រាជធានីភ្នំពេញ ៖ រាជរដ្ឋាភិបាលចក្រភពអង់គ្លេស បានសម្តែងក្តីសង្ឃឹមថាការបោះឆ្នោតជ្រើសតាំង អ្នក តំណាងរាស្ត្រអាណត្តិទី៦រដ្ឋសភា ឆ្នាំ២០១៨ខាងមុខនេះនឹងប្រព្រឹត្តិទៅដោយសេរីត្រឹមត្រូវយុត្តិធម៌ និងល្អប្រ សើរឈរលើគោលការណ៍គោរពលិទ្ធិប្រជាធិបតេយ្យ។ នេះបើតាមការអះអាងប្រមុខការទូតអង់គ្លេស។ ក្នុងជំនួបសម្តែងការគួរសម និងជម្រាបលា ជាមួយសម្តេច ហេង សំរិន ប្រធានរដ្ឋសភា នាព្រឹកថ្ងៃទី១៥ មិថុនា ២០១៨ នៅវិមានរដ្ឋសភាលោក វីលៀម ជេស ឡុងហឹស្ត (William Jesse Longhurst )បានឲ្យដឹងថា មុនចាកចេញពីកម្ពុជាលោកនឹងចូលរួមសង្កេតការណ៍ការបោះឆ្នោតជ្រើសតាំងតំណាងរាស្ត្រនីតិកាលទី៦ខាងមុខនេះ។ តាមការស្រង់សម្ដីរបស់លោកទូតដោយលោក កែវ ពិសិដ្ឋ នាយកខុទ្ទការល័យសម្តេច ហេង សំរិន ប្រាប់ ក្រុមអ្នកសារព័ត៌មាន ក្រោយចប់ជំនួបបានបញ្ជាក់ថា«រាជរដ្ឋាភិបាលប្រទេសអង់គ្លេសសង្ឃឹមថាការបោះឆ្នោតជ្រើស តាំងណាងរាស្ត្រ នៅពេលខាងមុខនេះនឹងប្រព្រឹត្តិទៅសព្វជ្រុងជ្រោយល្អប្រសើរ ត្រឹមត្រូវយុត្តិធម៌ គោរពតាមលទ្ធិប្រជាធិបតេយ្យ »។ លោកបន្តថា កម្ពុជានឹងរក្សាបានស្ថិរភាពនយោបាយ ក៏ដូចសេដ្ឋកិច្ចមានលក្ខខណៈរឹងមាំង ពិសេសនោះ ការធ្វើកិច្ចសហប្រតិបត្តិការរវាងកម្ពុជា និងអង់គ្លេសកាន់តែប្រសើរបន្តទៀត។
ក្នុងងឱកាសនោះ លោកឯកអគ្គរាជទូត បានបញ្ជាក់ថា«ខ្ញុំនឹងចាកចេញពីប្រទេសកម្ពុជា នៅក្រោយការបោះឆ្នោតសកលរួច។ ដូច្នេះខ្ញុំនឹងចូលរួមសង្កេតការណ៍ ការបោះឆ្នោតជ្រើសតាំងតំណាងរាស្ត្រនីតិកាលទី៦ នោះផងដែរ។ នៅក្នុងបេសកកម្មការទូត៤ឆ្នាំនៅកម្ពុជា ខ្ញុំបានចូល រួមសង្កេតការណ៍ការបោះឆ្នោតក្រុមប្រឹក្សាឃុំ សង្កាត់ កាលពីឆ្នាំ២០១៧ ប៉ុន្តែឆ្នាំ២០១៨នេះ ជាការបោះឆ្នោតសកលជា បទពិសោធន៍ថ្មីមួយដែលលោកនឹងទទួលបាន»។ ក្នុងនាមរដ្ឋាភិបាលអង់គ្លេស លោកឯកអគ្គរាជទូត បានគូសបញ្ជាក់ថា អង់គ្លេសសង្ឃឹមថា ការបោះឆ្នោតនាពេលខាងមុខនេះ នឹងដំណើរទៅរលូន មានការចូលរួមពីគ្រប់ភាគីពាក់ព័ន្ធ ហើយអ ង់គ្លេសនឹងបន្តកិច្ចសហប្រតិបត្តិការជាមួយកម្ពុជា ក្នុងការថែរក្សាសុខសន្តិភាព ស្ថិរភាពនយោបាយ និងការអភិវឌ្ឍ។ អ្វីដែលជាសមិទ្ធផលនៅក្នុងរយៈបេសកកម្ម៤ឆ្នាំមកនេះ លោក វីលៀម ជេសឡុងហឹស្ត បានលើកឡើងថា រដ្ឋសភាកម្ពុជា បានផ្តល់កិច្ចសហប្រតិបត្តិការយ៉ាងល្អជាមួយស្ថានទូតអង់គ្លេស។ ស្ថានទូតអង់គ្លេស បានសហការជាមួយ អគ្គលេខាធិការដ្ឋានរដ្ឋសភា នៅក្នុងការពង្រឹងសមត្ថភាពតំណាងរាស្ត្រជាស្ត្រី តាមរយៈការរៀបចំឲ្យមានសិក្ខាសាលា ជាច្រើនលើក។
