ខេត្តមណ្ឌលគិរី ៖ រថយន្តសាំយ៉ុងមួយគ្រឿងត្រូវបានគេប្រទះឃើញ បើកធ្លាក់ស្នាមភ្លោះផ្លូវជាតិលេខ៧៦ ត្រង់ចំណុចចន្លោះគីឡូម៉ែត្រលេខ៦៤ នឹងលេខ៦៥ កាលពីវេលាថ្ងៃត្រង់ថ្ងៃទី១៥ មិថុនា ២០១៨ ក្នុងភូមិអណ្តូងក្រឡឹង…
ខេត្តមណ្ឌលគិរី ៖ រថយន្តសាំយ៉ុងមួយគ្រឿងត្រូវបានគេប្រទះឃើញ បើកធ្លាក់ស្នាមភ្លោះផ្លូវជាតិលេខ៧៦ ត្រង់ចំណុចចន្លោះគីឡូម៉ែត្រលេខ៦៤ នឹងលេខ៦៥ កាលពីវេលាថ្ងៃត្រង់ថ្ងៃទី១៥ មិថុនា ២០១៨ ក្នុងភូមិអណ្តូងក្រឡឹង ឃុំសែនមនោរម្យ ស្រុកអូររាំង មិនមានបង្កឲ្យមនុស្សណាម្នាក់រងរបួសឡើយ តែធ្លាយចេញសុទ្ឋតែឈើខុសច្បាប់រាប់សិបកំណាត់។
ប្រភពបានឲ្យដឹងថា មុនពេលកើតហេតុ គេបានឃើញរថយន្តសាំយ៉ុង ពណ៌ទឹកប្រាក់ ពាក់ស្លាកលេខ ភ្នំពេញ ២A-៤៩៩៤ បើកបរចេញពីក្រុងសែនមនោរម្យ ឆ្ពោះទៅស្រុកកែវសីមា ។ លុះធ្វើដំណើរដល់ចំណុចកើតហេតុខាងលើក៏រេរចង្កូចធ្លាក់ទៅឆ្វេងដៃ បណ្តាលឲ្យរថយន្តខូចខាតស្ទើរទាំងស្រុង ដោយសារតែដឹកឈើលើសចំណុះ។ ក្រោយកើតហេតុ រថយន្តដឹកឈើខាងលើត្រូវបានមន្ត្រីឧទ្យានុរក្សដែនជម្រកការពារសត្វព្រៃកែវសីមា ដែលប្រចាំការណ៏ជិតនោះអូសយកទៅរក្សាទុកនៅស្នាក់ការរបស់ខ្លួន។
ប្រភពដាច់ដោយឡែកមួយទៀតបានឲ្យដឹងថា ការដឹកជញ្ជូនឈើតាមរយៈរថយន្តសាំយ៉ុងចេញពីខេត្តមណ្ឌលគិរី ទៅខេត្តនានាត្រូវបានគេដឹងថា មានថៅកែធំៗ៤រូបបានធ្វើសកម្មភាពដឹកឈើដែលលួចកែច្នៃខុសច្បាប់ចេញពីតំបន់ព្រៃស្រែពក ស្រុកពេជ្រាដា តាមរយៈរថយន្តសាំយ៉ុង រថយន្តកូរ៉េ រថយន្តប្រភេទមួយបាំងកន្លះជាដើម ដោយអាចដឹកបានយ៉ាងរលូនដោយគ្មានបញ្ហារាំងស្ទះណាមួយឡើយ ហាក់ដូចចេះវិធីបំបាំងភ្នែកសមត្ថកិច្ចអញ្ចឹងដែរ ៕
ចែករំលែកព័តមាននេះ