ខេត្តប៉ៃលិន ៖ ប្រជាពលរដ្ឋរស់នៅជាប់តំបន់ព្រំដែនអន្តរជាតិព្រំ បាននិយាយថា រយៈពេលចុងក្រោយនេះ តម្លៃដីឡូត៍ដែលក្រុមឈ្មួញពុះលក់ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ស្ទុះឡើងយ៉ាងខ្លាំង ដោយ១ម៉ែត្រការ៉េតម្លៃរហូតដល់២៥ទៅ៤០ដុល្លារ…
ខេត្តប៉ៃលិន ៖ ប្រជាពលរដ្ឋរស់នៅជាប់តំបន់ព្រំដែនអន្តរជាតិព្រំ បាននិយាយថា រយៈពេលចុងក្រោយនេះ តម្លៃដីឡូត៍ដែលក្រុមឈ្មួញពុះលក់ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ស្ទុះឡើងយ៉ាងខ្លាំង ដោយ១ម៉ែត្រការ៉េតម្លៃរហូតដល់២៥ទៅ៤០ដុល្លារ ដែលជាហេតុធ្វើឱ្យក្រុមឈ្មួញរត់ការសុំច្បាប់គ្រប់មន្ទីរ សា្ថប័នពាក់ព័ន្ធ ហើយយកគ្រឿងចក្រទៅជីកកាយដីភ្នំយកធ្វើជាកម្មសិទ្ធិ និងជីកយកអាចម៍ដីទៅចាក់លុបបំពេញដីទំនាប ឬអូរជ្រៅៗ ដើម្បីពុះលក់យ៉ាងគគ្រឹកគគ្រេង ។
ប្រជាពលរដ្ឋរស់នៅភូមិផ្សារព្រំ និយាយថា ៖« ដីនៅជាប់នឹងព្រំដែនបច្ចុប្បន្នមានតម្លៃឡើងខ្ពស់ខុសពីធម្មតា ដោយកាលពីមុន គេគ្រាន់តែពុះអង្កន់លក់ក្នុង១ប្លង់ ដែលមានបណ្តោយប្រវែង២០ម៉ែត្រ ទទឹង៥ម៉ែត្រ តម្លៃត្រឹមតែ៤.០០០ទៅ៥.០០០ដុល្លារប៉ុណ្ណោះ ហើយកន្លែងខ្លះជាប់នឹងផ្លូវជាតិ បណ្តោយប្រវែង២៩ម៉ែត្រ ទទឹង១០ម៉ែត្រ ឈ្មួញលក់ត្រឹមតែ១៤.០០០ទៅ១៥.០០០ដុល្លារប៉ុណ្ណោះ ប៉ុន្តែនៅរយៈពេលប៉ុន្មានខែចុងក្រោយនេះ ស្រាប់តែដីឡូត៍កន្លែងខ្លះមានការប្រែប្រួលយ៉ាងខ្លាំង ដោយឈ្មួញគិតជាម៉ែត្រការ៉េវិញ គឺ១ម៉ែត្រការ៉េឡើងខ្ពស់រហូតដល់២៥ទៅ៣៣ដុល្លារ និងកន្លែងខ្លះទៀតតម្លៃ៤០ដុល្លារ គឺឡើងគុណនឹង២ ឬគុណនឹង៣ដងឯណោះ » ។
ពួកគាត់បន្ដថា បច្ចុប្បន្ន អ្នកមានដីនៅជាប់ភ្នំ ក៏កំពុងតែរត់ការជីកកកាយពង្រាប និងដឹកអាចម៍ដីចាក់ដើម្បីពុះឡូត៍លក់ឱ្យឈ្មួញ ខណៈកន្លែងខ្លះមិនទាន់រៀបរយផង ក៏លក់ចែកលុយគ្នាយ៉ាងសប្បាយតែម្តង ។ ទោះបីយ៉ាងនេះក្ដី អ្វីដែលពួកគាត់ព្រួយបារម្ភខ្លាំងបំផុតនោះ គឺខ្លាចអស់ភ្នំ ខណៈមានគ្រឿងចក្រចូលទៅជីកកកាយដីដឹកលក់យ៉ាងពពាក់ពពូន បណ្តាលឱ្យភ្នំមួយចំនួនបាត់បង់ទ្រង់ទ្រាយដើមទាំងស្រុង និងភ្នំមួយចំនួនទៀតកំពុងបាត់បង់ជាបណ្តើរៗ ។
