រាជធានីភ្នំពេញ ៖ ជនដែលបង្ហោះសារប្រមាថលើព្រះមហាក្សត្រ តាមបណ្ដាញសង្គមហ្វេសប៊ុក ត្រូវបានកម្លាំងសមត្ថកិច្ចនគរបាលចាប់ឃាត់ខ្លួន កាលពីល្ងាចថ្ងៃទី១៥ មិថុនា ២០១៨នេះ នៅសង្កាត់បឹងកេងកង២ ខណ្ឌចម្ការមន…
រាជធានីភ្នំពេញ ៖ ជនដែលបង្ហោះសារប្រមាថលើព្រះមហាក្សត្រ តាមបណ្ដាញសង្គមហ្វេសប៊ុក ត្រូវបានកម្លាំងសមត្ថកិច្ចនគរបាលចាប់ឃាត់ខ្លួន កាលពីល្ងាចថ្ងៃទី១៥ មិថុនា ២០១៨នេះ នៅសង្កាត់បឹងកេងកង២ ខណ្ឌចម្ការមន រាជធានីភ្នំពេញ។ ជនជាប់សង្ស័យមានឈ្មោះ អៀង ជលសា ភេទប្រុស អាយុ២៦ឆ្នាំ។ ការឃាត់ខ្លួនជនដែលប្រមាថលើអង្គព្រះមហាក្សត្រនេះ ត្រូវបានធ្វើឡើង ដោយកម្លាំងនាយកដ្ឋានប្រឆាំងបទល្មើសបច្ចេកវិទ្យាក្រសួងមហាផ្ទៃ សហការជាមួយស្នងការដ្ឋាន នគរបាលរាជធានីភ្នំពេញ ខេត្តត្បូងឃ្មុំ និងខេត្តស្វាយរៀង ក្រោមការបញ្ជាផ្ទាល់ពីនាយឧត្តមសេនីយ៍ ឆៃ ស៊ីណារិទ្ធ អគ្គស្នងការនគរបាលជាតិស្ដីទី។
ជនដែលបង្ហោះសារប្រមាថលើព្រះមហាក្សត្រនេះ ប្រើប្រាស់គណនីហ្វេសប៊ុកឈ្មោះ អៀង ជលសា ដែលបានប្រព្រឹត្តឡើងកាលពីយប់ថ្ងៃទី១៣ មិថុនា ២០១៨ ធ្វើឲ្យរំជួយក្នុងសង្គមហ្វេសប៊ុក រហូតដល់សមត្ថកិច្ចដាក់កម្លាំងស្រាវជ្រាវ ឈានដល់ការឃាត់ខ្លួន។ មន្ដ្រីនគរបាលជាន់ខ្ពស់ នៃអគ្គស្នងការដ្ឋាននគរបាលជាតិ បានបង្ហើបឲ្យដឹងថា ជនជាប់សង្ស័យខាងលើនេះ ធ្លាប់បានទៅធ្វើការងាររកស៊ីនៅក្រុងសួង ខេត្តត្បូងឃ្មុំ ហើយធ្លាប់ជាប់ពន្ធនាគារខេត្តបាត់ដំបងផងដែរ។ ក្រោយពីឃាត់ខ្លួន ជនសង្ស័យត្រូវបាន សមត្ថកិច្ចនាយកដ្ឋានប្រឆាំងបទល្មើសបច្ចេកវិទ្យាក្រសួងមហាផ្ទៃ កំពុងធ្វើការសាកសួរ ដើម្បីកសាងសំណុំរឿងតាមនីតិវិធី៕
ចែករំលែកព័តមាននេះ