សហរដ្ឋអាមេរិក ៖ ប្រធានាធិបតីអាមេរិកលោក ដូណាល់ត្រាំជួបប្រទះរឿងអាស្រូវថ្មីមួយទៀត ។អគ្គរដ្ឋអាជ្ញារដ្ឋញូវយ៉ក លោកស្រី BARBARA UNDERWOOD បានប្ដឹងលោកត្រាំនៅតុលាការកាលពីថ្ងៃទី១៤មិថុនា ដោយចោទលោកថាពង្វាងយកប្រាក់ពីមូលនិធិលោកផ្ទាល់សម្រាប់គោលដៅផ្ទាល់ខ្លួន។
ភ្លាមៗលោកត្រាំបានបរិហារការចោទប្រកាន់នោះថា ជារឿងគួរឲ្យអស់សំណើច ។ តាម TWITTER លោកចោទពួកអ្នកប្រជាធិបតេយ្យដែលដឹកនាំរដ្ឋញូវយ៉កថាធ្វើអ្វីគ្រប់យ៉ាងដើម្បីវាយប្រហារលោកនៅតុលាការ។
ក្រៅពីប្រធានាធិបតីអាមេរិក លោកស្រីអគ្គរដ្ឋអាជ្ញារូបនេះក៏ប្ដឹងកូន៣នាក់របស់លោកត្រាំគឺលោក DONALD JR. លោក ERIC និងលោកស្រីអីុវ៉ានកា ដែលសុទ្ធតែជាសមាជិកក្រុមប្រឹក្សាភិបាលមូលនិធិនោះ ។ លោកត្រាំត្រូវចោទថា ប្រើប្រាស់ប្រាក់មូលនិធិចំណាយលើការចាយវាយផ្ទាល់ខ្លួនជាច្រើននិងផ្សាយពាណិជ្ជកម្មបណ្ដាសណ្ឋាគារនិងសហគ្រាសឯទៀតៗរបស់លោក។
យោងតាមលោកស្រីអគ្គរដ្ឋអាជ្ញារូបនេះថា ការសើុបអង្កេតក៏បង្ហាញផងដែរថាមូលនិធិត្រូវបានដកយកដល់ទៅ 2,8លានដុល្លារដើម្បីប្រើប្រាស់ក្នុងយុទ្ធនាការឃោសនាបោះឆ្នោតឆ្នាំ២០១៦ ដែលរំលោភបំពានច្បាប់អាមេរិក ។
រដ្ឋញូវយ៉កទាមទារឲ្យរំលាយចោលមូលនិធិនេះហើយទារប្រាក់2,8លានដុល្លារមកវិញ ។ លោកស្រីក៏ទាមទារដែរឲ្យលោកត្រាំត្រូវហាមឃាត់មិនឲ្យដឹកនាំអង្គការនេះនៅញូវយ៉ករយៈពេល១០ឆ្នាំ ចំណែកកូនៗលោកហាមឃាត់មិនឲ្យដឹកនាំមូលនិធិរយៈពេល១ឆ្នាំ ៕
ចែករំលែកព័តមាននេះ