រាជធានីភ្នំពេញ ៖ បើទោះបីជាយុវវ័យកំពុងដេញតាមបច្ចេកវិទ្យាទំនើប និងប្រើប្រាស់សម្ភារៈទាន់សម័យក៏ពិតមែន ប៉ុន្តែមុខរបរសាមញ្ញមិនកាលីពមួយចំនួន ដូចជាការកាត់សក់តាមរបងវត្តនៅតែទទួលបានការគាំទ្រ និងកំពុងតែប្រកួតប្រជែងយ៉ាងស្វិតស្វាយជាមួយនឹងហាងកាត់សក់បំពាក់ម៉ាស៊ីនត្រជាក់នៅក្រុងភ្នំពេញ។
យុវជន ញ៉ែម ចិន្តា ដែលមានទីលំនៅរាជធានីភ្នំពេញ ហើយកំពុងតែកាត់សក់នៅជាប់របងវត្តឧណ្ណាលោម ផ្លូវលេខ១៩ ស្ថិតក្នុងសង្កាត់ជ័យជំនះ ខណ្ឌដូនពេញ បាននិយាយថា គាត់ពេញនិយមមកកាត់សក់នៅជាប់របងវត្តឧណ្ណាលោមផ្នែកខាងលិច ដោយសារតែជាងនៅទីនេះមានស្នាដៃ ដែលភ្ញៀវដូចជារូបប្អូនអាចកុម្ម៉ង់ម៉ូតសក់តាមចំណូលចិត្ត ហើយតម្លៃវិញគឺធូរថ្លៃឆ្ងាយណាស់ បើធៀបនឹងហាងកាលីបៗមានម៉ាស៊ីនត្រជាក់ ។ លោកពោលថា៖ «កាត់សក់នៅរបងវត្តមែន តែម៉ូតអាចកុម្មង់បានតាមចិត្ត ហើយតម្លៃត្រឹមតែ៥០០០រៀលប៉ុណ្ណោះ ។ បើប្រៀបធៀបទៅនឹងហាងកាត់សក់ដែលមានម៉ាស៊ីនត្រជាក់ និងមាននារីស្រីស្រស់ស្អាតចាំកាត់ក្រចកដៃ ត្បាល់ត្រចៀក និងលាបសក់ គឺមានតម្លៃសរុបប្រហែលជាមិនក្រោម២០ដុល្លារនោះទេ ។ ដូច្នេះខ្ញុំគ្មានលទ្ធភាពទេ»។
លោក ប្រឹង ចាន់ ស្ថិតក្នុងវ័យជាង៤០ឆ្នាំ មានមុខរបរជាជាងកាត់សក់នៅជាប់របងខាងលិចវត្តឧណ្ណាលោមបានឲ្យដឹងថា គាត់ចាប់មុខរបរកាត់សក់នៅទីតាំងខាងលើនេះអស់ពេលរយៈពេលជាង១០ឆ្នាំមកហើយ ហើយគាត់ចេះកាត់សក់គ្រប់ម៉ូត ដោយសារបានរៀនពីការកាត់សក់ពីបងប្អូនជីដូនមួយរបស់គាត់ ។ រាល់ថ្ងៃអ្នកដែលមកកាត់សក់នៅកន្លែងគាត់ភាគច្រើនជាយុវជន និងជាម៉ូយចាស់ៗ ដែលគេពេញនិយមម៉ូតសក់ថ្មីៗ និងតម្លៃកាត់សក់ក្នុងមួយនាក់ គឺត្រឹម៥០០០រៀល ។ ដោយសារតែការកាត់សក់ជាមួយជាងកាត់សក់តាមរបងវត្តនៅតែទទួលបានការពេញនិយម លោក ប្រឹង ចាន់ បានបញ្ជាក់ថា ក្នុងមួយថ្ងៃគាត់រកបានពី៤ម៉ឺនទៅ ៥ ម៉ឺនរៀលក្នុងមួយថ្ងៃ ក៏ប៉ុន្តែមានថ្ងៃខ្លះគាត់កាត់សក់ឲ្យភ្ញៀវបានតែពីរប៉ុណ្ណោះ ដោយសារតែមានភ្លៀង ។ សព្វថ្ងៃជាងកាត់សក់វ័យកណ្តាលរូបនេះ មានប្រពន្ធនិងកូន៤នាក់ ។ លោកអះអាងថា៖ «មុខរបរកាត់សក់នេះ អាចឲ្យខ្ញុំរកចំណូលគ្រាន់បើដែរហើយជីវភាពគ្រួសារក៏បានធូរធារ អញ្ចឹងទៅថ្ងៃណាអនាគតប្រហែលជាខ្ញុំមិនអាចលះបង់មុខរបរនេះបានឡើយ ព្រោះមុខរបរនេះមិនចំណាយដើមទុនច្រើននោះទេ ហើយក៏នៅមានអតិថិជនពេញនិយមមកកាត់សក់តាមរបងវត្តដែរ» ។
លោកហួង ជាមន្ត្រីនគរបាលក្រសួងមហាផ្ទៃបាននិយាយថា លោកពេញនិយមក្នុងការចូលទៅកាត់សក់នៅម្តុំផ្លូវសុកហុក ខណ្ឌ៧មករា រាជធានីភ្នំពេញ ព្រោះទីនោះមានម៉ាស៊ីនត្រជាក់ មានស្រីស្រស់បវររង់ចាំកាត់ក្រចក ត្បាល់ត្រចៀក និងលាបសក់ក្រោយពីយើងកាត់សក់រួច ។ រីឯតម្លៃកាត់សក់មួយនាក់១ម៉ឺនរៀល លាបសក់២ម៉ឺនរៀល កាត់ក្រចកដៃ និងត្បាល់ត្រចៀក១ម៉ឺនរៀល ហើយយើងឲ្យលុយធីបតាមចិត្តដែលយើងឲ្យ ។
