រាជធានីភ្នំពេញ ៖ មុខរបរលក់សំបុកចាបនាពេលបច្ចុប្បន្ននៅតាមបណ្តោយផ្លូវជាតិលេខ៥ ស្ថិតក្នុងភូមិអណ្តូងស្នាយ ឃុំព្រៃខ្មែរ ស្រុករលាប្អៀរ ខេត្តកំពង់ឆ្នាំង កំពុងត្រូវប៉ាន់ ហើយផ្ដល់ចំណូលដល់អ្នកប្រកបរបរនេះ ប្រមាណពី៥ម៉ឺនរៀលទៅ១០ម៉ឺនរៀលក្នុង១ថ្ងៃ ។
អ្នកស្រី សាត រ៉ាន់ អ្នកលក់សំបុកចាប នៅភូមិអណ្តូងស្នាយ កាលពីពេល ថ្មីៗកន្លងមករៀបរាប់ឱ្យដឹងថា អ្នកស្រីប្រកបមុខរបរនេះរយៈពេលជាង២ឆ្នាំមកហើយ ។ ការលក់សំបុកចាបរបស់គាត់បានជួយធ្វើឱ្យជីវភាពគ្រួសារមានភាពល្អប្រសើរជាងមុន បន្ថែមលើរបរធ្វើស្រែចម្ការ ។ សំបុកចាបគឺប្តីរបស់គាត់ជាអ្នកដើររកផ្ទាល់ ដោយចេញដំណើរពីផ្ទះនៅម៉ោង៤ទៀបភ្លឺ ជិះម៉ូតូជាមួយបងប្អូនម្នាក់ទៀតឆ្ពោះទៅភ្នំនាងកង្រី ។ មុនទៅដល់ភ្នំនាងកង្រីត្រូវឆ្លងកាណូតដមួយដំណាក់ទៀត។ សំបុកចាបមាននៅលើដើមត្នោត ដើមរាំង តាមមាត់ទន្លេ។ វិធីយកសំបុកចាបនេះ គឺប្រើកណ្តៀវចងជាប់នឹងឫស្សី ហើយកាវទម្លាក់ចុះមក ។ រយៈពេល៤ទៅ៥ថ្ងៃទើបមកផ្ទះម្តង ហើយអាចរកសំបុកចាបបានប្រមាណពី៤០ទៅ៥០សំបុក ។
អ្នកស្រីសាត រ៉ាន់ បញ្ជាក់ថា ភាគច្រើនអ្នកភ្នំពេញ អ្នកបាត់ដំបង និងកំពង់ឆ្នាំង ទិញសំបុកចាបដែលគាត់ដាក់លក់ ។ តម្លៃតាមសំបុកចាបតូចធំ មានន័យថាសំបុកចាបធំមួយ អាចលក់បាន៥.០០០រៀល ។ ចំណែកសំបុកចាបទំហំកណ្តាលតម្លៃ៤.០០០ រៀល និងតូចតម្លៃ៣.០០០រៀល ។ រយៈពេលជាង២ឆ្នាំមកហើយដែលអ្នកស្រីបានប្រកបរបរនេះ គ្មានថ្ងៃណាដែលលក់មិនដាច់ទេ ព្រោះចំនួនអ្នកទិញកើនឡើងរហូត ព្រោះគេយកសំបុកចាបទាំងនេះសម្រាប់ការដេគ័រតាំងតាមហាងផឹកស៊ី និងអ្នកខ្លះទៀតយកដាក់តាមផ្ទះ និងភូមិគ្រឹះ ។ ការលក់សំបុកចាបរបស់គាត់បានជួយធ្វើឱ្យជីវភាពរបស់គ្រួសារមានភាពល្អប្រសើរជាងមុន ក្រោយពីធ្វើស្រែចម្ការ ។
អ្នកស្រីសាត រ៉ាន់ និយាយថា៖ «របរមួយនេះគឺកំពុងទទួលបានការពេញនិយមខ្លាំង ព្រោះតម្រូវការនៃការជាវសំបុកចាបធម្មជាតិ យកទៅតាំងតាមហាងនានា ក៏ដូចជាដាក់តាំងតាមផ្ទះនិងភូមិគ្រឹះ អ្នកមានៗ គឺមានចំនួនច្រើនជាងមុន ហើយចំណូលពីរបរនេះអាចជួយជីវភាពគ្រួសារខ្ញុំឱ្យប្រសើរជាងមុនមួយកម្រិតផងដែរ ។ តែការប្រមូលសំបុកចាបតាមដើមត្នោត និងដើមរាំងមិនមែនជាការងាយស្រួលនោះទេ» ។
