រាជធានីភ្នំពេញ ៖ ឪពុកចិត្តសាមាន្យម្នាក់ ដែលបានប្រើប្រាស់ហិង្សាយ៉ាងព្រៃផ្សៃលើកូនប្រុសអាយុ៤ឆ្នាំ ដោយការវាយនិងទាត់ធាក់ ហើយត្រូវបានគេថតបង្ហេាះតាមបណ្តាញទំនាក់ទំនងសង្គមហ្វេសប៊ុក កាលពីពេលថ្មីៗនេះ បានត្រូវនគរបាលនៃនាយកដ្ឋានប្រឆាំងការជួញដូរមនុស្ស និងការពារអនីតិជននៃ អគ្គស្នង ការដ្ឋាននគរបាលជាតិ សហការជាមួយនគរបាលប៉ុស្តិ៍ស្ទឹងមានជ័យទី១ ធ្វើការឃាត់ខ្លួនដល់លំនៅឋានលេខ៧៣ ដែលជាផ្ទះម្តាយក្មេក ស្ថិតតាមផ្លូវលេខ២១៧ ក្នុងសង្កាត់ស្ទឹងមានជ័យទី១ ខណ្ឌមានជ័យ កាល ពីព្រឹកថ្ងៃទី១៥ មិថុនា ។
ការឃាត់ខ្លួននេះ ដឹកនាំដោយលោកវរសេនីយ៍ឯក ឡៅ លីន នាយការិយាល័យប្រឆាំងការជួញដូរមនុស្សនិងការពារអនីតិជន និងមានការសម្របសម្រួលពីព្រះរាជអាជ្ញារងអមសាលាដំបូងរាជធានីភ្នំពេញផងដែរ ។ បុរសជាឪពុកកំណាចរូបនេះ ឈ្មេាះ ហ៊ិន សុផាន់ណា អាយុ៣៩ឆ្នាំ ជាអតីតអ្នកប្រដាល់ ចំណែកកូនប្រុសដែលរងគ្រោះឈ្មេាះ ហេង ឡិថុន អាយុ៤ឆ្នាំ ។
ការដែលកូនប្រុសមាននាមត្រកូលខុសពីឪពុកដូចនេះ ត្រូវបានប្រាប់ថា ដោយសារយកត្រកូលខាងម្តាយ ។នាយប៉ុស្តិ៍នគរបាលស្ទឹងមានជ័យទី១ លោក ម៉ៅ សាវឿន ឱ្យដឹងថា បុរសជាឪពុករូបនេះ ជាមនុស្សប្រើ ប្រាស់ថ្នាំញៀន និងជាមនុស្សផឹកស្រាជាប្រចាំថ្ងៃផងដែរ ហើយតែងតែកើតមានចិត្តខឹង និងប្រាស់ប្រាស់ហិង្សាក្នុងគ្រួសារជានិច្ច ។
ចំណែកកូនប្រុសដែលរងគ្រេាះ គឺជាកូនទី៣ និងជាកូនពៅផងដែរ ។ មន្ត្រីដដែលឱ្យដឹងថា ការសម្រេចឃាត់ខ្លួនបុរសជាឪពុកនេះ គឺធ្វើឡើងក្រោមបទបញ្ជាផ្ទាល់ពីលោកនាយឧត្តមសេនីយ៍ នេត សាវឿន
អគ្គស្នងការនគរបាលជាតិ បន្ទាប់ពីបុរសនេះ បានប្រើហិង្សាវាយដំកូនប្រុសយ៉ាងសាហាវ ហើយថតជាវីដេអូបង្ហេាះតាមបណ្តាញសង្គមហ្វេសបុ៊ក កាលពីប៉ុន្មានថ្ងៃមុន ។ អំពើហិង្សាដ៏សាហាវនេះ ធ្វើឱ្យបងប្អូនប្រជា ពលរដ្ឋដែលនិយមលេងហ្វេសប៊ុក នាំគ្នារិះគន់និងកើតចិត្តខឹងសម្បាយ៉ាងខ្លាំង ដែលតាមរយៈវីដេអូឃ្លីបនេះ គឺបានវាយដោយឈើរហូតបាក់ ហើយទាត់ធាក់ដួលដេកត្រឡប់ត្រឡិនមិនដឹងថា តើគ្នាឈឺចុកចាប់យ៉ាងណានោះទេ គឺពិតជាអាសូរពន់ពេកណាស់ ។
តើគ្នាខុសអ្វី ទើបបានជាដាក់ទោសយ៉ាងព្រៃផ្សៃបែបនេះ? ជំុវិញអំពើហិង្សាមួយនេះ ពំុមានប្រភពណាអះអាងឱ្យដឹងពីមូលហេតុ អ្វីដែលនាំឱ្យឪពុករូបនេះ ប្រើប្រាស់ហិង្សាលើកូនខ្លួនឯងដល់ថ្នាក់នេះឡើយ ។
យ៉ាងណាមិញ ក្រោយការឃាត់ខ្លួន បុរសខាងលើត្រូវបាននាំទៅកាន់នាយកដ្ឋានប្រឆាំងការជួញដូរមនុស្សនិងការពារអនីតិជននៃអគ្គស្នងការដ្ឋានគរបាលជាតិ ដើម្បីសាកសួរនិងបន្តនីតិវិធីតាមផ្លូវច្បាប់ ៕
ចែករំលែកព័តមាននេះ