បន្ទាយមានជ័យ ៖ គ្រួសារទុរគតជនពោះម៉ាយដេកស្លាប់មួយចំហៀងខ្លួន ទទួលអំណោយជាបន្តបន្ទាប់ ថ្ងៃមុនជារបស់គ្រហស្ថតាមរយៈសមត្ថកិច្ច ថ្ងៃនេះតាមរយៈព្រះសង្ឃគង់នៅវត្តបាលិលេយ្យ វត្តរតនារាម ហៅវត្តផ្សារកណ្តាល និងវត្តសូរិយារាម ហៅវត្តថ្មី ។
អំណោយខាងលើរួមមានថវិកា៤៥ម៉ឺនរៀល និង១១០០បាត ប្រាក់ថៃ ប៊ីចេង១ថង់ ស្មើកន្លះគីឡូក្រាម ស្កសរ១គីឡូក្រាម ខ្ទឹម១គីឡូកន្លះ ត្រីខចំនួន២យួរ ទឹកផ្លែឈើ៣យួរ និងរទេះជនពិការ០១គ្រឿង ។
គ្រួសារទទួលអំណោយខាងលើជាបុរសពោះម៉ាយឈ្មោះ ទុយ តឹម អាយុ៥៥ឆ្នាំ រស់ក្នុងខ្ទមកំសត់ធ្លាក់ខ្លួនពិការ១០ឆ្នាំមកហើយ ខ្ទមនោះអ្នកស្រុកជាអ្នកសង់ឲ្យលើដីចំណីផ្លូវ នៅភូមិបាលិលេយ្យ២ សង្កាត់ និងក្រុងប៉ោយប៉ែត ។
ភិក្ខុ ប៉ុល ម៉ាឡៃ គង់នៅវត្តបាលិលេយ្យប្រាប់កោះសន្តិភាពថា អំណោយ និងថវិកាទាំងនេះមួយចំនួនជារបស់សប្បុរសជនក្នុង និងក្រៅប្រទេសតាមរយៈមូលនិធិសង្គ្រោះចាស់ជរា និងមួយចំនួនជារបស់ព្រះសង្ឃគង់នៅវត្តរតនារាម ហៅវត្តផ្សារកណ្តាល វត្តបាលិលេយ្យ និងវត្តសូរិយារាមហៅវត្តថ្មី ។
គួរបញ្ជាក់ថា គ្រួសារក្រីក្រ និងធ្លាក់ខ្លួនពិការខាងលើ ក្រោយពីគេហទំព័រ និងកាសែតកោះសន្តិភាពចុះផ្សាយមានសប្បុរសជនក្នុង និងក្រៅប្រទេសបានជួយជាអំណោយជាបន្តបន្ទាប់ថ្ងៃមុន តាមរយៈសមត្ថកិច្ច និងថ្ងៃនេះតាមរយៈព្រះសង្ឃ ៕
ចែករំលែកព័តមាននេះ