ដោយឡែកអ្នកស្រីសេង ផល្លា ជាអ្នកភ្នំពេញកំពុងឈរទិញសំបុកចាបឱ្យដឹងថា ខណៈពេលដែលអ្នកស្រីជិះរថយន្តឆ្លងកាត់តាមបណ្តោយផ្លូវជាតិលេខ៥ ដល់ចំណុចតាំងលក់សំបុកចាបនោះ អ្នកស្រីមានចំណាប់អារម្មណ៍ចង់ទិញយកទៅតាំងនៅផ្ទះ ហើយស្មានតែជាសំបុកចាបសិប្បនិមិត្ត ។ តាមពិតគឺជាសំបុកចាបដែលធ្វើឡើងដោយសត្វចាប ពិតៗគួរឱ្យសរសើរពន់ពេកដែលសត្វចាបទាំងនោះខិតខំព្យាយាមខាំស្មៅម្តង មួយសរសៃៗយកធ្វើសំបុក រហូតដល់ក្លាយជាជម្រកស្នាក់នៅ និងសម្រាប់កើតពងផងដែរ ។ តាមពិតអ្នកស្រីទើបតែដឹងថា សំបុកចាបនេះមានសំបុកចាបឈ្មោល និងសំបុកញី ពិតជាអស្ចារ្យមែន ។ សំបុកចាបមួយតម្លៃពី៣០០០ រៀលទៅ៥០០០រៀល វាមិនជាថ្លៃប៉ុន្មានទេសម្រាប់អ្នកស្រី ។
អ្នកស្រីអួន សុផន ជាអ្នកលក់សំបុកនៅទីតាំងនោះដែរនិយាយថា ប្រកបមុខរបរលក់សំបុកចាបនេះអស់រយៈពេលជាច្រើនឆ្នាំមក ហើយ ។ សំបុកចាបទាំងនេះអ្នកស្រីទិញតពីគេ យកបោះដុំឱ្យក្នុងតម្លៃធំមួយ២.៥០០រៀល តូចតម្លៃ១៥០០រៀល ពេលលក់ចេញធំតម្លៃ៥ពាន់រៀល តូចតម្លៃ៤ពាន់រៀល ។ ក្នុងមួយថ្ងៃអ្នកស្រីលក់សំបុកចាបបានពី៣០ទៅ៤០សំបុក ។
អ្នកស្រីដដែលនិយាថា ៖ «អ្នកភ្នំពេញគាត់តែងតែជិះរថយន្តផ្ទាល់ខ្លួនមកទិញសំបុកចាបម្តង២០ទៅ៣០សំបុក ចំណែកអ្នកស្រុកនៅបណ្តាខេត្ត ផ្សេងៗក៏មានមកទិញដែរ តែទិញមិនច្រើនដូចអ្នកភ្នំពេញនោះទេ ។ មុខរបរលក់សំបុកចាបវាគ្រាន់តែជួយឱ្យជីវភាពគ្រួសាររកចំណូលបន្ថែមបន្ទាប់ពីមុខរបរលក់បបរពេលព្រឹក និងលក់គ្រឿងទេសក្នុងភូមិតែប៉ុណ្ណោះ »។
កុមារីចរិយា ដែលកំពុងឈរទិញសំបុកបានឱ្យដឹងថា«នាងខ្ញុំទើបតែចាប់អារម្មណ៍អំពីសំបុកដែលធ្វើឡើងដោយសត្វចាប ពិតៗមិនមែនជារបស់សិប្បនិមិត្ត ។ មិនដឹងថា សត្វចាបទាំងនោះប្រើរយៈពេលអស់ប៉ុន្មានថ្ងៃទើបបានសំបុកមួយសម្រាប់ជ្រកកោនទេ ។ ពិតជាអស្ចារ្យណាស់ ប៉ុន្តែហេតុអ្វីពួកគេចាំបាច់ធ្វើសំបុកឈ្មោលផងសំបុកញីផងបែបនេះ ? មិនថាមនុស្ស ឬសត្វទេសុទ្ធតែត្រូវការជម្រកមួយច្បាស់លាស់ដើម្បីជ្រកកោនសម្រាប់ការពារព្យុះភ្លៀង និងបង្កើតគ្រួសារមួយដ៏កក់ក្តៅបង្កើតកូនចៅសើចសប្បាយពេញផ្ទះ នេះគឺជាអ្វីដែលមនុស្សសត្វទាំងឡាយត្រូវការ »។
ចរិយាបានសម្រេចចិត្តទិញសំបុកចាបឈ្មោលញីចំនួន១០សំបុកយកដាក់តាមសំយាបផ្ទះរបស់នាងនៅឯស្រុកកំណើតទីរួមខេត្តកំពង់ស្ពឺដើម្បីឱ្យចាបស្រុកជ្រកកោនបង្កើតបានជាកូនជាចៅផងព្រោះនៅម្តុំផ្ទះនាងសំបូរចាបខ្លាំងណាស់តែមិនឃើញមានសំបុកទេ នៅពេលយប់ពួកវាតែងតែដេកតាមមែកឈើ ។ បើចាបទាំងនោះចូលនៅសំបុកដែលនាងដាក់ឲ្យ នាងនឹងចំណាយពេលទៅទិញសំបុកចាបនៅភូមិព្រៃខ្មែរម្តងទៀត ៕
ចែករំលែកព័តមាននេះ