រីឯលោក សោម សុវណ្ណ ជាងកាត់សក់នៅហាងមួយតាមបណ្តោយផ្លូវសុកហុក (ផ្លូវលេខ១០៧) ស្ថិតក្នុងសង្កាត់អូឫស្សី៤ ខណ្ឌ៧មករា បានឲ្យដឹងថា ឆ្នាំនេះលោកមានអាយុជិត៥០ឆ្នាំ លោកចាប់យកមុខរបរកាត់សក់បានជិត២០ឆ្នាំហើយ ហើយភ្ញៀវរបស់គាត់ចូលកាត់សក់សុទ្ធតែជាអ្នកធូរធារជិះរថយន្តធុនទំនើបមកកាត់សក់កន្លែងគាត់ ។ ដោយសារហាងកាត់សក់នេះ មានម៉ាស៉ីនត្រជាក់ និងមានសេវាល្អក្នុងការកាត់ក្រចកដៃ លាបសក់ និងត្បាល់ត្រចៀកដែលមានជាងជំនាញស្រស់ស្អាតរង់ចាំបំរើយ៉ាងយកចិត្តទុកដាក់តែហាងរបស់គាត់មិនមានស្ត្រីជាជនជាតិវៀតណាមនោះទេ ។ លោកបញ្ជាក់ថា៖ «តម្លៃកាត់សក់ កាត់ក្រចកដៃ ត្បាល់ត្រចៀក និងលាបសក់មិនជាថ្លៃប៉ុន្មានឡើយ សរុបទាំងអស់ប្រហែលជា២០ដុល្លារប៉ុណ្ណោះ មិនមែនអាងតែហាងមានម៉ាស៊ីនត្រជាក់ ហើយភ្ញៀវចូលកាត់សក់រាល់ថ្ងៃនោះទេ មានថ្ងៃខ្លះរកភ្ញៀវម្នាក់មិនបានផង ព្រោះបច្ចុប្បន្ននេះហាងកាត់សក់ម៉ាស៊ីនត្រជាក់សំបូរណាស់»។ ជាក់ស្តែងនៅតាមបណ្តោយវិថីកម្ពុជាក្រោម (ផ្លូវលេខ១២៨) ស្ថិតក្នុងសង្កាត់ផ្សារថ្មី២ ខណ្ឌដូនពេញ និងតាមបណ្តោយវិថីសុកហុក (ផ្លូវលេខ១០៧) ក្នុងសង្កាត់អូឫស្សី៤ ខណ្ឌដូនពេញ ។ លោកបញ្ជាក់ថា គាត់គ្រាន់តែជាជាងកាត់សក់ម្នាក់សម្រាប់ហាងកាត់សក់ខាងលើប៉ុណ្ណោះ ពេលកាត់សក់បានភ្ញៀវម្នាក់ម្ចាស់ហាងគេដកយកភាគរយ ។
ដោយឡែកលោកម៉ូន ស្ថិតក្នុងវ័យកំលោះអាយុ២៩ឆ្នាំដែលឈរកាត់សក់នៅជាប់របងខាងលិចវត្តឧណ្ណាលោម ផ្លូវលេខ១៩ និងមានដាក់ស្លាកបង្រៀនកាត់សក់ផងនោះបានរៀបរាប់ឲ្យដឹងថា ឆ្នាំនេះប្អូនមានអាយុ២៩ឆ្នាំនៅកំលោះ លោកចេះកាត់សក់គ្រប់ម៉ូតនិងពេញនិយមសម្រាប់យុវជននាសម័យនេះ ហើយមានទទួលការបង្រៀនកាត់សក់ផងដែរ ។ ម៉ូតសក់គឺចេះកាត់សក់ដោយសាររៀនពីបងប្អូនរបស់ខ្លួន ហើយត្រកូលរបស់ម៉ូនរបស់លោកបានចាប់មុខរបរកាត់សក់តាំងពីជីដូន ជីតាមកម្ល៉េះ ។ ក្នុងមួយថ្ងៃលោកម៉ូនកាត់សក់ឲ្យភ្ញៀវបានយ៉ាងតិច១០នាក់ដែលក្នុងភ្ញៀវម្នាក់បង់តម្លៃ៥០០០រៀល ហើយភាគច្រើនជាយុវវ័យ រីឯម៉ូតសក់គឺលោកមិនឲ្យភ្ញៀវទាស់ចិត្តឡើយ តែមានថ្ងៃខ្លះភ្ញៀវត្រូវអង្គុយរង់ចាំផងដែរ ។ លោកបញ្ជាក់ផងដែរថា ទៅអនាគតលោកចង់ពង្រីកមុខរបរកាត់សក់នេះនៅផ្ទះរបស់ខ្លួន ព្រោះលោកយល់ឃើញថា បើសក់វែងហើយអ្នកត្រូវការកាត់សក់ចេញ ដូច្នេះមុខរបរនេះមានអនាគតវែងឆ្ងាយ ហើយម្យ៉ាងវិញទៀតសម័យនេះយុវជនគេពេញនិយមលេងម៉ូតសក់មិនធម្មតានោះទេ ដូច្នេះយើងជាជាងកាត់សក់ក៏រត់តាមនោះដែរ ទើបមានភ្ញៀវចូលមកកាត់សក់នៅកន្លែងយើងបានច្រើនផងដែរ ។ មុខរបរកាត់សក់ គឺជាមុខរបរសុចរិក ហើយពេលយើងចាស់ទៅក៏អាចកាត់សក់បានដែរ រីឯចំណូលអាចដោះស្រាយជីវភាពគ្រួសារបាន ៕
ចែករំលែកព័តមាននេះ