លោកទូត បានគូសបញ្ជាក់បន្ថែមថា កន្លងមកអង់គ្លេសបានផ្តល់អាហារូបករណ៍ដល់និស្សិតកម្ពុជា បានទៅសិក្សានៅអង់គ្លេស ផ្តល់ជំនួយខាងដោះមីន និងសកម្មភាពសង្គមជាច្រើនទៀត ហើយបេសកកម្ម នោះនឹងនៅបន្តទៅមុខទៀត។ ក្នុងនាមរដ្ឋសភាកម្ពុជា សម្តេច ហេង សំរិន បានសម្តែងសេចក្តីសោមនស្សរីករាយ និងថ្លែងអំណរគុណដល់ចក្រភពអង់គ្លេស ដែលបានជួយគាំទ្រកម្ពុជារហូតមក។ សម្តេចបានលើកឡើងថា កម្ពុជា-ចក្រ ភពអង់គ្លេស មានទំនាក់ទំនងការទូតជាមួយគ្នាជាង៦ទសវត្សរ៍មកហើយ ហើយទំនាក់ទំនង និងកិច្ចសហ ប្រតិបត្តិការដ៏យូរអង្វែងរវាងប្រជាជាតិ និងប្រទេសទាំងពីរបាននាំមកនូវឧត្តមប្រយោជន៍ទៅវិញទៅមកជាពិសេសបានរួមចំណែកដល់ការអភិវឌ្ឍរបស់កម្ពុជាទាំងពេលបច្ចុប្បន្ន និងអនាគត។ សម្តេចប្រធានរដ្ឋសភា បានជម្រាប លោកឯកអគ្គរាជទូតថា កម្ពុជានឹងរៀបចំការបោះឆ្នោតជ្រើសតាំងតំណាងរាស្ត្រនីតិកាលទី៦ នៅចុងខែកក្កដា ខាងមុខ ដែលមានគណបក្សនយោបាយចំនួន២០ចូលរួមប្រកួតប្រជែង។
ការបោះឆ្នោតនឹងប្រព្រឹត្តទៅតាមការកំណត់ ស្រប តាមច្បាប់រដ្ឋធម្មនុញ្ញ នៃព្រះរាជាណាចក្រកម្ពុជា ដោយសេរី ត្រឹមត្រូវ និងយុត្តិធម៌ តាមគោលការណ៍ប្រជាធិបតេយ្យ។ កម្ពុជាខិតខំរក្សាឲ្យបាននូវសន្តិភាព សន្តិសុខ សណ្តាប់ធ្នាប់សង្គម ដែលជាមូលដ្ឋានគ្រឹះ ដ៏មានសារសំខាន់ក្នុងការអភិ វឌ្ឍន៍សេដ្ឋកិច្ចសង្គម នាំមកនូវសេចក្តីសុខក្សេមក្សាន្តជូនប្រជាជនកម្ពុជា។ ជាចុងបញ្ចប់សម្តេច បានជូនពរឯកអគ្គរាជទូត សូមមានសុខភាពល្អ និវត្តន៍ទៅកាន់មាតុប្រទេសវិញ ដោយសុវត្ថិភាព និងសូមទទួលបានជោគជ័យ ក្នុងបេសកកម្មជាបន្តបន្ទាប់ទៀត។ សម្តេចបានផ្តាំផ្ញើថា ទោះបីបេសកកម្មការទូតរបស់ ឯកឧត្តម នៅកម្ពុជា ត្រូវបានបញ្ចប់ និងទៅបំពេញភារកិច្ចនៅស្ថាប័នផ្សេងក្តី សូមលោកនៅតែបន្តរក្សាទំនាក់ទំនងល្អជាមួយកម្ពុជា និងជួយផ្សព្វផ្សាយពីសក្កានុពលទេសចរណ៍កម្ពុជា ដល់ប្រជាជន និងអ្នកវិនិយោគិននៅអង់គ្លេស ឲ្យកាន់តែច្រើនថែមទៀត៕
ចែករំលែកព័តមាននេះ