្ធម្ភាគចក្រប្រយុទ្ធធុន APACHE ៣គ្រឿងរបស់ក្រុមយោធាចម្រុះនាំមុខដោយអារ៉ាប៊ីសាអ៊ូឌីត បានជួយវាយប្រហារទ្រទ្រង់ដល់កងទ័ពរដ្ឋាភិបាលយេម៉ែនប្រឆាំងពួកឧទ្ទាម។ពួកឧទ្ទាមហ៊ូធីបានតតាំងវិញយ៉ាងសាហាវចំពោះកងទ័ពរដ្ឋាភិបាល។ខ្មាន់កាំភ្លើងរបស់ពួកគេបានពួនស្ទាក់បាញ់ប្រហារកងទាហានរដ្ឋាភិបាលបណ្ដាលឲ្យស្លាប់និងរបួសច្រើននាក់ ៕
ចែករំលែកព័តមាននេះ