មេការសំណង់ម្នាក់ឈ្មោះ ឈុំ ភឿន និយាយថា ៖« រហូតមកដល់ពេលនេះ ដីឡូត៍ដែលគេពុះរួច ត្រូវបានក្រុមឈ្មួញចូលទៅទិញយកទាំងអស់តែម្ដង ដើម្បីសាងសង់អគារកាស៊ីណូ និងខ្លះទៀតទិញសម្រាប់សាងសង់បុរីលំនៅឋាន និងផ្ទះសំណាក់ » ។ លោកថា ៖«អ្នកដែលមានដីនៅត្រង់ម្តុំៗព្រំដែននេះ កំពុងក្លាយជាអ្នកមានមួយប៉ប្រិចភ្នែក ថែមទាំងបានបែងចែកផលចំណេញដល់ឈ្មួញទិញ-លក់ដីធ្លីលក់ចំណេញរាប់ម៉ឺនដុល្លារឯណោះ ហើយមានអ្នកខ្លះទៀតកំពុងតែរៀបចំពុះដីឡូតិ៍ក្បែរគ្នានោះដែរ ដើម្បីលក់បន្ថែមទៀតជាបន្តបន្ទាប់ » ។
ពលរដ្ឋនិយាយថា ៖« ឈ្មួញដែលចូលមកទិញដីឡូត៍ និងដីភ្នំភាគច្រើនគឺជនជាតិថៃ និងជនជាតិចិន ដោយមិនត្រឹមតែទិញដីរាបនោះទេ សូម្បីតែដីភ្នំទាំងប៉ុន្មាន ក៏ទិញរួចរាល់អស់ហើយដែរ រង់ចាំតែថ្ងៃរៀបចំបង្កើតកន្លែងទេសចរណ៍ ឬគម្រោងផ្សេងៗ ជាដើម » ។
ពាក់ព័ន្ធនឹងបញ្ហាទិញដីពីជនបរទេសយ៉ាងពពាក់ពពូននេះ កន្លងមក អ្នកយកព័ត៌មានកោះសន្ដិភាពបានសួរទៅលោក សំ សារ៉េត អភិបាលស្រុកសាលាក្រៅដែរ ដោយលោកប្រាប់យ៉ាងខ្លីថា ៖« អត់មានការលក់ដូរដីភ្នំនោះទេ ហើយបើសិនជាមានគ្រឿងចក្រជីកកកាយដីភ្នំលក់ សូមឱ្យទាក់ទងទៅខាងមន្ទីរជំនាញ ព្រោះគេជាអ្នកគ្រប់គ្រងដីភ្នំ » ។
ចំណែកលោក គឹម សុខា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី បានឱ្យដឹងថា ៖« អត់មានការលក់ដូរភ្នំនៅតំបន់អភិរក្សខាងលើឡើយ តែមានក្រុមហ៊ុនទឹកស្អាតមួយបានសុំច្បាប់ឈូសឆាយព្រៃលើភ្នំសារ៉ាវ៉ាន់ ដើម្បីដាក់អាងស្តុកទឹកសម្រាប់ផ្គត់ផ្គង់ ដោយសារកង្វះទឹកស្អាតដល់ប្រជាពលរដ្ឋរស់នៅក្នុងភូមិផ្សារព្រំប៉ុណ្ណោះ » ។
គួរកត់សម្គាល់ថា នៅឆ្នាំ២០១៨នេះ តម្លៃអចលនទ្រព្យនៅទូទាំងប្រទេសកម្ពុជាបានកើនឡើងយ៉ាងខ្លាំង ពិសេសនៅរាជធានីភ្នំពេញ ខេត្តព្រះសីហនុ និងក្រុងបាវិត ខេត្តស្វាយរៀង និយាយរួម គឺបណ្ដារាជធានី-ខេត្ត-ក្រុង ដែលមានសក្ដានុពលសេដ្ឋកិច្ច ៕
ចែករំលែកព័តមាននេះ